Бел
Галоўная   /  Падзеі

Сустрэча з кіраўнікамі і калектывамі буйнейшых дзяржаўных СМІ

10 красавіка 2018 года

Сродкі масавай інфармацыі прызначаны фарміраваць канструктыўнае грамадскае меркаванне праз своечасовую і аб'ектыўную падачу матэрыялу, шчыры і ўдумлівы дыялог з аўдыторыяй. Аб гэтым Прэзідэнт Беларусі Аляксандр Лукашэнка заявіў 10 красавіка на сустрэчы з кіраўнікамі і калектывамі буйнейшых СМІ краіны.

Мерапрыемства было арганізавана на базе Белтэлерадыёкампаніі. Перад сустрэчай з журналістамі Аляксандр Лукашэнка азнаёміўся з перспектывамі развіцця вяшчання навін, яму далажылі аб тэхнічным перааснашчэнні, пераходзе на вяшчанне ў HD-фармаце.

У тэлестудыі на сустрэчы з Кіраўніком дзяржавы прысутнічалі больш за 130 журналістаў, якія прадстаўляюць Белтэлерадыёкампанію, Другі нацыянальны канал, Сталічнае тэлебачанне, інфармагенцтва БЕЛТА, рэдакцыю газеты "Советская Белоруссия", выдавецкі дом "Звязда" і нацыянальны філіял міждзяржаўнай тэлерадыёкампаніі "МІР".

"Не ведаю, як у вас, але ў мяне моцная настальгія. Даўно я ў вас не быў. У былыя часы я вельмі часта бываў тут. Напэўна, гэта добрае пачуццё. Таму давайце дамовімся, што я не на прэс-канферэнцыю прыйшоў, а ў нас тут адбудзецца сумленная і шчырая размова, - сказаў Прэзідэнт. - Мы ўсе робім адну справу. Таму для мяне вельмі важна, каб адбылася шчырая размова. Вы ж не толькі журналісты, вы - грамадзяне. Свядомыя, адукаваныя, інфармаваныя грамадзяне Беларусі".

"Мэта адна - каб была карысць ад гэтай размовы. Каб я пайшоў з нечым адсюль, і каб вы, пакінуўшы гэту студыю, зрабілі вывады і, магчыма, узялі для сябе нешта на ўзбраенне зыходзячы з гэтай размовы", - адзначыў Аляксандр Лукашэнка.

"Неабходнасць гэтай шчырай размовы наспела даўно. Падставай для сённяшняга мерапрыемства стаў пачатак новага этапу ў вашай дзейнасці. Далей працаваць па-старому нельга. Я не хачу сказаць, што там усё было дрэнна. Без таго дрэннага і добрага не было б новага этапу", - падкрэсліў беларускі лідар.

Тое, што мабілізуе, з'ядноўвае нас, робіць краіну яшчэ больш незалежнай, спакойнай, накіраванай у будучыню, неабходна вынесці ў народ, перакананы Прэзідэнт.

Пры гэтым ён звярнуў увагу, што з'яўляецца прыхільнікам эвалюцыйнага працэсу. "Рэвалюцыі вельмі дарагія, затратныя і з цяжкімі наступствамі. Мы ўжо вычарпалі рэсурс рэвалюцый. Нам яны ўжо не патрэбны. Трэба эвалюцыяніраваць. Але тым не менш, як гаварыў класік, мы павінны стаяць на плячах мінулых пакаленняў і ўзяць адтуль усё лепшае", - сказаў Аляксандр Лукашэнка.

Паводле слоў Прэзідэнта, сёння ўсё больш запатрабаванай становіцца якасная журналістыка з аўтарскай пазіцыяй, дакладнымі фактамі, глыбокай аналітыкай. "Абудзіць цікавасць, утрымаць чытачоў, гледачоў - гэта ваша задача. Разумна расстаўце прыярытэты і падумайце аб тэматычнай, жанравай разнастайнасці тэлеканалаў, газет, каб прыцягнуць людзей розных узростаў і настрояў", - арыентуе СМІ Кіраўнік дзяржавы.

На яго думку, дастаць моладзь з тэлефонаў і камп'ютараў і прымусіць чытаць газету ўжо наўрад ці атрымаецца. "Але ў такім выпадку ў інтэрнэце мы павінны прапанаваць ім нешта цікавае, правільнае і аб'ектыўнае", - сказаў Аляксандр Лукашэнка.

