Сустрэча з Надзвычайным і Паўнамоцным Паслом Ісламскай Рэспублікі Іран у Беларусі Махамадам Рэза Сабуры

Прэзідэнт Беларусі Аляксандр Лукашэнка лічыць неабходным значна павысіць узровень супрацоўніцтва з Іранам. Аб гэтым Кіраўнік дзяржавы заявіў 15 снежня на сустрэчы з Надзвычайным і Паўнамоцным Паслом Ісламскай Рэспублікі Іран у Беларусі Махамадам Рэза Сабуры з нагоды завяршэння яго дыпламатычнай місіі ў нашай краіне.

"Шчыра скажу, вы цудоўна ведаеце, і ў нашай краіне добра ведаюць, якое значэнне мы надаём супрацоўніцтву з Іранам. Яшчэ больш адкрыта скажу: будучы 2017 год стане вызначальным у нашых адносінах. Здаецца, усюды дэкларуем, што мы стратэгічныя партнёры, у нас няма ніякіх супярэчнасцей, гатовы супрацоўнічаць па любых напрамках і забароненых тэм няма, але ўзровень нашага супрацоўніцтва не проста жадае быць лепшым. А калі суадносіць гэты рэальны ўзровень супрацоўніцтва з нашымі магчымасцямі, ён ніякі. Наперадзе чакаецца велізарная работа", - падкрэсліў Аляксандр Лукашэнка.

Разам з тым Прэзідэнт заўважыў, што бакі зрабілі нямала. У прыватнасці, распрацавана дарожная карта двухбаковага супрацоўніцтва на 2016-2017 гады. "Трэба выконваць гэты план, - заявіў Кіраўнік дзяржавы. - Чаму я так насцярожана і з такім хваляваннем стаўлюся да нашага супрацоўніцтва? Таму што, калі Беларусь і Іран рэалізуюць хаця б палавіну магчымасцей дзвюх краін, гэта будзе самы эфектыўны праект супрацоўніцтва. Вы маеце патрэбу ва ўсім, што ў нас ёсць, што мы вырабляем. Мы маем вялікую патрэбу ў таварах, што ёсць у вас. Давайце разам працаваць, ствараць сумесныя прадпрыемствы тут, у Іране, давайце, нарэшце, пакажам, што мы можам супрацоўнічаць".

Аляксандр Лукашэнка звярнуў увагу, што да маючай адбыцца сустрэчы прэзідэнтаў дзвюх дзяржаў неабходна прарэвізаваць прынятыя раней рашэнні. "Пакінуць толькі тое, што мы можам рэалізаваць, і дапоўніць дарожную карту нашага супрацоўніцтва істотнымі напрамкамі. Іншага шляху няма, - упэўнены беларускі лідар. - Таму я прашу перадаць маю заклапочанасць Міністэрству замежных спраў Ірана і Прэзідэнту Ірана. Мы гатовы яго прыняць у Беларусі ў любы час. Думаю, гэта сустрэча будзе знакавай і стане новым этапам у нашым супрацоўніцтве".

Махамад Рэза Сабуры падзякаваў Кіраўніку дзяржавы за магчымасць сустрэцца, адзначыўшы, што падзяляе пазіцыю Прэзідэнта. "Не толькі я, а ўсе мае калегі з вамі салідарныя, што мы не выкарысталі ў правільнай меры свой патэнцыял, - сказаў ён. - У Іране заўсёды падкрэсліваюць, што мы павінны павысіць узровень двухбаковых адносін з Беларуссю".