Бел
Галоўная   /  Падзеі

Прыняцце кадравых рашэнняў

18 верасня 2018 года
Назначэнне кіраўнікоў мясцовых выканаўчых і распарадчых органаў
Назначэнне новых паслоў у Латвіі і Фінляндыі
глядзіце таксама: відэа
18 верасня 2018 года
Назначэнне новых паслоў у Латвіі і Фінляндыі

Прэзідэнт Беларусі Аляксандр Лукашэнка 18 верасня разгледзеў кадравыя пытанні.

Кіраўнік дзяржавы назначыў:

Воўка Віталя Міхайлавіча - памочнікам Прэзідэнта Рэспублікі Беларусь - інспектарам па Віцебскай вобласці;

Марковіча Васіля Міхайлавіча - Надзвычайным і Паўнамоцным Паслом Рэспублікі Беларусь у Латвійскай Рэспубліцы;

Самасуева Аляксея Іванавіча - Надзвычайным і Паўнамоцным Паслом Рэспублікі Беларусь у Фінляндскай Рэспубліцы і па сумяшчальніцтве ў Каралеўстве Данія;

Герасімава Васіля Мікалаевіча - намеснікам Старшыні Камітэта дзяржаўнага кантролю;

Брыля Вячаслава Станіслававіча - Надзвычайным і Паўнамоцным Паслом Рэспублікі Беларусь у Рэспубліцы Кот-д'Івуар па сумяшчальніцтве.

Прэзідэнт таксама даў згоду на назначэнне:

Брылевіча Ігара Максімавіча - старшынёй Пінскага райвыканкама;

Баданіна Аляксандра Іосіфавіча - старшынёй Браслаўскага райвыканкама;

Кісялевіча Міхаіла Леанідавіча - старшынёй Лепельскага райвыканкама;

Рабкаўца Валерыя Васільевіча - першым намеснікам старшыні Брэсцкага аблвыканкама;

Яфрэмава Барыса Сяргеевіча - намеснікам старшыні Віцебскага аблвыканкама;

Маркевіча Івана Станіслававіча - намеснікам старшыні Мінскага аблвыканкама;

Сталярчука Алега Валер'евіча - членам Віцебскага аблвыканкама;

Равуцкага Дзмітрыя Васільевіча - членам Мінскага аблвыканкама і Мінскага гарвыканкама.

Узгадняючы назначэнне новых кіраўнікоў раёнаў, Аляксандр Лукашэнка падрабязна цікавіўся іх папярэднім вопытам работы, сітуацыяй на месцах, развіццём тых ці іншых напрамкаў народнай гаспадаркі.

"Я бачу, што гэтыя спецыялісты - людзі не выпадковыя і талковыя. Вельмі хацелася б, каб новая генерацыя такіх людзей была ў нас пабольш і каб вынік быў большы", - сказаў Аляксандр Лукашэнка.

Як адзначыла Кіраўнік Адміністрацыі Прэзідэнта Наталля Качанава, кандыдатуры двух з трох новых кіраўнікоў раёнаў падабраны са сфарміраванай нядаўна спецыяльнай групы рэзерву Адміністрацыі Прэзідэнта, куды ўваходзяць кіраўнікі рэгіянальнага ўзроўню ва ўзросце да 40 гадоў.

"Краіну камусьці трэба браць у рукі (размова аб падрыхтоўцы і падтрымцы новага пакалення перспектыўных кіраўнікоў) і не страціць яе, каб сапраўды мы былі незалежныя і суверэнныя. Не на словах, а на справе", - звярнуў увагу Прэзідэнт Беларусі.

Разглядаючы сітуацыю ў Пінскім раёне, Кіраўнік дзяржавы цікавіўся вопытам па аб'яднанні прадпрыемстваў у сферы АПК, папярэдзіўшы, што гэты працэс нельга ажыццяўляць штучна. Каб, з аднаго боку, прадпрыемства-інтэгратар магло нешта даць і надаць імпульс развіцця далучаемаму, а з іншага боку, не загубіць эканоміку абедзвюх арганізацый. "Глядзіце, каб не было штучнага аб'яднання, дзяльбы і да таго падобнае", - адзначыў беларускі лідар.

"Гэта вельмі буйны раён. Трэба будзе займацца гэтак жа, як займаемся Оршай, паглядзець прадпрыемствы, у іх не тая сітуацыя, што ў Оршы. Тым не менш па гэтым шляху нам трэба рухацца. І вы на гэта звярніце ўвагу. Гэты трэнд, асноўны напрамак вам трэба ўлічваць. Буйныя гарады (мы іх называем "сярэднія" на рэспубліканскім узроўні) мы павінны ажывіць, калі гэта неабходна, і падняць на больш высокі ўзровень. Але галоўнае - гэта вытворчасць, каб было дзе людзям зачапіцца, каб яны маглі працаваць і атрымліваць заработную плату", - падкрэсліў Прэзідэнт.



