Сустрэча з кіраўнікамі дэлегацый - удзельніц пасяджэння Савета міністраў замежных спраў СНД

Правядзенне ў Мінску СМЗС СНД з'яўляецца знакам павагі да Беларусі і сведчыць аб прызнанні актыўнай праінтэграцыйнай ролі краіны. Аб гэтым Кіраўнік дзяржавы Аляксандр Лукашэнка заявіў 6 красавіка на сустрэчы з кіраўнікамі дэлегацый, якія ўдзельнічаюць у пасяджэнні Савета міністраў замежных спраў СНД.

Сустрэча з кіраўнікамі дэлегацый пачалася з урачыстага мерапрыемства - Прэзідэнт Беларусі ўручыў Старшыні Выканаўчага камітэта - Выканаўчаму сакратару СНД Сяргею Лебедзеву ордэн Пашаны. "У кожнай справе ёсць людзі, якія сваёй энергіяй і зараджанасцю на поспех матывуюць астатніх на дасягненне высокіх вынікаў. Без сумнення, адным з такіх з'яўляецца Сяргей Мікалаевіч Лебедзеў", - сказаў Аляксандр Лукашэнка.

Кіраўнік дзяржавы дадаў, што дзейнасць Сяргея Лебедзева на пасадзе Старшыні Выканкама - Выканаўчага сакратара Садружнасці - яркае сведчанне прыхільнасці да ўмацавання міждзяржаўных сувязей, захавання і прымнажэння патэнцыялу СНД.

Прэзідэнт Беларусі на сустрэчы выклаў пазіцыю і прапановы беларускага боку адносна шэрага пытанняў сусветнага парадку дня, сітуацыі і супрацоўніцтва на прасторы СНД.

"Міжнародная абстаноўка сёння літаральна перанасычана напружанасцю. Найбольш небяспечная тэндэнцыя на еўраатлантычнай прасторы - ідзе расхістванне сістэмы проціваг, якая раней стрымлівала дзяржавы і блокі, што сапернічаюць. Знаходзячыся на своеасаблівым геапалітычным разломе, Беларусь усведамляе ўшчэрбнасць раскручвання спіралі канфрантацыі ў Еўрапейскім рэгіёне. Мы фактычна на парозе новай гонкі ўзбраенняў. Эксперты сцвярджаюць, што халодная вайна ўжо ідзе", - падкрэсліў беларускі лідар.

Ён канстатаваў, што спробы выпрацаваць новую парадыгму светаўладкавання адбываюцца не за сталом перагавораў, а ў гарачых кропках. І бліжэйшая з іх - Данбас. "Шырокамаштабныя баявыя дзеянні дзякуючы мінскім пагадненням там спынены, але людзі, на жаль, прадаўжаюць гінуць. Яшчэ раз пацвярджаю - мы гатовы зрабіць усё, каб на Данбасе быў мір. На прынцыпах захавання ўсіх міжнародна-прававых фармальнасцей і пры згодзе канфліктуючых бакоў", - сказаў Прэзідэнт.

Аляксандр Лукашэнка нагадаў, што ў ходзе 26-й сесіі Парламенцкай асамблеі АБСЕ беларускі бок прапанаваў пачаць дыскусію аб запуску перагаворнага працэсу, накіраванага на пераадоленне існуючых супярэчнасцей і фарміраванне новых канструктыўных адносін у рэгіёне АБСЕ. "Трэба выпрацаваць прымальныя для ўсіх прынцыпы супрацоўніцтва ў Еўропе. Важную ролю мог бы адыграць экспертны дыялог з удзелам аналітычных цэнтраў, урадавых і прыватных структур па пытаннях вызначэння агульных мэт, арыентаваных на ўмацаванне даверу паміж краінамі як мінімум у палітычнай і ваеннай сферах", - заявіў Кіраўнік дзяржавы.

Паводле яго слоў, добрай магчымасцю для пачатку такой дыскусіі з'яўляецца запланаваная на май 2018 года ў Мінску міжнародная экспертная канферэнцыя "Усходняя Еўропа: у пошуках бяспекі для ўсіх".

Таксама ў 2018 годзе ў Беларусі пройдуць антытэрарыстычная канферэнцыя АБСЕ "Прадухіленне і барацьба з тэрарызмам у лічбавую эпоху" і сустрэча Асноўнай групы Мюнхенскай канферэнцыі па бяспецы.

Кіраўнік дзяржавы запрасіў усіх партнёраў прыняць удзел у гэтых мерапрыемствах на самым высокім узроўні.

Што датычыцца сітуацыі ўнутры СНД, Аляксандр Лукашэнка павіншаваў Расійскую Федэрацыю з дастойна праведзенымі прэзідэнцкімі выбарамі. "Расіяне прагаласавалі за дынамічнае эканамічнае і сацыяльнае развіццё краіны. Разлічваем на захаванне лідзіруючай пазіцыі Расіі ў дзейнасці нашай Садружнасці", - сказаў Кіраўнік дзяржавы.

