Наведванне Рэспубліканскага цэнтра алімпійскай падрыхтоўкі па зімовых відах спорту "Раўбічы"

Прэзідэнт Рэспублікі Беларусь Аляксандр Лукашэнка патрабуе напаўняльнасці Рэспубліканскага цэнтра алімпійскай падрыхтоўкі па зімовых відах спорту "Раўбічы". Такую задачу ён паставіў сёння ў час наведвання гэтага цэнтра.

Кіраўніку дзяржавы далажылі аб выкананні яго даручэнняў па рэканструкцыі і здачы ў эксплуатацыю спартыўных аб'ектаў у рэспубліканскім цэнтры "Раўбічы". У прыватнасці, у 2010-2014 гадах тут былі рэканструяваны акрабатычны схіл для фрыстайла, медыка-аднаўленчы цэнтр, лыжаролерная траса, біятлонны стадыён і стрэльбішча, інжынерныя сеткі і кацельня, а таксама ў цэлым праведзена добраўпарадкаванне ўсяго комплексу. У 2015 годзе будзе ўведзена ў эксплуатацыю футбольнае поле з універсальным пакрыццём для хакея на траве, тэніса, футбола, у 2016 годзе запланавана завяршэнне будаўніцтва крытага басейна і гасцініцы.

"Чаму не займаюцца спартсмены? - пацікавіўся Кіраўнік дзяржавы ў дырэктара цэнтра Андрэя Асташэвіча. - Я сюды сродкі ўкладваў у цяжкія часы не для таго, каб вы хадзілі рукі склаўшы".

"Я папярэджваў: аптымізуйцеся! Калі вы хочаце мець добрыя зарплаты, гэта не за кошт павышэння цаны трэніровак для спартсменаў або людзей, якія прыходзяць сюды займацца, што вы з іх шкуру дзераце. А нічога не здзераце - проста людзі сюды не пойдуць. І тыя мільярды, якія мы ўклалі сюды, будуць стаяць помнікам, пакуль не разваліцца", - сказаў Прэзідэнт.

"Тут кожны дзень, я вас папярэджваю, павінны тысячы чалавек быць", - падкрэсліў Аляксандр Лукашэнка.

"Вы проста лодарнічаеце! І майце на ўвазе: для вас пачаўся новы этап з 1 студзеня гэтага года. Павінен быць вынік. Для гэтага ёсць усё", - дадаў Кіраўнік дзяржавы.

Прэзідэнту далажылі таксама аб развіцці біятлона ў краіне, гатоўнасці да правядзення ў "Раўбічах" чэмпіянату свету па біятлоне сярод юніёраў і юнакоў. Для вырашэння праблемных аспектаў развіцця біятлона распрацавана доўгатэрміновая комплексная праграма адбору і пачатковай падрыхтоўкі юных біятланістаў, якая прадугледжвае прыцягненне навуковых кадраў і выкарыстанне інавацыйных методык у спартыўнай трэніроўцы.

"У нас маладыя ўсюды: і ў хакеі, і ў лыжах, і ў біятлоне - надзеі вялікія. Як толькі пасталелі - дзе гэтыя надзеі?" - заўважыў Аляксандр Лукашэнка.

Прэзідэнт стаў на лыжы і асабіста праверыў якасць трас. "Не ведаю, што вам яшчэ патрэбна. Калі б у Расіі былі такія ўмовы, яны былі б рады", - адзначыў Аляксандр Лукашэнка. Ён падкрэсліў, што ў "Раўбічах" створаны ўсе ўмовы для спартсменаў. "Нават з лішкам. Такіх трас нідзе няма", - сказаў Кіраўнік дзяржавы.

"Трасы выдатныя для лыжнікаў і біятланістаў. Фрыстайл - калі ласка, акрабатыка - няхай скачуць. Усё павінна быць зроблена, і няхай займаюцца. Ніякіх Аўстрый, тут павінны рыхтавацца! З таго ўзроўню, на якім мы знаходзімся па лыжах, ды і па біятлоне, - тут. Дойдуць да ўзроўню Домрачавай, адправім на леднікі", - сказаў Прэзідэнт. "Больш паўтараць не буду!" - папярэдзіў Кіраўнік дзяржавы.