Аляксандр Лукашэнка пачаў размову з падрабязных адказаў на пытанні, якія напярэдадні сустрэчы былі агучаны на інтэрнэт-рэсурсах. А затым ужо з удзелам прысутных на сустрэчы журналістаў адбыўся жывы і зацікаўлены дыялог, абмен меркаваннямі па розных тэмах.

 Аб ролі СМІ

"Менавіта інфармацыйныя войны сталі адметнай рысай XXI стагоддзя. Сродкі масавай інфармацыі ператварылі ў зброю. І, ведаеце, гэта зброя больш магутная, чым ядзерная. Таму што малы зарад у выглядзе нейкай навіны імгненна ахоплівае ўсю планету. І па сіле знішчальнага ўздзеяння, не факт, што ядзерная зброя больш магутная", - адзначыў Кіраўнік дзяржавы.

Паводле яго слоў, у гэтых умовах галоўная задача, якую ставіць час, - гэта барацьба за розумы і душы людзей. "Калі мы не авалодаем розумамі і душамі беларусаў, мы суверэнную і незалежную краіну ў такім класічным выглядзе ніколі не пабудуем", - падкрэсліў ён.

Аляксандр Лукашэнка падкрэсліў, што Беларусь - выключна мірная краіна. "Ніякая агрэсія ніколі не будзе зыходзіць з нашай зямлі. Але і ў крыўду мы сябе не павінны даваць як у ваенных, так і ў інфармацыйных адносінах. Гарачай вайны быць не можа сёння. Усё пачынаецца з вас. На пярэдні план выходзіце вы - журналісты. Ваша задача - фарміраваць канструктыўнае грамадскае меркаванне праз своечасовую і аб'ектыўную падачу матэрыялу, шчыры і ўдумлівы дыялог з аўдыторыяй", - сказаў Прэзідэнт.



"СМІ - гэта святое. І калі дзяржава можа трымаць у руках гэтыя СМІ - фінансуючы, падтрымліваючы і іншае, асабліва электронныя, - дзяржава гэта павінна рабіць. Гэта вельмі дзяржаўная справа. А калі прыватныя, то мы павінны так дамовіцца з прыватнікам, каб ён абавязкова выконваў сваю дамоўленасць", - заявіў Аляксандр Лукашэнка.

 Аб тэлебачанні

"Вельмі прашу вас і строга патрабую: зрабіце тэлебачанне лепшым. Каб карцінка была і падача матэрыялу. Каб журналіст сказаў два сказы, але трапна. Я хачу глядзець толькі свае каналы. Я вельмі нацыяналістычны ў гэтым плане", - сказаў Кіраўнік дзяржавы.

Аляксандр Лукашэнка таксама асабліва адзначыў, што беларускія журналісты ў няпростыя гады змаглі захаваць унутраны стрыжань. "Я лічу, што ў свеце вы лепшыя. І не страцьце гэта, - адзначыў ён. - Вы маглі, разам са мной, вядома, пасеяць поўны хаос і бардак у краіне. Але вы прытрымліваліся нейкага стрыжня. Так заўсёды ў жыцці павінна быць. Старэйшыя журналісты гэта дакладна разумеюць. Вы ад яго не адышлі, не залгаліся. Я вас не падвёў да таго, каб вы прадаваліся за капейку".

Звяртаючыся да прадстаўнікоў тэлеканалаў, Кіраўнік дзяржавы заклікаў і далей удасканальваць работу ў гэтым напрамку. Пры гэтым Прэзідэнт расказаў, што глядзіць на гэту работу ў тым ліку прафесійным поглядам, грунтуючыся на асабістым вопыце. "Я гляджу шмат каналаў, параўноўваю гэта ўсё. Некалі я гаварыў, што ў студэнцкія гады захапляўся фатаграфіяй і быў нават загадчыкам фоталабараторыі ў студэнцкія часы. ", - сказаў Прэзідэнт.

"Якасць ужо лепшая. Журналісты ў нас добрыя, шчырыя. Гэта дакладна, - адзначыў беларускі лідар. - Рабіце добрае тэлебачанне. У нас ёсць аснова для гэтага. І рабіце так, каб вас людзі бачылі, цанілі і паважалі. А для гэтага ў вас адна якасць павінна быць - сумленнасць і справядлівасць. Тэлебачанне павінна быць сумленным, каб яно адлюстроўвала жыццё", - рэзюмаваў Аляксандр Лукашэнка.

На сустрэчы была агучана прапанова пабудаваць у Беларусі сучасны медыяцэнтр. Кіраўнік дзяржавы адзначыў, што такі медыяцэнтр у Беларусі з'явіцца, але не ў бліжэйшы час, паколькі цяпер у Беларусі ідзе падрыхтоўка да Еўрапейскіх гульняў. Акрамя таго, неабходна завяршыць будаўніцтва немалой колькасці сацыяльных і спартыўных аб'ектаў.

