Сустрэча са Старшынёй Федэрацыі прафсаюзаў Беларусі Міхаілам Ордам

Перспектывы развіцця прафсаюзнага руху абмеркаваны 19 мая на рабочай сустрэчы Прэзідэнта Беларусі Аляксандра Лукашэнкі са Старшынёй Федэрацыі прафсаюзаў Беларусі Міхаілам Ордам.

"Яшчэ раз падкрэсліваю: я буду значную ўвагу ўдзяляць развіццю прафсаюзнага руху. Гэта наша апора і мая як Прэзідэнта. Я акуратна назіраю за тым, што адбываецца ў прафсаюзах", - сказаў беларускі лідар.

Аляксандр Лукашэнка прапанаваў на сустрэчы абмеркаваць падзеі, якія адбываюцца ў прафсаюзным руху, у тым ліку работу па ўпарадкаванні структуры прафсаюзаў. "Для мяне вельмі важна, як ідзе структурная перабудова, аб якой мы некалі дамаўляліся з вамі. Перш за ўсё, унізе. Як ствараюцца пярвічныя арганізацыі на прадпрыемствах прыватнай формы ўласнасці, як ідзе працэс, ці няма тармажэння, - пацікавіўся Прэзідэнт. - А наверсе мы гаварылі аб галіновых прафсаюзах. У нас вельмі ўжо шмат іх было. І тады было пастаўлена вамі пытанне аб аб'яднанні падобных галіновых прафсаюзаў".

Аляксандр Лукашэнка заявіў аб падтрымцы дзяржавай развіцця партыйнай сістэмы, але ніякіх штучных крокаў у гэтым напрамку рабіцца не будзе. "Калі партыі, якія існуюць, здольны да ўзнаўлення, узмацнення, павышэння колькасці, мы будзем гэты працэс падтрымліваць. Прытым і апазіцыйныя, і неапазіцыйныя", - сказаў Прэзідэнт.

Адначасова Кіраўнік дзяржавы адзначыў, што ў краіне ёсць дзве магутныя арганізацыі - прафсаюзы колькасцю больш як 4 млн чалавек і грамадскае аб'яднанне "Белая Русь". "Гэта не значыць, што я буду першарадную ўвагу ўдзяляць іх падтрымцы. Але я не ўтойваю свайго стаўлення да гэтых дзвюх магутнейшых арганізацый. Яны адыгрывалі і будуць адыгрываць больш істотную ролю ў жыцці нашага грамадства", - заявіў беларускі лідар.

Прэзідэнт, у прыватнасці, падтрымаў ініцыятыву Федэрацыі прафсаюзаў Беларусі аб народным кантролі за цэнамі ў гандлёвых аб'ектах. "Удзячны за тое, што ініцыятыўным чынам вы падключаецеся да кантролю за выкананнем пастаўленых трох задач: цэнаўтварэнне, занятасць, заработная плата, - сказаў Аляксандр Лукашэнка. - Чуў, што вы хочаце арганізаваць народны кантроль за цэнамі ў магазінах. Усё ў справаздачах статыстыкі і правільна, і добра па методыках, але ў магазінах па асноўных таварах, асноўных прадуктах харчавання сітуацыя можа быць іншая. Якая яна - хто як не прафсаюзы гэта лепш за ўсё ведаюць. Таму я вельмі падтрымліваю гэту ініцыятыву аб кантролі за цэнамі непасрэдна ў гандлёвых арганізацыях".

Кіраўнік дзяржавы звярнуў увагу, што традыцыйна прафсаюзы ўдзельнічаюць у вырашэнні пытанняў у сферы занятасці. "Я таксама буду прасіць, каб вы ад гэтага пытання не адыходзілі. І заработная плата як вынік. Гэтыя пытанні трымайце ў полі зроку", - заявіў Прэзідэнт.

Аляксандр Лукашэнка таксама заклікаў прафсаюзы да больш актыўнай ролі ў развіцці вялікага спорту. "У прафсаюзаў велізарны спартыўны пласт. Па вашых справаздачах, вы кожны год ледзь не паўтысячы выдаяце наверх спартсменаў, якія гатовы стаць вялікімі. А дзе яны? Іх не відаць, - адзначыў Прэзідэнт. - Таму тут нам таксама трэба нешта зрабіць, каб у вас цэлая галіна была. Можа, і не трэба нікуды іх перадаваць. А калі і перадаваць, то іх трэба весці, кантраляваць, каб мы іх не страцілі. А так вы, быццам, 500 чалавек і перадалі, а рэзультатаў у вялікім спорце мы не бачым".

Кіраўнік дзяржавы прапанаваў прадумаць адпаведную сістэму, каб максімальна садзейнічаць самарэалізацыі перспектыўных спартсменаў. Ён адзначыў, што ў асобе прафсаюзнага спорту галіноваму міністэрству і дзяржаве ў цэлым неабходна моцная падтрымка ў гэтым напрамку.

Прэзідэнт нагадаў, што цяпер адбываецца сур'ёзнае перафармаціраванне спартыўнай галіны ў Беларусі, да кіраўніцтва федэрацыямі прыходзяць спецыялісты са сферы спорту, а кіраўнікі дзяржорганаў высокага рангу будуць узначальваць наглядальныя саветы. Адзін з прыкладаў - федэрацыя біятлона. Аляксандр Лукашэнка адзначыў, што пры былым становішчы спраў федэрацыямі часам было цяжка кіраваць, і многія адпаведныя пытанні зноў былі замкнёны на Прэзідэнта.

На сустрэчы Аляксандра Лукашэнкі з Міхаілам Ордам таксама абмяркоўваліся праблемныя пытанні ў сферы ўліку страхавога стажу, неабходнага для налічэння пенсіі. Размова, у прыватнасці, ішла аб людзях, якія даглядаюць інвалідаў, шматдзетных сем'ях. Падрыхтаваны праект указа, які будзе ўнесены на разгляд Кіраўніка дзяржавы.

Акрамя таго, Федэрацыя прафсаюзаў Беларусі прапануе 2018 год у Беларусі аб'явіць Годам чалавека працы, што ў тым ліку павінна садзейнічаць павышэнню прэстыжу рабочых спецыяльнасцей.