Наведванне Беларускага дзяржаўнага ўніверсітэта фізкультуры

Кіраўнік дзяржавы Аляксандр Лукашэнка патрабуе дабівацца кардынальнага ўздыму прафесійнага спорту, каб на справе пацвярджаць рэпутацыю Беларусі як спартыўнай дзяржавы сусветнага ўзроўню. Аб гэтым Прэзідэнт Беларусі Аляксандр Лукашэнка заявіў 10 красавіка ў час наведвання Беларускага дзяржаўнага ўніверсітэта фізкультуры і сустрэчы з прафесарска-выкладчыцкім складам і студэнтамі.

Прэзідэнта праінфармавалі аб стане і перспектывах развіцця ўніверсітэта, а таксама аб выкананні даручэнняў па завяршэнні будаўніцтва і ўводзе ў эксплуатацыю плавальнага басейна. Кіраўнік дзяржавы пабываў на трэніроўцы нацыянальнай каманды Беларусі па плаванні, вучэбна-трэніровачных занятках зборных каманд па скачках у ваду і сінхронным плаванні, а таксама занятках зборных каманд універсітэта па водным пола, спартыўных танцах.

Акрамя таго, Аляксандру Лукашэнку далажылі аб выкананні даручэнняў па завяршэнні будаўніцтва і ўводзе ў эксплуатацыю лёгкаатлетычнага манежа. Ён таксама пабываў на трэніроўцы нацыянальнай каманды Беларусі па лёгкай атлетыцы. Кіраўнік дзяржавы паразмаўляў са спартсменамі.

На сустрэчы з прафесарска-выкладчыцкім складам і студэнтамі Прэзідэнт адзначыў, што задаволены зменамі, якія адбыліся, у ВНУ, у прыватнасці, абноўленай спартыўнай інфраструктурай. "Усё атрымалася, як было задумана. Створаны ўнікальны, вельмі моцны спартыўны цэнтр. Цяпер - справа за вамі. Нам патрэбны таленавітыя спартсмены, трэнеры, і галоўнае - нацэленасць на вынік", - падкрэсліў ён.

Кіраўнік дзяржавы лічыць, што ў Беларусі спорту ўдзяляецца павышаная ўвага. На яго развіццё накіроўваюцца значныя дзяржаўныя рэсурсы. Прычым умовы для заняткаў фізкультурай створаны для ўсіх слаёў насельніцтва. Прэзідэнт запатрабаваў, каб усе спартыўныя залы і комплексы былі заняты з раніцы да вечара. На яго думку, гэтыя спартыўныя збудаванні павінны быць задзейнічаны пастаянна. Пры гэтым прыярытэт павінен быць для спартсменаў, а ўжо затым - для жадаючых займацца фізкультурай і спортам.

Прэзідэнт звярнуў асаблівую ўвагу на той факт, што спартыўныя федэрацыі і асацыяцыі ў краіне ўзначальваюць кіраўнікі самага высокага рангу, якія могуць поўнасцю кантраляваць працэсы ў курыруемым імі відзе спорту. Як паказала практыка, вынік ад гэтага сапраўды ёсць. Беларусь прымае ў сябе ўсё больш спартыўных мерапрыемстваў сусветнага маштабу. У прыватнасці, паспяхова прайшоў чэмпіянат свету па хакеі ў 2014 годзе. У бягучым годзе ў Раўбічах прайшоў чэмпіянат свету па біятлоне сярод юніёраў і юнакоў. Праз тыдзень Мінск прыме чэмпіянат свету па футзале, а ў канцы красавіка стартуе чэмпіянат Еўропы па мастацкай гімнастыцы.

Беларусь таксама заваявала права прыняць Еўрапейскі алімпійскі фестываль моладзі ў 2019 годзе. Акрамя таго, рыхтуюцца заяўкі на правядзенне чэмпіянату Еўропы па лёгкай атлетыцы ў закрытых памяшканнях у 2019 годзе і чэмпіянату свету па хакеі з шайбай 2021 года.

"Вядома, мы чакаем перамог і рэкордаў ад нашых спартсменаў-прафесіяналаў", - падкрэсліў Прэзідэнт.

Ён сказаў, што адной з галоўных мэт з'яўляецца фарміраванне адукаванай і здаровай нацыі. Для гэтага ў краіне праводзіцца нямала розных мерапрыемстваў, у тым ліку рэспубліканскага ўзроўню - "Беларуская лыжня", "Залатая шайба", "Скураны мяч", галіновыя спартакіяды. На рэгіянальным ўзроўні таксама праводзяцца масавыя спаборніцтвы. Рэгулярна ў абласцях, гарадах, раёнах праходзяць спартыўныя святы, фестывалі і турніры. Людзі бачаць гэту работу і далучаюцца да фізічнай культуры.