 Аб развіцці айчыннага кантэнту на тэлеканалах

Кіраўнік дзяржавы лічыць, што беларускія тэлеканалы павінны вяшчаць на ўласнай, а не замежнай платформе. "Платформы гэтыя павінны быць беларускімі. Гэта не значыць, што мы дрэнна ставімся да Эрнста, не. Ён нармальны, творчы, добры чалавек, - сказаў Аляксандр Лукашэнка. - Але гэта павінна быць наша".

У прыклад Прэзідэнт прывёў расійскія серыялы. Паводле яго слоў, многія з іх не вельмі добрай якасці, а паказваюцца на беларускіх каналах. Кіраўнік дзяржавы ўпэўнены, што тэлеканалы і рэжысёры ў Беларусі ў сілах самі здымаць добрыя тэлесерыялы і ставіць іх у эфір замест расійскіх.



Прэзідэнт паабяцаў, што беларускім каналам акажуць падтрымку ў развіцці ўласнага кантэнту. "Я гатовы там, дзе трэба, падтрымаць сродкі масавай інфармацыі", - сказаў ён.

 Аб змяненнях у закон аб СМІ

Гаворачы аб задачах, якія сёння стаяць перад сродкамі масавай інфармацыі, Кіраўнік дзяржавы адзначыў, што частка з іх адлюстравана ў новым законе аб СМІ. У прыватнасці, размова ідзе аб развіцці айчыннага кантэнту на тэлебачанні. Пры гэтым сам закон, падкрэсліў Аляксандр Лукашэнка, прызначаны "абараніць нашых людзей ад патоку неправеранай, непраўдзівай, дэструктыўнай інфармацыі".

Прэзідэнт адзначыў, што адобрыў абмеркаванне ў парламенце пытання змяненняў у закон аб сродках масавай інфармацыі з удзелам прадстаўнікоў СМІ. "Вы павінны для сябе зрабіць гэты закон. Калі ён да мяне паступіць, я хачу, каб вы былі задаволены гэтым законам. А калі і яны, якія мне задаюць гэта пытанне, - гэта для мяне шчасце. Няважна, што яны за мяне не галасавалі, але я Прэзідэнт усяго беларускага народа, і я гатовы ўлічваць усе інтарэсы", - сказаў беларускі лідар.

Ён падкрэсліў, што плануемыя змяненні неабходна абмяркоўваць. "Але галоўнае, каб усе працавалі ў роўных умовах, каб канкурыравалі. Нехта з вас выходзіць на экран і гаворыць адкрыта, сумленна. Усе бачаць, камусьці падабаецца, камусьці не... А чаму хтосьці хаваецца за нейкі кручок. Чаму ён у інтэрнэце адкрыта недзе не напіша і не паставіць свой подпіс. Чаго ты баішся?" - задаў рытарычнае пытанне Аляксандр Лукашэнка.

Прэзідэнт заклікаў усіх адкрыта выказваць сваю пазіцыю і абмяркоўваць праект змяненняў у закон. Але разам з гэтым будзе захоўвацца кантроль за тым, каб не распаўсюджвалася інфармацыя тэрарыстычнага плана, звязаная з наркотыкамі, насіллем над дзецьмі, іншымі негатыўнымі і проціпраўнымі працэсамі.

 Аб узаемадзеянні чыноўнікаў і журналістаў

"Я не ведаю, як гэта вы будзеце рабіць, але калі я пачую або ў інтэрнэце прачытаю, што чыноўнік не размаўляе з журналістам і не прадастаўляе тую інфармацыю, якую павінен, і перш за ўсё асноўным нашым журналістам і сродкам масавай інфармацыі, уносьце неадкладна прапановы аб яго замене. Таму што другі раз будзе вельмі балюча для яго", - папярэдзіў Аляксандр Лукашэнка Адміністрацыю Прэзідэнта і Міністэрства інфармацыі.

Кіраўнік дзяржавы адзначыў, што часам з-за няўмення чыноўнікаў пракаменціраваць нейкую праблемную сітуацыю гэта даводзіцца рабіць яму, каб "расхлёбваць гэты бруд". "Калі ты прыйшоў міністрам, намеснікам, кіраўніком прадпрыемства, будзь ласкавы размаўляць з журналістамі, як ні было б цяжка і складана", - падкрэсліў Аляксандр Лукашэнка. Разам з тым, паводле яго слоў, і самі журналісты павінны быць больш настойлівымі, дабіваючыся каментарыяў у чыноўнікаў.

