Бел
Галоўная   /  Падзеі

Сустрэча са Старшынёй Камітэта па кантролі і кіраванні дзяржаўнай маёмасцю пры Дзяржсавеце КНР Сяа Яцынам

1 жніўня 2017 года

Беларусь і Кітай выйшлі на беспрэцэдэнтна высокі ўзровень партнёрства. Аб гэтым Прэзідэнт Беларусі Аляксандр Лукашэнка заявіў 1 жніўня на сустрэчы са Старшынёй Камітэта па кантролі і кіраванні дзяржаўнай маёмасцю пры Дзяржаўным савеце КНР Сяа Яцынам.

"Бягучы 2017 год - асаблівы для нашых двухбаковых сувязей. Беларусь і Кітай адзначаюць 25-годдзе ўстанаўлення дыпламатычных адносін. Да гэтай даты мы падышлі з высокай інтэнсіўнасцю кантактаў, сумесных мерапрыемстваў, выйшлі на беспрэцэдэнтна высокі ўзровень партнёрства паміж Мінскам і Пекінам", - сказаў Кіраўнік дзяржавы.

Паводле слоў Аляксандра Лукашэнкі, усе гэтыя 25 гадоў супрацоўніцтва паміж Беларуссю і Кітаем развівалася на яго вачах і пры непасрэдным удзеле. "Я ніколі не мог падумаць 25 гадоў таму, што мы зможам мець такія адносіны з Кітайскай Народнай Рэспублікай. Я рады, што ў нас выбудаваліся такія адносіны з Вялікім Кітаем", - заявіў беларускі лідар.

"Жалезныя браты" і "ўсепагодная дружба" - гэта ёмістыя паняцці, тэрміны, якія ўвайшлі ў лексікон нашых узаемаадносін", - падкрэсліў Кіраўнік дзяржавы.

Аляксандр Лукашэнка адзначыў, што Кітай з'яўляецца стратэгічным партнёрам Беларусі. Аснова супрацоўніцтва дзвюх краін - дружба і ўзаемаразуменне, падтрымка на двухбаковых і шматбаковых пляцоўках.

Прэзідэнт нагадаў, што на сустрэчы ў маі гэтага года са Старшынёй КНР Сі Цзіньпінам бакі яшчэ раз пацвердзілі статус Беларусі як важнейшага партнёра ў рэалізацыі ініцыятывы "Адзін пояс і адзін шлях". "Сёння надыходзіць актыўная фаза выканання нашых дамоўленасцей. Прыклад гэтага - ваш візіт разам з прадстаўнікамі буйнейшых кітайскіх карпарацый, якія з'яўляюцца гордасцю і моцай кітайскай эканамічнай мадэлі, - сказаў беларускі лідар. - У вас намечаны прадметныя і змястоўныя сустрэчы і мерапрыемствы. Асаблівая ўвага на іх будзе ўдзелена важнейшаму аспекту - умацаванню эканамічных сувязей, вызначэнню партнёраў і праектаў для рэалізацыі ў нашай краіне".

Кіраўнік дзяржавы выказаў пажаданне, каб інтэнсіўныя і развітыя палітычныя ўзаемаадносіны паміж Беларуссю і Кітаем стаялі на фундаменце моцных гандлёва-эканамічных адносін. "Калі гэта будзе, тады ўжо нашу дружбу не разбурыць ніхто", - упэўнены беларускі лідар.

Ён адзначыў, што сумесныя з кітайскімі кампаніямі праекты набіраюць абароты. Яркі прыклад таго - будаўніцтва Кітайска-беларускага індустрыяльнага парка "Вялікі камень". "Я вельмі хацеў бы (ведаю, такое ж меркаванне і ў Старшыні Сі Цзіньпіна), каб "Вялікі камень" стаў узорам сумеснага супрацоўніцтва, каб кітайскія карпарацыі вельмі актыўна прымалі ўдзел у рэалізацыі гэтай задумы", - сказаў Кіраўнік дзяржавы.

На тэрыторыі парка "Вялікі камень" створаны адны з самых лепшых у свеце прававых умоў вядзення бізнесу, падкрэсліў ён.

Аляксандр Лукашэнка адзначыў, што парк становіцца міжнародным, шырокі інтарэс да яго праяўляецца з боку беларускіх, еўрапейскіх, амерыканскіх і расійскіх кампаній. Прэзідэнт прывёў у якасці прыкладу глабальнага еўрапейскага аператара "Дуйспорт", які гатовы ўдзельнічаць у кіраванні паркам і прымяняць там свой вопыт.

