Наведванне Спаса-Праабражэнскага храма ў Шклове

Прэзідэнт Рэспублікі Беларусь Аляксандр Лукашэнка 1 мая ў свята Уваскрэсення Хрыстовага наведаў Спаса-Праабражэнскі храм у Шклове. Кіраўнік дзяржавы прысутнічаў на богаслужэнні, паставіў велікодную свечку, а затым цёпла пагаварыў з прыхаджанамі, жыхарамі раённага цэнтра.

Аляксандр Лукашэнка па добрай традыцыі на Вялікдзень наведвае храмы ў рэгіёнах. У гэтым годзе Кіраўнік дзяржавы пабываў на сваёй малой радзіме. Размаўляючы з землякамі, Прэзідэнт адзначыў, што яму добра вядомы праблемы Шклоўшчыны, людзей, якія тут жывуць.

Беларусь як суверэнная дзяржава яшчэ маладая, для яе развіцця ўжо нямала зроблена і яшчэ вельмі многае трэба зрабіць, сказаў Кіраўнік дзяржавы і дадаў, што адчувае вялікую адказнасць за беларускую зямлю. "Я нясу адказнасць перад людзьмі, якія даверылі мне гэту пасаду", - падкрэсліў Прэзідэнт.

Пры гэтым Аляксандр Лукашэнка заклікаў беларусаў адказна працаваць на сваіх месцах дзеля агульнай справы, не перакладваючы на іншых свае праблемы і абавязкі. Дзяржава ж у сваю чаргу акажа неабходную падтрымку. Прэзідэнт лічыць, што кожнаму на сваім месцы трэба крытычна ацэньваць, перш за ўсё, вынікі ўласнай працы, думаючы над тым, як працаваць яшчэ лепш. "І ў нас тады ўсё будзе добра", - упэўнены Кіраўнік дзяржавы.

У час наведвання храма Аляксандр Лукашэнка выказаў удзячнасць свяшчэннаслужыцелям за важкі ўклад, які яны разам з усімі ўносяць у станаўленне і развіццё Беларусі. Кіраўнік дзяржавы павіншаваў прысутных са светлым Уваскрэсеннем Хрыстовым, пажадаў усім здароўя, доўгіх і шчаслівых гадоў жыцця, міру.

У дар храму Аляксандр Лукашэнка перадаў абраз "Мікола з палеоснымі святымі: Міхаіл і Ефрасіння", які напісаны прыкладна ў першай палавіне XX стагоддзя. Кіраўніку дзяржавы епіскап Магілёўскі і Мсціслаўскі Сафроній перадаў абраз свяціцеля Георгія Каніскага, вядомага багаслова, які пакінуў глыбокі след у беларускай гісторыі.