Журналісты расказалі, што пасля рэзанансных здарэнняў падчас не могуць атрымаць своечасовыя каментарыі ад кіраўнікоў адпаведных ведамстваў. Некаторыя адказваюць - "без каментарыяў", збягаюць ад камер. Але ж атрымліваецца, што адразу пасля якога-небудзь здарэння яно пачынае абрастаць у сацыяльных сетках здагадкамі, якія часам не маюць нічога агульнага з рэчаіснасцю.



Аляксандр Лукашэнка згадзіўся, што такая сітуацыя не з'яўляецца нармальнай. "Гэта ненармальна, калі Прэзідэнт гаворыць больш за міністра па яго тэме", - заўважыў Кіраўнік дзяржавы. Ён падкрэсліў, каб грамадскасць атрымлівала аб'ектыўную і своечасовую інфармацыю, неабходна, каб сваю пазіцыю выказвалі кіраўнікі адпаведных ведамстваў.

У ходзе размовы з Прэзідэнтам адзначалася і роля прэс-службаў, якія таксама павінны хутка даводзіць да грамадскасці актуальную і важную інфармацыю.

 Аб падрыхтоўцы журналісцкіх кадраў

У час сустрэчы была закранута праблема забеспячэння кадрамі сродкаў масавай інфармацыі. У прыватнасці, журналісты Белтэлерадыёкампаніі расказалі аб трывожнай, на іх думку, тэндэнцыі дэфіцыту журналісцкіх кадраў для тэлебачання, хоць падрыхтоўка гэтых спецыялістаў вядзецца ў краіне. У сувязі з гэтым Аляксандр Лукашэнка падкрэсліў, што трэба падбіраць тых людзей, якія пасля вучобы будуць запатрабаваны ў прафесіі. Пры гэтым ён выказаў меркаванне, што прафесія журналіста - асаблівая. І вельмі важна, каб на журфак ішлі менавіта тыя, хто захоплены журналістыкай і пасля вучобы будзе працаваць у СМІ. "Калі адвучыўся, то павінен працаваць па спецыяльнасці", - упэўнены Кіраўнік дзяржавы.

Прэзідэнт паставіў задачу вырашыць праблему забеспячэння кадрамі сродкаў масавай інфармацыі. Ён таксама падтрымаў выказаную тэлежурналістамі ідэю аб папярэдняй рабоце на ўзроўні школ з тымі дзецьмі, якія хочуць звязаць сваё будучае з журналістыкай. Аляксандр Лукашэнка правёў паралель з ІТ-сектарам, дзе сталі ўдзяляць вялікую ўвагу падрыхтоўцы будучых кадраў для сваёй галіны. Пры гэтым ён падкрэсліў, што ў працэсе папярэдняга адбору важна не ўпусціць з поля зроку і таленавітую моладзь з сельскай мясцовасці.

Свой погляд на гэту праблему выказалі і прадстаўнікі іншых СМІ, кіраўніцтва Адміністрацыі Прэзідэнта, а таксама запрошаныя на мерапрыемства студэнты Інстытута журналістыкі БДУ.

 Аб Канстытуцыі

Гаворачы аб магчымых карэкціроўках Асноўнага закона краіны, Аляксандр Лукашэнка не выключыў перадачы часткі функцый ад Прэзідэнта іншым галінам улады. "Лічу, што некаторыя функцыі ад Прэзідэнта павінны перайсці да іншых галін улады", - сказаў Кіраўнік дзяржавы. Асабліва, на яго думку, трэба ўзмацніць ролю выканаўчай улады.

Пры гэтым Аляксандр Лукашэнка лічыць, што момант для змянення Канстытуцыі яшчэ не настаў. СМІ будуць не апошнімі сярод тых, хто вызначыць гэты час, дадаў ён.

Прэзідэнт выказаў перакананасць, што пры карэкціроўцы Асноўнага закона краіны важна не перакрэсліць усё тое, што ўжо зроблена, захаваць гэты здабытак, дасягненне. "Мы павінны гэта перадаць нашым дзецям і ўнукам", - адзначыў Аляксандр Лукашэнка.

