Бел
Галоўная   /  Падзеі

Рабочая паездка ў горад Брэст

11 жніўня 2017 года
Рабочая паездка ў горад Брэст
глядзіце таксама: фота
11 жніўня 2017 года
Рабочая паездка ў горад Брэст
19 фота

Прэзідэнт Беларусі Аляксандр Лукашэнка даручыў у 2018 годзе падцягнуць прадпрыемствы з нізкай зарплатай да ўзроўню Br1 тыс. Такую задачу Кіраўнік дзяржавы паставіў 11 жніўня ў час рабочай паездкі ў Брэсцкую вобласць.

Прызямліўшыся ў аэрапорце Брэст, Прэзідэнт запатрабаваў прывесці ў парадак паветраную гавань. "Што неабходна зрабіць: трэба лішняе ўсё, што тут ёсць, зямельныя плошчы, аддаць па прызначэнні. Мы па савецкіх мерках адцялі 0,5 тыс. га зямлі. Не даглядаеш аэрапорт - гэта дрэнна", - адзначыў Аляксандр Лукашэнка, звяртаючыся да губернатара Брэсцкай вобласці Анатоля Ліса.

Кіраўнік дзяржавы звярнуў увагу, што калі аэрапорт поўнасцю не загружаны сёння, то гэта не значыць, што і ў будучым будзе гэтак жа. "Вазьмі па контуры, колькі трэба для аэрапорта, столькі і пакінь. Усё астатняе аддай людзям: нехта захоча пабудаваць прадпрыемства. Да ўзлётна-пасадачнай паласы хаця б травы вырошчвай. Прывядзі ўсё ў парадак", - даручыў Прэзідэнт.

Далей Аляксандр Лукашэнка накіраваўся ў новы мікрараён Брэста, дзе яму далажылі аб сацыяльна-эканамічным развіцці і добраўпарадкаванні горада, будаўніцтве новых аб'ектаў сацыяльнай інфраструктуры, а таксама аб падрыхтоўцы да святкавання 1000-годдзя абласнога цэнтра.

Кіраўніка дзяржавы праінфармавалі, што Брэст да канца года выйдзе на ўзровень сярэдняй заработнай платы Br1 тыс. "Мы Br1 тыс. будзем мець, але гэта будзе сярэдняя зарплата. Ёсць прадпрыемствы, якія гэту сярэднюю зарплату цягнуць уверх, гэта добра. Але палавіна, можа, крыху менш прадпрыемстваў, дзе мы недацягваем да гэтага ўзроўню, і наогул там зарплата невялікая. За 2018-2019 гады, асабліва за 2018 год, мы бяромся за тыя прадпрыемствы, на якіх мала зарабляюць, каб іх падцягнуць да Br1 тыс.", - сказаў Прэзідэнт. Паводле яго слоў, калі гэта даручэнне будзе выканана, сярэдняя зарплата па краіне можа дасягнуць Br1,5 тыс.


Пры гэтым Аляксандр Лукашэнка падкрэсліў, што сярэдні ўзровень заработнай платы ў памеры Br1 тыс. да канца бягучага года неабходна замацаваць, каб у пачатку 2018 года не атрымаць яго зніжэння. "Трэба стабільна выходзіць на сярэднюю зарплату, і ў 2018 годзе самую нізкую падцягваць да ўзроўню сярэдняй", - адзначыў Кіраўнік дзяржавы.

Асобная ўвага была ўдзелена занятасці насельніцтва. "Людзей трэба прывучыць да працы. Нельга ствараць так званы клас беспрацоўных. Калі мы іх не станем прыцягваць да грамадска карыснай працы, як раней гаварылі, значыць, мы будзем ствараць гэты клас, і ён будзе павялічвацца. Нам гэтага дапусціць нельга", - падкрэсліў Прэзідэнт.

"Мы павінны прымусіць усіх працаваць. Вядома, будзе нейкі малы працэнт людзей, якія ні на што не здольныя. Хапае ў нас, на жаль, алкаголікаў, прайдох у жыцці. Як іх прымусіць працаваць? Спецыфічнымі метадамі будзем прымушаць. Але ёсць людзі, якія могуць, але ўхіляюцца, асабліва на заходніх рубяжах, - заявіў Аляксандр Лукашэнка. - Гэтых людзей трэба ставіць у такія ўмовы, каб яны ўсё ж такі ішлі працаваць - швачкамі, і бетоншчыкамі, і іншымі".

Кіраўнік дзяржавы канстатаваў, што пасля выхаду абноўленага Дэкрэта № 3 мясцовым органам улады будуць дадзены самыя шырокія паўнамоцтвы."Мы вычленім людзей па персаналіях: хто можа, але не хоча, хто хоча, але не можа, і тых, якім трэба лапату ў зубы - і пайшоў працаваць. Няхай на мяне не крыўдзяцца. Я думаў, што 300 тыс., а ў нас 540 тыс. беспрацоўных, якія падпадаюць пад трэці дэкрэт", - заўважыў Прэзідэнт.