Аляксандр Лукашэнка падкрэсліў, што ў Беларусі створаны ўсе перадумовы для пераходу на новы якасны ўзровень развіцця фізічнай культуры насельніцтва. Паводле слоў Кіраўніка дзяржавы, прыярытэтнымі напрамкамі ў фізкультурна-аздараўленчай і спартыўна-масавай рабоце павінна стаць развіццё спорту сярод школьнікаў і сельскага насельніцтва. Дадатковы імпульс трэба надаць развіццю масавага спорту ў працоўных калектывах. Згодна з сацыялагічнымі апытаннямі, фізічная актыўнасць грамадзян рэзка зніжаецца пасля 23 гадоў, гэта значыць з прыходам пасля заканчэння ВНУ на работу.

Акрамя таго, Прэзідэнт выказаў меркаванне, што створаныя ў 2006 годзе рэспубліканскія галіновыя фізкультурна-спартыўныя клубы маюць патрэбу ў больш цесным супрацоўніцтве з міністэрствамі і Федэрацыяй прафсаюзаў Беларусі. Кіраўнікоў прадпрыемстваў і прафсаюзаў неабходна нацэліць на выпраўленне такога стану спраў у працоўных калектывах.

Аляксандр Лукашэнка запатрабаваў перагледзець існуючыя падыходы да развіцця студэнцкага спорту. Кіраўнік дзяржавы падкрэсліў, што Міністэрству адукацыі трэба планамерна займацца пераўтварэннямі ў гэтай сферы, каб дзейнасць Беларускай асацыяцыі студэнцкага спорту прыносіла рэальную карысць краіне. На яго думку, выправіць негатыўныя тэндэнцыі могуць сапраўдныя прафесіяналы - спартыўныя менеджары і маркетолагі, вучоныя, трэнеры. "Перад вамі стаяць адказныя задачы, на выкананне якіх павінен быць накіраваны ўвесь навуковы, творчы і кадравы патэнцыял галіны", - адзначыў Кіраўнік дзяржавы.

Паводле яго слоў, ад якасці падрыхтоўкі кадраў у адзінай профільнай ВНУ краіны залежыць эфектыўнасць усёй піраміды спорту. Менавіта перад універсітэтам стаіць задача падрыхтоўкі спецыялістаў адпаведных прафесій, тых, хто будзе запатрабаваны пераважна ў нашай краіне. "Кіраўніцтву спартыўнай галіны павінна быць сорамна, калі дыпламаваныя спецыялісты вымушаны шукаць сябе ў іншых сферах", - сказаў Аляксандр Лукашэнка.

"Лічу, што менавіта ваша ВНУ павінна задаваць тон усёй спартыўнай адукацыі і спартыўнай навуцы. Дзейнічаючы ў пастаянным кантакце з нацыянальнымі камандамі, універсітэт павінен напаўняць спорт перадавымі даследаваннямі. Без іх немагчыма ні адна перамога на высокім спартыўным узроўні", - адзначыў Кіраўнік дзяржавы. Прэзідэнт звярнуў асаблівую ўвагу на тое, што ў кожным відзе спорту павінна ажыццяўляцца пастаянная сувязь паміж тэорыяй і практыкай.

Асаблівую значнасць маюць падрыхтоўка дастойнай маладой змены спартсменаў, адбор і выхаванне таленавітай і мэтанакіраванай моладзі, дадаў Прэзідэнт.

"У нас ёсць усе складнікі спартыўнага поспеху - нармальная інфраструктура, прафесійныя трэнеры, таленавітыя дзеці. Новыя спартыўныя аб'екты павінны стаць домам для нацыянальных каманд па відах спорту", - лічыць Аляксандр Лукашэнка.

Прэзідэнт падкрэсліў, што ва ўніверсітэце асаблівае значэнне павінна ўдзяляцца патрыятычнаму выхаванню спартсменаў і трэнераў. Паводле яго слоў, перамагаючы на арэнах, спартсмены робяць вельмі шмат для іміджу краіны. "Не выпадкова спорт называюць лепшай формай для развіцця добрасуседства і ўзаемаразумення паміж дзяржавамі", - сказаў Кіраўнік дзяржавы.

Ён таксама падкрэсліў, што дзякуючы дзяржаўнай падтрымцы дасягнуты пазітыўныя вынікі ў гульнявых відах спорту. "У канцы гэтага года мне павінны ўнесці прапановы аб далейшых умовах аказання падтрымкі гульнявым відам спорту. Таму клубам, гульнявым федэрацыям і мясцовым органам улады ўжо сёння неабходна перагледзець свае падыходы да работы з балельшчыкамі, спартыўным рэзервам і развіцця інфраструктуры", - лічыць Прэзідэнт.

У час сустрэчы са спартсменамі Аляксандр Лукашэнка таксама сказаў, што дзяржава будзе падтрымліваць тых, хто дае рэзультат. Будзе рэзультат - будзе падтрымка, заявіў ён.

Аляксандр Лукашэнка даручыў ураду аптымізаваць сістэму дзіцяча-юнацкіх спартыўных школ, вызначыцца з тым, дзе неабходнасць пакінуць ДЮСШ, колькі ў іх павінна быць спецыялістаў і колькі там будзе займацца дзяцей. Цяпер у Беларусі амаль 500 такіх школ. "Вялікіх спартсменаў там выдавалі на-гара? Нават калі б па адным са школы кожны год - нам не было б куды дзяваць спартсменаў. Гэтага няма таму, што дзіцяча-юнацкія школы не ўсюды працуюць добра", - сказаў Прэзідэнт.

