Бел
Галоўная   /  Падзеі

Сустрэча з Генеральным сакратаром АДКБ Станіславам Засем

5 сакавіка 2020 года
Сустрэча з Генеральным сакратаром АДКБ Станіславам Засем
глядзіце таксама: відэа
5 сакавіка 2020 года
Сустрэча з Генеральным сакратаром АДКБ Станіславам Засем

Беларусь застанецца прыхільнай да інтэграцыйных працэсаў, але пры дакладным прытрымліванні сваіх інтарэсаў. Аб гэтым Прэзідэнт Беларусі Аляксандр Лукашэнка заявіў 5 сакавіка на сустрэчы з Генеральным сакратаром Арганізацыі Дагавора аб калектыўнай бяспецы Станіславам Засем.

"Калі выпаў такі лёс для Беларусі ў гэтым годзе ўзначальваць усе інтэграцыйныя органы, мы будзем рабіць гэта дастойна, - падкрэсліў Аляксандр Лукашэнка. - Мы будзем, як і раней, прыхільныя да інтэграцыйных працэсаў, у тым ліку і ў ваеннай сферы, але пры гэтым будзе дакладна прытрымлівацца нашых інтарэсаў. На гэту суперпрагматычную пазіцыю, ты ведаеш, хто падштурхоўвае рэспублікі, якія знаходзяцца вакол гэтага інтэгратара".

Прэзідэнт падкрэсліў, што інтарэсы Беларусі павінны захоўвацца ва ўсіх інтэграцыйных аб'яднаннях, у тым ліку ў рамках АДКБ. Пакуль, паводле слоў Кіраўніка дзяржавы, яны абсалютна супадаюць з інтарэсамі суседніх краін і асабліва членаў арганізацыі. "Яны супадаюць з інтарэсамі і Расіі, і іншых членаў АДКБ. Ды і не вельмі супярэчаць інтарэсам Украіны - нашай галоўнай паўднёвай суседкі. Прынамсі, мы рабілі і будзем рабіць усё для таго, каб ва Украіне было мірна і спакойна, - сказаў Аляксандр Лукашэнка. - Гэта наша пазіцыя, якая ідзе зноў жа ад менталітэту беларускага народа. Мы яе будзем прытрымлівацца".

У бягучым годзе Расія прыме саміт АДКБ. У сувязі з гэтым Прэзідэнт пацікавіўся парадкам дня форуму, як ідзе работа па пашырэнні прапаноў ад Беларусі па развіцці арганізацыі. Краіна, у прыватнасці, выступае за ўмацаванне міжнароднага аўтарытэту АДКБ, пашырэнне яе ўзаемадзеяння з іншымі пляцоўкамі. Гэтаму ў тым ліку можа паслужыць рэалізацыя прынятага па ініцыятыве Беларусі рашэння аб юрыдычным афармленні статусу партнёра арганізацыі, а таксама наглядальніка пры АДКБ. "Як разглядаюцца гэтыя пытанні? Хацелася б, каб мы іх вырашылі на чарговым саміце", - сказаў беларускі лідар.

Кіраўнік дзяржавы таксама спытаў у Станіслава Зася, як будуецца работа ў сакратарыяце арганізацыі. "Калі патрэбны нейкія кадравыя зрухі, скажы, і я буду ініцыятарам на чарговым пасяджэнні. Перагаворым па гэтым пытанні з Уладзімірам Уладзіміравічам (Пуціным. - Заўвага), іншымі прэзідэнтамі, каб мець поўную яснасць. Калі сакратарыят будзе працаваць, як раней, так будзе працаваць і Арганізацыя Дагавора аб калектыўнай бяспецы. А расслабляцца сёння нам не дазваляе ні абстаноўка, ні час", - адзначыў Аляксандр Лукашэнка.

Станіслаў Зась, перш чым расказаць аб рабоце АДКБ, падзяліўся ўражаннямі ад сваёй першай камандзіроўкі ў родную Беларусь. Ён адзначыў, што бываць на радзіме ў якасці госця яму вельмі непрывычна. "Кажу шчыра: цягне ў Мінск. Яшчэ не звыкся з гэтымі рэаліямі", - прызнаўся Генеральны сакратар.


Тэгі: Сустрэчы
© 2020, Прэс-служба Прэзідэнта Рэспублікі Беларусь