Было падкрэслена, што мясцовыя органы ўлады ў абавязковым парадку павінны выконваць даручэнні па стварэнні рабочых месц.

Затым Аляксандру Лукашэнку далажылі аб будаўніцтве аб'ектаў да 1000-годдзя Брэста. У прыватнасці, плануецца адкрыць дзіцячы сад, сярэднюю школу, футбольны манеж, аўтавакзал.

У час наведвання будаўнічай пляцоўкі самага вялікага інфраструктурнага праекта - Заходняга абходу - кіраўніка дзяржавы праінфармавалі, што патрабуецца знос жылых дамоў, аднак гэты аспект будзе мінімізаваны. Грамадзянам прапануюць камфортнае жыллё недалёка ад месца іх цяперашняга пражывання. Плануецца, што ў новыя кватэры пераедуць амаль 40 сем'яў. "Людзей крыўдзіць не трэба. Трэба пабудаваць дом у лепшых умовах, - даручыў Аляксандр Лукашэнка. - Толькі глядзіце, каб не атрымалася, што ў адну кватэру сем сем'яў папрапісваюцца, і вы потым будзеце будаваць кожнаму жыллё".

Прэзідэнту далажылі, што будаўніцтва Заходняга абходу Брэста сёння вядзецца згодна з напружанымі графікамі. Было таксама адзначана, што арганізацыя работ, набраныя тэмпы іх выканання вызначылі неабходнасць у дадатковым фінансаванні аб'екта ў 2017 годзе ў памеры Br10 млн, паколькі ўжо ў верасні ўсе выдзеленыя сродкі будуць асвоены ў поўным аб'ёме. Кіраўнік дзяржавы даручыў прапрацаваць фінансавыя пытанні і прыняць неабходныя рашэнні.

Аляксандр Лукашэнка паабяцаў праверыць, наколькі выкананыя работы па будаўніцтве аб'ектаў да 1000-годдзя Брэста будуць адпавядаць прадстаўленаму праекту.


Завяршаючы рабочую паездку па Брэсцкай вобласці, Прэзідэнт наведаў ААТ "Савушкін прадукт". Там Кіраўнік дзяржавы азнаёміўся з сучаснымі тэхналагічнымі працэсамі перапрацоўкі малака і выстаўкай вырабляемай прадукцыі, наведаў участкі перапрацоўкі сыроваткі і вытворчасці зярністага тварагу. Яму далажылі аб выкананні даручэнняў па мадэрнізацыі прадпрыемстваў малакаперапрацоўчай галіны, вытворчасці канкурэнтаздольнай экспартна арыентаванай прадукцыі.

Аляксандра Лукашэнку таксама праінфармавалі аб фінансава-эканамічным стане і перспектывах развіцця прадпрыемства. Размова зайшла і аб магчымым далучэнні да ААТ "Савушкін прадукт" некаторых адстаючых сельгаспрадпрыемстваў Брэсцкай вобласці. У прыватнасці, было адзначана, што такое рашэнне магло б пайсці на карысць як бізнесу, так і дзяржаве. У выніку такіх пераўтварэнняў з'яўляецца магчымасць больш эфектыўна выкарыстоўваць вырабляемую ў краіне сыравіну, павялічваць заработную плату на далучаных прадпрыемствах і падатковыя паступленні ў бюджэт.

"Я лабірую павелічэнне паступленняў у дзяржаўны бюджэт. Вядома, і яму (ААТ "Савушкін прадукт") павінна быць выгада. У яго адна праблема - сыравіна. Калі б ад гэтай сыравіны, якую я яму аддаў бы, дзяржава атрымала б больш, я не задумваючыся б гэта зрабіў. Якая розніца: прыватнік або не. Так, ён атрымае больш, ну і добра. Але ўсё роўна эфект ад тоны малака вышэйшы будзе, чым цяпер", - сказаў Прэзідэнт.

Ён даручыў да 1 студзеня прапрацаваць гэтыя пытанні і палічыць, які эфект можа атрымаць дзяржава пасля прыняцця адпаведнага рашэння. Аляксандр Лукашэнка таксама заклікаў беларускіх чыноўнікаў смялей дзейнічаць пры прыняцці такіх рашэнняў і пазбаўляцца ад "савецкіх забабонаў".

Прэзідэнт уручыў калектыву прадпрыемства Ганаровы дзяржаўны сцяг Рэспублікі Беларусь за асаблівыя дасягненні ў гаспадарчым развіцці. "Гэта не толькі знак высокага прызнання заслуг усяго вашага калектыву, але і паказчык той народнай любові, якую змог заваяваць "Савушкін прадукт". Прадукцыя прадпрыемства сёння на стале практычна ў кожнай сям'і", - канстатаваў Аляксандр Лукашэнка.


Кіраўнік дзяржавы адзначыў, што дзякуючы шырокаму асартыменту і выдатнай якасці тавары пад гэтым брэндам атрымалі папулярнасць не толькі на радзіме, але і далёка за яе межамі. Іх ахвотна купляюць у Расіі, Украіне, краінах Еўрасаюза, Кітаі, Сінгапуры, Аб'яднаных Арабскіх Эміратах, Рэспубліцы Карэя, Ізраілі і многіх іншых дзяржавах. Толькі ў мінулым годзе аб'ём экспарту склаў звыш $210 млн.

