Бел
Галоўная   /  Падзеі  /  Архіў

Перагаворы з губернатарам Стаўрапольскага края Расіі Уладзімірам Уладзіміравым

16 сакавіка 2017 года

Беларусь і Стаўрапольскі край Расіі маюць магутны патэнцыял для істотнага нарошчвання тавараабароту і запуску новых перспектыўных праектаў. Аб гэтым Прэзідэнт Беларусі Аляксандр Лукашэнка заявіў 16 сакавіка на сустрэчы з губернатарам расійскага рэгіёна Уладзімірам Уладзіміравым.

Стаўрапольскі край з'яўляецца адным з найбольш перспектыўных эканамічных партнёраў Беларусі ў Расіі. У мінулым годзе аб'ём узаемнага гандлю склаў $140 млн. Пасля двух гадоў падзення дынаміка яго росту склала 9%. "Аднак гэтага мала. Яшчэ некалькі гадоў таму тавараабарот быў на $100 млн большы. Нам яшчэ шмат чаго трэба зрабіць, каб аднавіць страчанае, а потым прыбавіць, - сказаў Аляксандр Лукашэнка. - Я абсалютна ўпэўнены, што Беларусь і Стаўраполле з нашымі магутнымі патэнцыяламі, развітым агракомплексам не задавольвае сітуацыя, якая склалася. Таму ваш прыезд расцэньваем як імкненне істотна прыбавіць ва ўзаемным гандлі і запусціць новыя перспектыўныя праекты ў галінах, дзе мы цікавыя і карысныя адзін аднаму".

На думку Прэзідэнта, наспела неабходнасць развіцця кааперацыйных сувязей у прамысловасці. "Нам вядомы вашы планы па зборцы аўтамабіляў з кітайскімі і еўрапейскімі кампаніямі. Нам трэба падумаць аб стварэнні сумесных прадпрыемстваў у Стаўраполлі і Беларусі. У перспектыве, спадзяюся, мы зможам арганізаваць сумесныя прадпрыемствы, вытворчасць машын і агрэгатаў, усіх канструкцый, якія вырабляюцца ў Беларусі і якія патрэбны вам, - адзначыў Кіраўнік дзяржавы. - Разам з развіццём кааперацыі нашы акцыянерныя таварыствы "МАЗ", "МТЗ", "Амкадор", "Белкамунмаш" і іншыя гатовы забяспечваць Стаўрапольскі край сваёй прадукцыяй у поўным аб'ёме: і пасажырскай, і грузавой, і камунальнай, і дарожна-будаўнічай тэхнікай".

Для павышэння эфектыўнасці работы аграпрамысловага сектара Беларусь прапануе расійскаму рэгіёну сучаснае тэхналагічнае абсталяванне для рэканструкцыі малочнатаварных ферм. "Мы гэты шлях прайшлі ўжо, таму, напэўна, наш вопыт для вас будзе цікавы. Тым больш што мы вельмі многае робім у гэтым плане ва ўсіх кутках Расіі, нават на Сахаліне", - звярнуў увагу Аляксандр Лукашэнка.

Паскорыць тэмпы абнаўлення парку сельгастэхнікі ў Стаўраполлі змогуць за кошт павелічэння закупак усёй лінейкі беларускай тэхнікі з выкарыстаннем выгадных схем фінансавання. А з улікам планаў рэгіёна па развіцці вінаградарства перспектыўным можа стаць супрацоўніцтва па пастаўках спецыялізаванай тэхнікі, у тым ліку з Мінскага трактарнага завода.

Беларусь таксама прапануе паслугі па праектаванні і будаўніцтве ў Стаўрапольскі краі "пад ключ" розных аб'ектаў. "Мы ў гэтым зацікаўлены, таму што гэта будзе своеасаблівая вітрына магчымасцей Беларусі ў будаўнічым комплексе. Мы гатовы тут паспаборнічаць і з расіянамі, і з вашымі замежнымі партнёрамі", - заўважыў Прэзідэнт.

У кантэксце развіцця інфраструктуры Каўказскіх мінеральных вод была абмеркавана магчымасць выкарыстання беларускіх будаўнічых і аддзелачных матэрыялаў, мэблі і бытавой тэхнікі для будаўніцтва і рэстаўрацыі аб'ектаў санаторна-курортнага прызначэння. Адзначана, што пры неабходнасці прыняць удзел у гэтых работах могуць і беларускія спецыялісты.

"Важнай сферай узаемадзеяння можа быць інавацыйны напрамак. Беларускія вучоныя гатовы падключыцца да рэалізацыі праектаў, якія ажыццяўляюць іх стаўрапольскія калегі ў робататэхніцы і рэсурсазберажэнні, геаінфарматыцы і геафізіцы, мікрабіялогіі і біятэхналогіі, - заявіў Кіраўнік дзяржавы. - Мы адкрытыя для дыялогу па ўсіх пытаннях, якія вас цікавяць".

У сваю чаргу губернатар Стаўрапольскага края падзякаваў Прэзідэнту за цёплы прыём, адзначыўшы, што ў папярэднія гады яму ўжо ўдалося пабываць у Беларусі, азнаёміцца тут з рознымі вытворчасцямі і наведаць шэраг культурных і сацыяльных аб'ектаў.

Уладзімір Уладзіміраў расказаў аб актыўным развіцці сферы сельскай гаспадаркі ў краі, які ён узначальвае, і падкрэсліў, што ў рэгіёне хочуць вярнуцца да пытання арганізацыі зборачнай вытворчасці беларускай тэхнікі і яе сэрвіснага абслугоўвання. У ёй на Стаўраполлі ёсць вялікая патрэбнасць, таму кіраўніцтва края гатова развіваць узаемадзеянне ў гэтым напрамку.

Тэгі: Сустрэчы
© 2017, Прэс-служба Прэзідэнта Рэспублікі Беларусь