 Аб працы і рыначных механізмах

Кіраўнік дзяржавы адзначыў правільнасць таго, што ў свой час Беларусь не пайшла па шляху шокавых рэформ і пераўтварэнняў. "Мне ўжо вас не трэба пераконваць у гэтым. А тады мне даводзілася гэта рабіць. Усім расказваць, што не спяшайцеся, у нас свае асаблівасці, сваё жыццё. Мы будуем сваю краіну. Не трэба бегчы за Расіяй у тым ліку па гайдараўскіх рэформах. Калі б мы па гэтай шокавай тэрапіі прайшлі, краіны сёння не было б. Без працы нічога не будзе. Ніякі рынак не выратуе", - заявіў беларускі лідар.



Аляксандр Лукашэнка падкрэсліў значнасць таго, што многія ў Беларусі сапраўды ганарацца сваёй краінай. "І мы не балбатнёй стварылі незалежную Беларусь, а рэальна. З намі лічацца!" - сказаў Прэзідэнт.

 Аб забеспячэнні бяспекі людзей

У час сустрэчы Прэзідэнт закрануў тэму забеспячэння бяспекі ў масавых месцах. Аляксандр Лукашэнка звярнуўся да нядаўняга выпадку ў Салігорску, калі з-за ўзгарання ў падвале бальніцы эвакуіравалі вялікую колькасць людзей.

Паводле слоў Кіраўніка дзяржавы, хуткая рэакцыя на ЧП звязана ў тым ліку з нядаўняй трагедыяй у ГЦ "Зімняя вішня" ў Кемераве. "Кемерава нас узварушыла, - адзначыў Аляксандр Лукашэнка. - Трыста чалавек эвакуіравалі за імгненне".

Пры гэтым Прэзідэнт нагадаў аб строгай адказнасці за парушэнні ў забеспячэнні бяспекі ў масавых месцах. Ён запатрабаваў разабрацца ў прычынах здарэння ў Салігорскай бальніцы.

 Аб стымуляванні занятасці

Як адзначыў Кіраўнік дзяржавы, праблема стымулявання занятасці ёсць не толькі ў Беларусі, але і іншых краінах. Аляксандр Лукашэнка канстатаваў, што амаль паўмільёна чалавек працаздольнага ўзросту ў Беларусі не працуюць, у іх ліку і тыя, у каго праблемы з законам. Атрымліваецца, што дзяржава поўнасцю бярэ на сябе аплату паслуг - адукацыйных, медыцынскіх, жыллёва-камунальных.

Прэзідэнт адзначыў, што асноўная сутнасць дэкрэта № 1 у тым, каб людзі працавалі і адпаведна ўносілі свой уклад у фінансаванне прадастаўляемых дзяржавай паслуг, як эта робіцца ва ўсім свеце. Галоўнае ў гэтым дакуменце - стымуляванне занятасці, падкрэсліў Аляксандр Лукашэнка.

"І гэта была мая ідэя, мне яе ніхто не падказваў", - дадаў Прэзідэнт, гаворачы аб ініцыіраванні гэтага дэкрэта, які накіраваны ў першую чаргу на актывізацыю работы органаў улады па максімальным садзейнічанні грамадзянам у працаўладкаванні, стымуляванні працоўнай занятасці і самазанятасці насельніцтва.

 Аб арміі

Прэзідэнт пракаменціраваў трагічныя выпадкі ў арміі, расказаў аб мерах, што прымаюцца ў сувязі з гэтым, а таксама закрануў пытанне мадэрнізацыі ва Узброеных Сілах.

"Я асабіста вельмі балюча ўспрымаю, калі ў арміі гінуць людзі. Гэта недапушчальна для мяне, як чалавека, які і тэрміновую службу адслужыў, і афіцэрам служыў у арміі. Для мяне гэта недапушчальна, таму што я ведаю, да чаго вядзе галавацяпства. Гэта галавацяпства, калі з БМП, буйнакалібернага кулямёта расстрэльваюць салдата на стрэльбах. Гэта нават не вучэнні", - сказаў Кіраўнік дзяржавы.



"Тое ж самае і па Коржычу. Сітуацыя на маім кантролі, і там жорстка разбіраюцца. Абавязкова разбяромся і трымаем у курсе справы маці, запрашаем на допыты, - заявіў Аляксандр Лукашэнка. - Абсалютна дэмакратычна ўсё гэта расследуецца, таму што я не дапускаю, калі ў мірны час нават у арміі гінуць людзі".

Паводле слоў Прэзідэнта, яшчэ больш дэмакратычна вырашылі падысці да пытання наведвання бацькамі ваеннаслужачых у вайсковых часцях.