"За апошнія 10 гадоў кампанія накіравала на пашырэнне і мадэрнізацыю сваёй вытворчасці амаль $300 млн. Важна, што грошы ідуць не толькі на тэхнічнае аснашчэнне і будаўніцтва новых вытворчых аб'ектаў, але і на ўмацаванне сыравіннай базы. Грамадства пашырае свае вытворчыя магутнасці, набываючы спецыялізаваныя сельгаспрадпрыемствы, рэканструюючы жывёлагадоўчыя комплексы, абнаўляючы дойны статак. Пры такой увазе да крыніц сыравіны вы заўсёды забяспечаны натуральным малаком, і прытым самай высокай якасці, - сказаў кіраўнік дзяржавы. - Усе вытворчыя і тэхналагічныя працэсы сертыфікаваны на адпаведнасць вышэйшым сусветным і нацыянальным стандартам. У прадпрыемства сучаснае лабараторнае абсталяванне, поўнасцю аўтаматызаваны лагістычны цэнтр".

Аляксандр Лукашэнка падкрэсліў, што такія ўражальныя дасягненні прадпрыемства былі б немагчымы без працавітасці, ініцыятывы, высокага прафесіяналізму яго кіраўнікоў і спецыялістаў, усіх членаў калектыву. "Сённяшняя ўзнагарода - дастойная ацэнка вашай плённай работы", - рэзюмаваў Прэзідэнт.

Кіраўнік дзяржавы падкрэсліў, што Беларусь атрымлівае салідную аддачу ад сродкаў, укладзеных у мадэрнізацыю перапрацоўчай прамысловасці. "У гэтым сегменце эканомікі з'явілася шмат кампаній з сучасным тэхналагічным укладам. Яны дэманструюць высокую культуру вытворчасці, праяўляюць гібкасць, клапоцяцца аб сыравіннай базе, укладваюць грошы ва ўласнае развіццё, забяспечваюць сваім работнікам дастойны сацыяльны пакет, узводзяць для іх жыллё. Гэта датычыцца, напэўна, перш за ўсё вашага прадпрыемства, таму што вы ўсё гэта робіце", - адзначыў Аляксандр Лукашэнка, звяртаючыся да калектыву ААТ "Савушкін прадукт".

Паводле слоў Прэзідэнта, прадпрыемствы, якія раней мелі патрэбу ў дапамозе дзяржавы, сёння самі сталі лакаматывам шэрага галін і візітнай карткай Беларусі. "Як мага лепш гэта характарыстыка падыходзіць да акцыянернага таварыства "Савушкін прадукт" - флагмана малочнай прамысловасці краіны", - падкрэсліў беларускі лідар.

Аляксандр Лукашэнка канстатаваў, што поспехі прадпрыемства не выпадковыя, яны з'яўляюцца яркім адлюстраваннем мэтанакіраванай палітыкі, праводзімай дзяржавай у аграпрамысловым сектары. У краіне ажыццёўлены пераход ад канцэпцыі развіцця сельскагаспадарчай вытворчасці да канцэпцыі развіцця сельскай мясцовасці ў цэлым. "Гэта дало магчымасць адрадзіць беларускую вёску з яе эканамічным патэнцыялам. Вы гэта цудоўна адчуваеце, ведаеце самі, таму што непасрэдна працуеце ў гэтым патэнцыяле і яго ствараеце", - адзначыў Прэзідэнт. "Сёння па выпуску абсалютнай большасці відаў сельгаспрадукцыі на душу насельніцтва Беларусь істотна пераўзыходзіць іншыя краіны Садружнасці Незалежных Дзяржаў. А па вытворчасці малака апярэджвае такія развітыя краіны, як Нідэрланды, Германію, Францыю", - сказаў Кіраўнік дзяржавы.


"Што датычыцца ўнутранага рынку, то ён даўно насычаны айчыннымі прадуктамі харчавання, якія дзякуючы высокай якасці і даступнасці паспяхова канкурыруюць з імпартнымі аналагамі, - сказаў Прэзідэнт. - Быў час, калі мы сабе дазволіць такога асартыменту і такой колькасці тавараў у Беларусі не маглі. Помніце знакамітыя талоны? Цяпер мы пра гэта забылі".

Што датычыцца прадуктаў харчавання, Беларусь стала не толькі самадастатковай, але і экспартна арыентаванай. Аб'ём рэалізаваных за мяжу прадуктаў харчавання ў 2016 годзе перасягнуў $4 млрд. Цяпер па некаторых пазіцыях, напрыклад, па экспарце сметанковага масла, тварагу, абястлушчанага малака Беларусь увайшла ў лік сусветных лідараў.
Тэгі: Паездкі
© 2017, Прэс-служба Прэзідэнта Рэспублікі Беларусь