Сустрэча са старшынёй Савета па развіцці прадпрымальніцтва Аляксандрам Турчыным

Прэзідэнт Беларусі Аляксандр Лукашэнка 27 сакавіка правёў сустрэчу са старшынёй Савета па развіцці прадпрымальніцтва, кіраўніком Апарату Савета Міністраў Аляксандрам Турчыным.

Кіраўнік дзяржавы пацікавіўся працэсамі, што адбываюцца ў прадпрымальніцкім асяроддзі, і работай абноўленага савета. "У сувязі з гэтым я хацеў бы ведаць, калі мы правядзём на ўзроўні Прэзідэнта пасяджэнне гэтага савета. Калі вы будзеце гатовы, каб ён не быў падобны да ранейшага савета, калі яны прыходзілі і пачыналі расказваць, як яны працуюць у сябе на канкрэтным прадпрыемстве і якія ў іх праблемы, і часам папросяць нешта. Мне хацелася б ведаць, як у цэлым ідуць справы і што ў цэлым трэба для прадпрымальніцкага асяроддзя", - сказаў Прэзідэнт.

Аляксандр Лукашэнка таксама закрануў пытанне ўдасканалення падатковай сістэмы, выступіўшы за збалансаваны падыход, які ўлічвае як інтарэсы бізнесу, так і дзяржавы. "У нас павінна быць падатковая сістэма сапраўды няцяжкая. Але дзяржава павінна функцыянаваць. І другое, што абсалютна правільна і дакладна, нас крытыкуюць часам за гэта, нам патрэбны Падатковы кодэкс зручны, просты, каб людзі разумелі яго. Але, рэфармуючы яго, каб мы ні ў той, ні ў іншы бок крэн не зрабілі. Гэта значыць не зрабілі нашу падатковую сістэму празмернай, каб яна не націскала на прадпрымальніцтва. І, з іншага боку, каб мы (гэта яшчэ больш небяспечна) не агалілі дзяржаву. Нельга агаліць асноўныя напрамкі дзейнасці дзяржавы. А гэта - падаткі, грошы", - заявіў Кіраўнік дзяржавы.

Акрамя таго, на сустрэчы абмяркоўваліся перспектывы стварэння міністэрства лічбавай эканомікі. "Хачу з вамі параіцца наконт лічбавай эканомікі і так званага лічбавага міністэрства. Гэта прадпрымальнікі ўнеслі прапанову. Вы як на гэта глядзіце, трэба нам ствараць новае міністэрства лічбавай эканомікі? - спытаў Прэзідэнт. - Хоць яны і прапанавалі фінансаваць яго поўнасцю. Нават больш, чым трэба. Ці ж нам нейкую рэформу правесці, і міністэрствы, якія ў перспектыве наогул будуць працаваць на лічбу, неяк аб'яднаць, стварыць моцнае міністэрства - міністэрства будучага, перспектыўнае міністэрства".

Па выніках абмеркавання Прэзідэнт Беларусі падтрымаў ідэю аб стварэнні новага міністэрства і даручыў Ураду ўнесці адпаведную канкрэтную прапанову па гэтым пытанні - на базе чаго ствараць, якімі функцыямі будзе надзелена ведамства.

Кіраўнік дзяржавы таксама падтрымаў яшчэ шэраг прапаноў, што паступілі з прадпрымальніцкай сферы. Найбольш важная з іх - больш актыўна падключаць прадстаўнікоў бізнесу ў складзе грамадска-кансультатыўных саветаў, якія працуюць пры міністэрствах, да працэсу распрацоўкі нарматыўна-прававых актаў.