Аляксандр Лукашэнка таксама выказаў меркаванне, што салдат трэба часцей адпускаць на пабыўку дамоў. "Чаму мы гэтых дзяцей не можам адпусціць у тыдзень раз ці два, як атрымаецца, калі ён заслужыў, дамоў. Гэта ж Беларусь - кампактная краіна. Сёння дзве гадзіны, і ты на месцы. Пабыў дома, вярнуўся. Пяць-сем дзён ты там служыш, і ўжо лягчэй, - лічыць Кіраўнік дзяржавы. - Не тое што цябе з сям'і вырвалі, у гэту казарму. Там 100 чалавек у гэтай казарме, у два ярусы ложкі. Абстаноўка гняце. І не ўсе вытрымліваюць. Больш мяккія - ім цяжка. А гэта была б аддушына. Больш нічога не трэба. Зусім іншая армія будзе. Заслужыў - калі ласка - дзень-два пабудзь дома. І мы гэта пачалі рабіць. Вось такія змяненні адбываюцца".

Разам з гэтым Кіраўнік дзяржавы падкрэсліў, што армія - гэта жорсткі мужчынскі калектыў, дзе ў тым ліку загартоўваецца характар.

"Што датычыцца мадэрнізацыі, змянення войска ў нашай арміі, я чатыры разы ініцыіраваў рэфармаванне арміі. І мы чацвёртую рэформу праводзім. Зроблена стаўка на мабільныя сілы", - сказаў ён.

 Аб спорце

Аляксандр Лукашэнка нагадаў, што хутка адбудзецца вялікая нарада аб развіцці зімовых відаў спорту. Яна праводзіцца не таму, што ў гэтай сферы больш праблем, чым у летніх відах спорту. "Справа ў тым, што прайшла Алімпіяда і ў зімовых відах спорту пачынаецца новы цыкл. І гэта цяпер актуальна, важна. Гэта мы яшчэ не забылі: і перамогі, і недахопы, якія ёсць. У гэты момант трэба правесці такое мерапрыемства па зімовых відах спорту, пагаварыць, як будзем жыць далей, ці будзем мы наогул зімовай краінай і ці будзем развіваць гэтыя віды. Я лічу, што мы павінны захаваць Беларусь як зімовую краіну", - сказаў Аляксандр Лукашэнка.

Для гэтага прымаюцца ўжо адпаведныя рашэнні, адзначыў Кіраўнік дзяржавы. Напрыклад, пачалі праектаваць ужо новыя спартыўныя аб'екты, наладжваюць вытворчасць неабходнага інвентару. "Цяпер кожная федэрацыя разбіраецца ў сябе, як будзем жыць. Напрамкі я ім указаў", - дадаў беларускі лідар.



Прэзідэнт канстатаваў, што і ў летніх відах спорту ёсць некаторыя вынікі. Напрыклад, пэўныя поспехі, няхай і нягучныя, робяць беларускія гандбалісты і валейбалісты. "Трэба планаваць, каб мы правялі, хутчэй, у гэтым годзе, нараду па летніх відах спорту з улікам II Еўрапейскіх гульняў. Каб я мог пачуць кіраўнікоў наглядальных саветаў і федэрацый, што яны нам пакажуць", - адзначыў Аляксандр Лукашэнка.

Паводле яго слоў, важна і трэба праводзіць масавыя спартыўныя мерапрыемствы, такія як Мінскі паўмарафон, але неабходны вынікі і ў вялікім спорце. У яго ўкладваюцца вялікія грошы, а перамогі атлетаў узнімаюць дух беларусаў. "На гэтым будуецца ўся ідэалогія", - падкрэсліў Кіраўнік дзяржавы.

 Аб БНР

Кіраўнік дзяржавы адзначыў, што як гісторык па адукацыі звяртаўся да гэтай тэмы, вывучаў існуючыя меркаванні і прыйшоў да высновы, што беларусам яшчэ трэба зразумець, чым была БНР і якую ролю яна адыграла.

На думку Аляксандра Лукашэнкі, у гэтай частцы беларускай гісторыі не ўсё відавочна. З аднаго боку, стваральнікі БНР хацелі адзінства для краіны, з іншага - звярталіся па дапамогу да нямецкага кайзера. Адказваючы на пытанне, якое паступіла ад інтэрнэт-карыстальнікаў, Прэзідэнт сказаў, што размовы аб тым, каб зрабіць 25 сакавіка дзяржаўным святам, - дачасныя. Аляксандр Лукашэнка падкрэсліў, што пакуль ён знаходзіцца на пасадзе Прэзідэнта, гэтага не будзе.