На сустрэчы прысутнічалі прадстаўнікі шэрага буйных кітайскіх карпарацый, большасць з якіх - акцыянеры і рэзідэнты парка. "Іх прыклад дэманструе на практыцы ўзаемную выгаду і патэнцыял супрацоўніцтва ў інвестыцыйнай сферы", - сказаў Прэзідэнт.

Паводле яго слоў, у бліжэйшы час неабходна ўзмацніць узаемадзеянне па многіх напрамках. У іх ліку прамое інвесціраванне ў парк, будаўніцтва новых высокатэхналагічных прадпрыемстваў, прадпрыемстваў заўтрашняга дня. "Вы самі разумееце, калі мы пабудуем прадпрыемствы нават не ўчарашняга, а сённяшняга дня, то прадукцыю гэтых прадпрыемстваў мы не зможам рэалізаваць на рынках Еўрапейскага саюза і далей. Нам патрэбны высокатэхналагічныя прадпрыемствы, прадукцыю якіх мы маглі б прадаваць у любым кутку планеты", - адзначыў беларускі лідар.

Ён падкрэсліў, што маштаб агульнага праекта і яго велізарныя магчымасці дазваляюць разлічваць на больш важкую прысутнасць у парку кітайскіх дзяржкарпарацый. "Я ўпэўнены, калі такі працэс пойдзе, то парк атрымае сур'ёзнае новае дыханне, новыя магчымасці", - сказаў Аляксандр Лукашэнка.

Яшчэ адзін напрамак - фарміраванне двухбаковых праектаў, зліццё кампаній і спалучэнне іх патэнцыялаў. "Мы гатовы да гэтага", - запэўніў Кіраўнік дзяржавы.

У якасці аднаго з напрамкаў для развіцця ўзаемадзеяння Прэзідэнт назваў сумеснае з дзяржаўнымі карпарацыямі ўмацаванне ваенна-тэхнічнага супрацоўніцтва. "Цалкам магчыма і нядрэнна было б стварэнне ў парку высокатэхналагічных прадпрыемстваў сістэмы ваенна-прамысловага комплексу. Можна сумесных, можна кітайскіх. І трэба, каб кітайскія карпарацыі ВПК прыйшлі ў гэты парк", - заявіў Прэзідэнт.

Аляксандр Лукашэнка таксама адзначыў важнасць сур'ёзна звярнуць увагу на развіццё турыстычнага патэнцыялу Беларусі і КНР.

"Хачу асабліва падкрэсліць, што ваш візіт у Беларусь з'яўляецца пацвярджэннем канкрэтных і мэтанакіраваных крокаў у сумесным развіцці і стварэнні "супольнасці адзінага лёсу" Беларусі і Кітая. Упэўнены, што вынікі візіту ўжо ў бліжэйшы час прынясуць адчувальныя рэзультаты, - падкрэсліў беларускі лідар. - Фундамент, які мы будуем для будучых пакаленняў, будзем умацоўваць сумеснымі прадпрыемствамі, сумесным бізнесам і стварэннем неабходных умоў для прыходу Вялікага Кітая ў цэнтр Еўропы".


Аляксандр Лукашэнка адзначыў даўні характар дружбы паміж дзвюма краінамі. "Яна ўзнікла тады, калі ніхто не гаварыў аб тым, што Кітай можа скарыстацца магчымасцямі Беларусі. Мы развівалі адносіны, развіваем іх і цяпер. Але галоўнае, што было тады і застаецца сёння, - мы не дружым супраць некага, мы нікому не перашкаджаем. Мы развіваем наша супрацоўніцтва на прынцыпах міжнароднага права. Ні адзін дагавор Кітая і Беларусі не супярэчыць гэтым прынцыпам. Тым больш, не парушае стабільнасць дзяржаў гэтага або азіяцкага рэгіёнаў. Мы непакоімся за дабрабыт нашых людзей як у Кітаі, так і ў Беларусі. Гэта наша мэта", - падкрэсліў Аляксандр Лукашэнка.

Паводле слоў Прэзідэнта, удзельнічаючы ў міжнароднай канферэнцыі ў Кітаі па развіцці ініцыятывы "Адзін пояс і адзін шлях", ён гаварыў аб тым, што асаблівасцю работы КНР з дзяржавамі ў свеце з'яўляецца тое, што Кітай нікога не павучае, не ставіць нейкіх папярэдніх умоў для супрацоўніцтва. "Кітай ідзе на супрацоўніцтва з адкрытым сэрцам і душой, калі гэтага жадаюць дзяржавы, у якіх Кітай хоча працаваць. Гэта, можна сказаць, новая эра эканамічных і палітычных адносін у свеце - без націску, без папярэдніх умоў, толькі на ўзаемавыгаднай аснове. У гэтым асаблівасць палітыкі вялікага, мудрага кітайскага народа. Мы гэта вітаем. Аб гэтым гаворым і будзем гаварыць публічна", - заявіў Кіраўнік дзяржавы.