У ліку такіх гарадоў Аляксандр Лукашэнка назваў Оршу, Барысаў, Баранавічы, Ліду, Бабруйск, Полацк, Мазыр. "Асабліва Пінск. Гэта паўднёвая апора наша. Асабліва пры такім насельніцтве. Я ў вас буду ў наступным годзе, і мы паглядзім на тую праграму, якую вы распрацуеце разам з губернатарам. І будзем ужо або падтрымліваць, або неяк паднаціскаць на вас, каб, не дай бог, не паўтарылася тое, што было ў Оршы", - рэзюмаваў Кіраўнік дзяржавы.

Што датычыцца Браслаўскага раёна, Аляксандр Лукашэнка нагадаў, што па развіцці гэтага рэгіёна прымалася шмат рашэнняў. "Яны сяк-так працуюць. Звярніце ўвагу на тое, каб кожны кавалачак зямлі працаваў. А тое, што ён працаваць можа, я пераканаўся ў гэтым годзе. Зразумела, што і Мёрскі, і Браслаўскі раён - гэта не Слуцкі раён. Праблемы там іншыя - драбнаконтурнасць, не тая ўрадлівасць", - адзначыў Прэзідэнт.

Кіраўнік дзяржавы нагадаў, што раней прапаноўваў падумаць над тым, каб у Браслаўскім раёне, улічваючы мясцовыя асаблівасці, больш актыўна развіваць фермерскія гаспадаркі. "Ну так... паслухалі, і, я гавару, сяк-так. Таму вы паглядзіце, як задзейнічаць кожны кавалачак зямлі", - даручыў беларускі лідар.

Аляксандр Лукашэнка падкрэсліў, што хоць па шэрагу магчымасцей у развіцці сельскай гаспадаркі паўночныя землі ў Беларусі адстаюць ад паўднёвых раёнаў, аднак там ёсць свая прыгажосць і тое, на чым можна зарабляць грошы. "Браслаўскі раён трэба паднімаць. Гэта жамчужына нашай Беларусі", - сказаў ён.

Асаблівыя падыходы ў пытанні развіцця сельскай гаспадаркі патрэбы і ў Лепельскім раёне, як і ў Віцебскай вобласці ў цэлым. "Вядома, там трэба для сябе дакладна выбудаваць праграму, як будзем дзейнічаць. Мы цяпер сур'ёзна ўзяліся за Віцебскую вобласць, асабліва ў сельскай гаспадарцы", - адзначыў Кіраўнік дзяржавы.

Аляксандр Лукашэнка актуалізаваў задачу па вызначэнні аптымальнага для таго ці іншага раёна севазвароту, падборы культур, што вырошчваюцца. "Калі там не растуць збожжавыя, мы іх убраць не можам і своечасова пасеяць, дык іх трэба сеяць столькі, колькі трэба. Не трэба дзеля нейкіх аб'ёмаў. Трэба атрымліваць столькі, колькі трэба збожжавых. А астатнія - травы, кукуруза, каб быў корм, каб накарміць жывёлу", - звярнуў увагу Прэзідэнт. Тое ж самае датычыцца і пытанняў свінагадоўлі, птушкагадоўлі, утрымлівання і адкорму БРЖ - зыходзячы з прыродных і кліматычных умоў, усюды неабходна дакладна вызначыцца з прыярытэтамі і спецыялізацыяй.

Назначаючы новага пасла ў Латвійскай Рэспубліцы, Аляксандр Лукашэнка адзначыў вялікі патэнцыял у развіцці супрацоўніцтва з гэтай краінай. "Вы разумееце, што выхаду да мора ў нас няма і калі Літва не вельмі хоча з намі супрацоўнічаць, дык трэба рабіць упор на Латвію. Трэба зрабіць так, каб гэта рэспубліка задавальненне атрымлівала ад супрацоўніцтва з Беларуссю. Мы людзі прыстойныя, яны гэта ведаюць. І калі яны пойдуць нам насустрач па многіх пытаннях, якія мы ім прапануем, яны будуць мець пэўны (і немалы) эфект", - заявіў беларускі лідар.

"Яны адчулі, што не ўсё вырашаецца ў Бруселі. Так, добра, напэўна, ім у Еўрасаюзе. Але не ўсё можна вырашыць. Еўрасаюз падтрымае нейкі час, а потым трэба зарабляць самім. І разам мы можам зарабіць. І, самае галоўнае для нас, праз Латвію мы можам забяспечыць бесперашкодны нармальны выхад да мора з выгадай для сябе. І ў гэтым напрамку мы павінны працаваць", - падкрэсліў Аляксандр Лукашэнка.

Прэзідэнт у цэлым адзначыў, што з Латвіяй у Беларусі складваюцца нядрэнныя адносіны. "Яны разумеюць, што з Беларуссю трэба не проста мірна жыць, а трэба супрацоўнічаць. Таму што вельмі многае нас звязвае. І эканоміка Латвіі завязана на эканоміку Беларусі. І там нам трэба разбірацца ва ўсім гэтым, і патрэбны такі гаспадарлівы чалавек", - сказаў ён.