Кіраўнік дзяржавы нагадаў, што ў Беларусі ўжо ёсць Дзень Незалежнасці. "У нас ёсць Дзень Незалежнасці, і калі б мы тады не перамаглі, то сапраўды ніякай незалежнасці не было б, - сказаў Прэзідэнт. - Нас бы працэнтаў 75 выразалі, а 25% пакінулі быдлам. Вось гэта мы дакладна ведаем, а многія помняць. Таму мы выбралі, гэта нам бліжэй, мы гэта разумеем, адчуваем, - выбралі гэты дзень Днём Незалежнасці".

 Аб стварэнні мемарыяла ў Курапатах

Пытанне аб Курапатах у адрас Кіраўніка дзяржавы паступіла ад грамадзян напярэдадні мерапрыемства. Аляксандр Лукашэнка адзначыў, што год ці паўтара таму даручыў сваёй Адміністрацыі разабрацца з гэтым пытаннем.

"Пара заканчваць гэту валтузню на касцях. Вы зацягнулі прадстаўленне Прэзідэнту макета гэтага ўрочышча. Пакладзіце мне на стол дакументы, каб я мог зацвердзіць і мы стварылі там месца для душы. Трэба аператыўней  скончыць гэта, прывесці ў парадак гэты лес, урочышча, паставіць самы просты помнік, або капліцу, або яшчэ нешта - мы прымем рашэнне. Каб чалавек, які спачувае сем'ям і пакутуе, што загінулі людзі, прыйшоў туды, прынёс кветкі", - сказаў Аляксандр Лукашэнка.

"І мы гэта абавязкова зробім", - падкрэсліў Кіраўнік дзяржавы.

Пры гэтым Прэзідэнт заўважыў, што пытанне аб Курапатах было палітызавана з самага пачатку свайго з'яўлення, такім засталося і цяпер. "Мяне гэта не задавольвала і цяпер не задавольвае, - заявіў Аляксандр Лукашэнка. - Там загінулі людзі".

Ён канстатаваў, што ёсць некалькі версій аб трагічных падзеях, што здарыліся ў гэтым месцы. Паводле адной з іх, у Курапатах савецкія ўлады расстрэльвалі рэпрэсіраваных беларусаў, паводле іншай - там учынялі расправы над грамадзянамі немцы ў час Вялікай Айчыннай вайны. І сёння, паводле слоў Аляксандра Лукашэнкі, ужо не так важна, хто быў віноўнікам той трагедыі, паколькі вынік адзін - загінулі людзі. "Людзі, якія там, хочуць спакою. Ім не патрэбны гэтыя скокі на касцях", - упэўнены беларускі лідар.

 Аб прыватнай уласнасці і сістэмных змяненнях

Прэзідэнт адзначыў, што часта можна чуць пытанні або разважанні аб нейкіх сістэмных змяненнях. "У нас няма вось гэтай эйфарыі наконт прыватнай уласнасці. Вы хочаце, каб за адну ноч была прыватная ўласнасць замест дзяржаўнай? Гэта сістэмныя змяненні. Але нідзе не напісалі канкрэтна, што за сістэмныя змяненні. Таму што гэта будзе прадугледжваць тое, што народ ніколі не падтрымае. Да гэтага трэба ісці спакойна", - сказаў Кіраўнік дзяржавы.

"Калісьці мяне папракалі, што я не рыначнік і не прыхільнік прыватнай уласнасці. Бог з вамі. Я ўвесь час у матэрыяльнай вытворчасці працаваў і жыў сярод сялян. Я ведаў, што такое сваё. Сваё заўсёды больш эфектыўнае, чым калгаснае, і гэтак далей", - заявіў Прэзідэнт.

"Мне гавораць: тое змяніць, гэта... Я публічна сказаў - пытанне не ўва мне. Калі вы хочаце, я прыму рашэнне за дзень. А вы гэтага хочаце? Добра, хочаце. А вы да гэтага гатовы, вы гэта можаце ажыццявіць, вы гэта вытрымаеце ці не?" - паставіў пытанне беларускі лідар.

"Жыццё паказала, што і да прыватнай уласнасці, да змянення нашай сістэмы мадэрнізацыі трэба падыходзіць эвалюцыйна. Ніякіх рэвалюцый. Таму што гэта балюча і не факт, што мы трапім у кропку", - дадаў Кіраўнік дзяржавы.

 Аб піяры і самаіроніі

Паводле слоў Кіраўніка дзяржавы, піяру павінна быць у меру. "Па вялікім рахунку, я не прыхільнік піяру. Піяр - гэта перабольшана, накшталт няпраўды. Лепш праўду скажы, як ёсць. Або маўчы наогул. Таму ў маёй рабоце піяру амаль няма", - адзначыў Аляксадр Лукашэнка.