Ён таксама адзначыў, што праз некалькі дзён - 11 красавіка - адбудуцца прэзідэнцкія выбары ў дружалюбным Азербайджане. "Перакананы, што азербайджанскі народ, як і расійскі народ, зробіць правільны выбар на карысць умацавання і працвітання сваёй дзяржавы. Мы верым у далейшае развіццё адносін з гэтай дружалюбнай краінай як у двухбаковым, так і шматбаковым фармаце", - заявіў беларускі лідар.

Прэзідэнт закрануў пытанне аб ролі місій наглядальнікаў ад СНД. "Беларусь заўсёды выступала за аб'ектыўнасць у ацэнцы выбарчых працэсаў і ўказвала на высокую палітызацыю работы еўрапейскіх калег. Назіранне за выбарамі па лініі Садружнасці дае магчымасць фарміраваць альтэрнатыўнае меркаванне, змагацца з манаполіяй заходніх экспертаў, якія заўсёды выносяць свае меркаванні яшчэ да галасавання", - заявіў Аляксандр Лукашэнка.

"Таму мы бачым станоўчую ролю місій наглядальнікаў ад Садружнасці і падтрымліваем іх актыўную дзейнасць. Дарэчы, гэта адзін з важнейшых неаспрэчных напрамкаў дзейнасці СНД, карысных для ўсіх", - дадаў Кіраўнік дзяржавы.

Ён адзначыў, што ў 2018 годзе ў Садружнасці старшынствуе Таджыкістан і Беларусь падзяляе задачы прадстаўленай праграмы старшынства і забяспечыць свой паўнацэнны ўдзел у яе рэалізацыі. "Спадзяюся, гэты год азнамянуецца пазітыўнымі рэзананснымі ініцыятывамі, якія ў бліжэйшы час будуць ажыццёўлены. Усё часцей прыярытэтам нашага супрацоўніцтва становіцца сфера барацьбы з міжнародным тэрарызмам і экстрэмізмам", - сказаў Аляксандр Лукашэнка.

Прэзідэнт нагадаў, што пяць гадоў таму ў ходзе старшынства Беларусі ў СНД сумесна з Выканкамам СНД, ААН і АБСЕ была арганізавана рэгіянальная сустрэча па выкананні рэзалюцыі Савета Бяспекі ААН аб прадухіленні распаўсюджвання зброі масавага знішчэння. "У гэтым годзе Беларусь мае намер правесці аналагічнае мерапрыемства, арыентаванае на паглыбленне каардынацыі паміж СНД і іншымі міжнароднымі структурамі па пытаннях процідзеяння траплянню такой зброі ў рукі тэрарыстаў", - заявіў беларускі лідар.

Аляксандр Лукашэнка лічыць, што ў СНД павінна быць забяспечана рэальнае супрацоўніцтва сілавых ведамстваў. Міністэрствам абароны неабходна вырашыць задачу па стварэнні да 2025 года аб'яднанай сістэмы паветрана-касмічнай абароны дзяржаў - удзельніц СНД, а Міністэрствам унутраных спраў - завяршыць распрацоўку і пачаць выкананне Міждзяржаўнай праграмы сумесных мер барацьбы са злачыннасцю на 2019-2023 гады.

"Пры гэтым асаблівую ўвагу трэба ўдзяліць трансгранічнай злачыннасці", - падкрэсліў Кіраўнік дзяржавы.

У сваю чаргу з боку Антытэрарыстычнага цэнтра СНД патрабуецца рэалізацыя комплекснага падыходу да процідзеяння тэрарызму і экстрэмізму з выкарыстаннем усяго арсенала мер.

"Да пытання барацьбы з фінансаваннем тэрарыстычнай актыўнасці неабходна падключыцца фінансавым разведкам краін Садружнасці. А завяршальным звяном гэтай работы павінна стаць супрацоўніцтва дыпламатаў нашых дзяржаў для фарміравання пад эгідай ААН глабальнай стратэгіі процістаяння новым выклікам і пагрозам, заснаванай на міжнародным праве", - рэзюмаваў беларускі лідар.

У сваю чаргу Старшыня Выканаўчага камітэта - Выканаўчы сакратар СНД Сяргей Лебедзеў звярнуў увагу на тое, што пасяджэнне праводзіцца ў нефармальнай сталіцы СНД, дзе знаходзіцца штаб-кватэра арганізацыі. "Мы атрымліваем вельмі актыўную падтрымку нашай дзейнасці з боку кіраўніцтва Беларусі і асабіста Прэзідэнта", - падкрэсліў ён.

Сяргей Лебедзеў пры ўзнагароджанні ордэнам Пашаны адзначыў, што вырас у брацкай сям'і народаў СССР і помніць тую атмасферу дружбы і ўзаемаразумення. "Таму для мяне работа з мэтай захавання дружбы і супрацоўніцтва паміж нашымі народамі - гэта святая справа. Запэўніваю, што я, колькі мне дазволіць лёс, буду нястомна працаваць над гэтым", - сказаў Старшыня Выканаўчага камітэта - Выканаўчы сакратар СНД.