Пры назначэнні новага пасла ў Фінляндыю Кіраўнік дзяржавы паставіў задачу перанесці вопыт гэтай краіны ў лепшых сектарах эканомікі ў Беларусь. "У нас дрэнныя пазіцыі ў Фінляндыі, а краіна ж вельмі цікавая для нас. І ёсць напрамкі эканомікі абсалютна падобныя, асабліва дрэваапрацоўка. Нам трэба працаваць у тым напрамку, каб вопыт Фінляндыі ў лепшых сектарах эканомікі перанесці на тэрыторыю Беларусі. Абавязкова ў гэтым напрамку трэба рухацца. Трэба працаваць на палітычнае збліжэнне. Але галоўнае, каб быў вынік у эканоміцы", - сказаў беларускі лідар.

Ён таксама пацікавіўся меркаваннем Міністра замежных спраў Уладзіміра Макея наконт кандыдатур новых паслоў. Міністр запэўніў, што дзелавыя якасці і вопыт дыпламатаў дадуць магчымасць ім у поўнай меры працаваць над рэалізацыяй пастаўленых задач.

Пры назначэнні Віталя Воўка памочнікам Прэзідэнта - інспектарам па Віцебскай вобласці Аляксандр Лукашэнка растлумачыў прычыны такога кадравага рашэння, абазначыўшы перад ім канкрэтныя задачы і напрамкі работы.

"Віталь, што датычыцца цябе, зразумела, тут размоў будзе шмат. Адны будуць радавацца, іншыя будуць шкадаваць. У нас жа нямала ў народзе людзей, якія рукі паціраюць: чыноўніку галаву "адсячы" б, "павесіць" кагосьці... Розныя будуць пазіцыі і пункты гледжання, - сказаў Прэзідэнт. - Але май на ўвазе: Орша застаецца за табой. Гэта твая зона адказнасці. І, я думаю, на гэтай пасадзе ў цябе ёсць магчымасць многія пытанні ўзяць на кантроль, падказаць і арганізаваць, як іх вырашыць. Галоўнае, каб вопыт быў перанесены туды".

Аляксандр Лукашэнка адзначыў, што, магчыма, некаторыя будуць першапачаткова глядзець на Віталя Воўка з той пазіцыі, што гэта экс-міністр, "зранены чалавек: галаву апусціць і будзе хадзіць па Віцебскай вобласці". "Каб гэтага не было. З сённяшняга дня пасля назначэння ты павінен праводзіць там лінію Прэзідэнта жалезабетонна і выконваць свае функцыянальныя абавязкі, не гледзячы ні на каго. Так, там ёсць губернатар, яму пастаўлены задачы. Можаш - дапамагай, а, увогуле, трэба ўзяць на кантроль выкананне ўсіх тых даручэнняў, якія датычацца Віцебскай вобласці", - падкрэсліў беларускі лідар.

Кіраўнік дзяржавы асабліва адзначыў, што пасада памочніка прыраўнавана да міністра, а паўнамоцтвы інспектара - яшчэ вышэйшыя, паколькі датычацца кадравых пытанняў. "Нарэшце, напэўна, у Адміністрацыі зразумелі, што такое кадравая работа. Я спадзяюся на гэта. Таму трэба глядзець і ў Віцебскай вобласці. Трэба бачыць там свае кадры і не чакаць, што з боку нехта прыедзе, з Мінскай вобласці ці Мінска, каб працаваць у Віцебскай вобласці", - сказаў Прэзідэнт.

"Я думаю, з тваім вопытам гэта нескладаная для цябе работа. І я хачу адкрыта сказаць: усе будуць задавацца пытаннем, чаму Воўк, - мне проста шкада Воўка як кіраўніка прадпрыемства. Добры жа быў у цябе завод (з верасня 2011 года па снежань 2014 года Віталь Воўк узначальваў Мінскі завод колавых цягачоў). Прыемна паглядзець. Ніякіх пытанняў не было. Я ж бываў тады там. Граматны чалавек. Але трэба з цябе выціснуць для Беларусі максімум. Для мяне гэта важнейшае пытанне. Страціць спецыяліста проста, а вось выгадаваць, знайсці такога спецыяліста будзе складана. Вось шчыры і сумленны адказ", - адзначыў Аляксандр Лукашэнка.

"А тое, што ў цябе галава на плячах, я ніколькі не сумняваюся", - дадаў беларускі лідар.

Прэзідэнт заўважыў, што "хібы і недахопы", дапушчаныя Віталем Воўкам на пасадзе міністра, у некаторай ступені не залежалі ад кіраўніка галіны. "Думаю, табе гэта быў урок. І на гэтай пасадзе (можа, гэта не апошняя твая пасада), думаю, што ты карысць для краіны прынясеш", - сказаў ён.


Тэгі: Кадры
© 2018, Прэс-служба Прэзідэнта Рэспублікі Беларусь