Прэзідэнт разам з тым лічыць, што піяр - гэта нармальна. "Толькі ён павінен быць нейкі жыццёвы, шчыры, рэальны. Піярыцца трэба на рэальным. Каб там менш было перабольшанняў і хлусні", - сказаў ён.

Аляксандр Лукашэнка таксама выказаў сваё стаўленне да іроніі і самаіроніі. На яго думку, гэта дапушчальна ў невялікай кампаніі. Паводле слоў Прэзідэнта, часам у яго прысутнасці расказваюць і анекдоты пра яго самога. "Расказваюць. І я пасмяюся. Калі гэта самаіронія або іронія ў вузкім коле, тады так", - дадаў ён.

Кіраўнік дзяржавы прызнаўся, што ў першыя гады прэзідэнцтва вельмі моцна звяртаў увагу на тую ці іншую інфармацыю ў СМІ пра сябе, асабліва негатыўнага плана. "Па маладосці я рэагаваў на кожны чых, - успамінае ён. - Мне абавязкова трэба было апраўдацца".



Аднак з часам Аляксандр Лукашэнка навучыўся больш спакойна і ўзважана рэагаваць на такое. "Самаіронія - гэта накшталт самаедства. Хоць я ад гэтай рысы не пазбавіўся. Недзе нешта сказаў, некага недзе пакрыўдзіў або кагосьці з пасады зняў - гэта перажыць вельмі цяжка. Таму я самаедствам займаюся. Самаіроніяй... Ну, у мяне не такое жыццё, каб часта іранізаваць з сябе. Наўрад ці гэта самаіронія. А іронія - нармальна, калі яна разумная", - адзначыў Прэзідэнт.

 Аб беларускай прадукцыі і правільным харчаванні

Адказваючы на пытанні ад грамадзян, Прэзідэнт расказаў, як выбірае прадукты і якой прытрымліваецца дыеты. "Тры яйкі раніцай, у абед - мяса, вечарам - рыба, колькі хочаш. Строгая дыета, бялковая", - адзначыў Аляксандр Лукашэнка.

Паміж асноўнымі прыёмамі стравы ў Кіраўніка дзяржавы ёсць і невялікія перакусы. У той жа час, звярнуў увагу Прэзідэнт, разам з правільным харчаваннем важна займацца спортам - каля дзвюх гадзін у дзень.

Што датычыцца саміх прадуктаў, Аляксандр Лукашэнка адзначыў, што харчуецца тымі ж, што і ўсе беларусы. "Я ем тое, што ясце і вы, толькі ў зусім малой колькасці", - сказаў Кіраўнік дзяржавы.

Пры гэтым Прэзідэнт любіць параўноўваць, як адзін і той жа прадукт вырабляюць на розных прадпрыемствах краіны. Купляе ён прадукты ў звычайных магазінах, часам і на Камароўскім рынку. "Шчаслівы, што ў нас у Беларусі абсалютна бяспечнае харчаванне", - заявіў ён.

Аляксандр Лукашэнка падкрэсліў, што бяспека беларускага харчавання - гэта яго самае жорсткае патрабаванне. Высокая яго якасць пацвярджае і тое, што прадукты харчавання купляюць далёка за межамі краіны, у тым ліку ў Кітаі і краінах Еўрасаюза.

 Аб любімых фатаграфіях

"Ёсць у мяне некалькі фатаграфій. Адна з фатаграфій, яна чорна-белая, - калі я толькі стаў Прэзідэнтам. У клятчастым пінжаку, мікрафоны, Прэзідэнт, які ўсміхаецца. Гэта ў мяне на Карла Маркса ў пакоі адпачынку. Я яе захаваў, паставіў у старонцы. Мне яна вельмі падабаецца і каштоўна. Паколькі гэта пасля першых прэзідэнцкіх выбараў, пасля перамогі з журналістамі размова. Потым мне падабаецца фатаграфія з малышом, калі я яго вучыў у хакей гуляць. Дзе мы ўдваіх стаім. Ён маленькі такі з клюшкай", - расказаў Кіраўнік дзяржавы.

Паводле яго слоў, і асабістых, і дзяржаўных фатаграфій у яго дастаткова. "У рэшце рэшт, калі гэта цікавіць нашых чытачоў, мы можам 7-10 такіх фатаграфій апублікаваць", - заўважыў Аляксандр Лукашэнка.


Тэгі: Сустрэчы
© 2018, Прэс-служба Прэзідэнта Рэспублікі Беларусь