Ён звярнуў увагу і на той факт, што Кітай паслядоўна рэалізуе дасягнутыя дамоўленасці ў пытанні развіцця супрацоўніцтва з Беларуссю. "Вы паабяцалі нам адкрыць рынак для прадуктаў харчавання - вы яго адкрылі і па малочнай прадукцыі, і па мясной. Вы абяцалі нам падтрымку ў прамысловасці - вы рэалізоўваеце свае абяцанні. Вы абяцалі падтрымаць нашу абараназдольнасць і бяспеку нашай дзяржавы - вы гэта зрабілі. Вы павінны ведаць, што мы гэтым ганарымся і будзем помніць гэта заўсёды", - сказаў Прэзідэнт.

Аляксандр Лукашэнка дадаў, што гатовы да абмеркавання любых пытанняў супрацоўніцтва з КНР, і падкрэсліў, што закрытых тэм у гэтым плане няма.

У цэлым на сустрэчы падрабязна і прадметна абмяркоўваліся перспектывы развіцця Кітайска-беларускага індустрыяльнага парка. Размова ў прыватнасці ішла аб стварэнні інвестыцыйнага фонду для прыцягнення новых рэзідэнтаў. Плануецца, што першапачатковы памер фонду будзе складаць $585 млн з перспектывай павелічэння да $1 млрд і больш па меры неабходнасці.

Акрамя стварэння інвестыцыйнага фонду, сярод напрамкаў, якія мае намер развіваць кітайскі бок сумесна з беларускімі партнёрамі, даследчая работа, у тым ліку ў пытанні патрэбнасцей рынку ў той ці іншай прадукцыі, падрыхтоўка кадраў, навучанне і павышэнне кваліфікацыі работнікаў прадпрыемстваў - рэзідэнтаў парка.

Чакаецца, што парк "Вялікі камень" будзе ўключаны ў спіс праектаў, якія курыруе Камітэт па кантролі і кіраванні дзяржаўнай маёмасцю пры Дзяржсавеце КНР. Гэта дасць дадатковыя магчымасці для аказання дапамогі ў прыцягненні інвестараў, вырашэнні пытанняў развіцця супрацоўніцтва, асабліва па лініі дзяржпрадпрыемстваў.

На сустрэчы таксама абмяркоўваліся тэмы развіцця турызму, авіязносін, устаранення візавых бар'ераў.

З беларускага боку заяўлена аб гатоўнасці аказваць усялякую дапамогу і падтрымку ў вырашэнні любых пытанняў, што ўзнікаюць, і рэалізацыі розных праектаў.

Сяа Яцын падкрэсліў, што дэлегацыя ў складзе прадстаўнікоў буйнейшых карпарацый Кітая, якая прыбыла з ім, нацэлена на тое, каб рэалізаваць дамоўленасці, дасягнутыя паміж лідарамі дзвюх краін. "Прадпрыемствы, якія прадстаўлены ў складзе нашай дэлегацыі, уваходзяць у топ-500 буйнейшых і мацнейшых прадпрыемстваў свету", - сказаў ён.

Таксама Сяа Яцын падзякаваў Кіраўніку беларускай дзяржавы за ўсебаковую падтрымку работы кітайскіх прадпрыемстваў у Беларусі, у прыватнасці ў рэалізацыі праекта па стварэнні парка "Вялікі камень". На гэта накіраваны Указ № 166 ад 12 мая 2017 года, якім для рэзідэнтаў Кітайска-беларускага індустрыяльнага парка "Вялікі камень" ствараецца найлепшы прававы рэжым вядзення камерцыйнай дзейнасці ў параўнанні з іншымі рэжымамі ў Беларусі і краінах ЕАЭС. "Мы ўбачылі, што па многіх напрамках, у прыватнасці для развіцця гэтага парка і садзейнічання ўваходжанню ў яго новых рэзідэнтаў, была праведзена вельмі вялікая работа. Гэта дасць магчымасць зрабіць наш праект міжнародным, стварыць спрыяльныя ўмовы і добры бізнес-клімат", - упэўнены кіраўнік кітайскай дэлегацыі.

Падводзячы вынікі сустрэчы, Прэзідэнт Беларусі адзначыў, што праведзеныя абмеркаванне і прадметная размова дадуць магчымасць зрабіць значны крок у развіцці супрацоўніцтва. Пры гэтым асноўнай стратэгіяй развіцця беларуска-кітайскіх адносін на сучасным этапе бачыцца тэзіс "апярэдзіць час".

Тэгі: Сустрэчы
© 2017, Прэс-служба Прэзідэнта Рэспублікі Беларусь