Кіраўнік дзяржавы падкрэсліў, што і спартсмены, і трэнеры ў Беларусі могуць разлічваць на высокую аплату працы, калі дасягаюць значных вынікаў. Пры гэтым выключна важна стварыць умовы для нармальнай работы дзіцяча-юнацкіх спартыўных школ. "Нараўне са звычайнымі ўрокамі фізкультуры гэта магчымасць далучыць дзіця да здаровага ладу жыцця і знайсці "зорачак", якія калі-небудзь будуць ярка ззяць на спартыўным небасхіле, заваёўваючы прызавыя месцы на чэмпіянатах Еўропы, свету і Алімпійскіх гульнях", - адзначыў Аляксандр Лукашэнка.

У дзіцяча-юнацкіх спартыўных школах фарміруецца характар будучых спартсменаў, дадаў Прэзідэнт. "Аб гэтым чамусьці мала гавораць, пішуць і здымаюць. Рэклама дзіцячага спорту і здаровага ладу жыцця павінна быць па-добраму агрэсіўнай, каб дзіця, малады чалавек паглядзелі адзін раз і ў іх узнікла жаданне паўтарыць тое, што ўбачылі з боку вялікіх спартсменаў", - лічыць Прэзідэнт.

Кіраўнік дзяржавы паразмаўляў са спартсменамі, выкладчыкамі і студэнтамі ўніверсітэта, адказаў на пытанні аб падтрымцы маладых спецыялістаў, перспектывах развіцця розных відаў спорту ў Беларусі, у тым ліку студэнцкага.

У прыватнасці, у Беларусі прапануецца заключаць са студэнтамі спартыўных спецыяльнасцей кантракты пры паступленні. У час сустрэчы Прэзідэнту было зададзена пытанне, якія меры трэба прыняць, каб маладыя спецыялісты-трэнеры не звальняліся з месца размеркавання пасля адпрацоўкі вызначаных двух гадоў. Паводле слоў Аляксандра Лукашэнкі, дзяржава зацікаўлена ў тым, каб студэнт пасля заканчэння ВНУ бачыў сябе толькі ў той сферы дзейнасці, на якую быў нацэлены пры паступленні. Прапануецца, напрыклад, заключаць кантракт са студэнтамі бюджэтнай формы навучання, дзе будуць прапісаны абавязкі дзяржавы і маладога чалавека.

"Калі вы занялі гэта месца і бачыце сябе трэнерам - ідзіце працаваць трэнерам", - падкрэсліў Аляксандр Лукашэнка.

Перад гэтым трэба вызначыцца, колькі дзяржаве кожны код трэба такіх спецыялістаў - у дзіцяча-юнацкіх спартыўных школах, цэнтрах алімпійскага рэзерву. Адпаведнае даручэнне Прэзідэнт ужо даў ураду.

Рост зарплат будзе залежаць ад канкрэтных дасягненняў і аддачы спецыяліста.

Сярод зададзеных былі і пытанні аб сяброўстве, аб шчасці. Прэзідэнт, у прыватнасці, сказаў: "Калі вы перамагаеце на нейкіх вялікіх спаборніцтвах - гэта для мяне шчасце. Вы нават не ўяўляеце, як я за вас перажываю, за кожнага спартсмена".

У размове закраналася і тэма Вялікай Перамогі. "Для мяне гэта - памяць. Мы ні ў якім выпадку не павінны страціць гэту Вялікую Перамогу. А ў нас яе спрабуюць так ці іншак адабраць. Больш таго, нас спрабуюць зрабіць ледзь ці не віноўнікамі развязвання Другой сусветнай вайны. Таму для мяне галоўнае, каб гэта Перамога засталася ў вашай памяці і памяці вашых дзяцей. Вельмі важна, каб яны ведалі, хто супраць каго ваяваў і чаго нам каштавала гэта Вялікая Перамога і гэта вайна, якая пракацілася па нашай тэрыторыі", - падкрэсліў Прэзідэнт.

На яго думку, Вялікая Перамога павінна сведчыць аб тым, што войны недапушчальныя. "Чаму мы так актыўна ўключаны ў нармалізацыю працэсаў ва Украіне? Гэта вайна не дзесьці там на Блізкім Усходзе, гэта вайна ўжо каля нашага парога. Таму нам нельга дапусціць эскалацыі гэтага канфлікту", - перакананы Кіраўнік дзяржавы.

Ён падкрэсліў: "Вялікая Перамога - наш здабытак, наш вялікі актыў, які мы запісалі сабе ў сваёй гісторыі".

Кіраўнік дзяржавы пажадаў спартсменам быць дастойнымі грамадзянамі сваёй краіны і з гонарам прадстаўляць Беларусь на сусветнай арэне.