Бел
Галоўная   /  Падзеі

Рабочая паездка ў Магілёўскую вобласць

26 сакавіка 2019 года
Рабочая паездка ў Магілёўскую вобласць
глядзіце таксама: фота
25 сакавіка 2019 года
Рабочая паездка ў Магілёўскую вобласць
16 фота

Прэзідэнт Беларусі Аляксандр Лукашэнка  25-26 сакавіка зрабіў рабочую паездку ў Магілёўскую вобласць.

З пачаткам у краіне веснавых палявых работ Кіраўнік дзяржавы традыцыйна наведвае розныя рэгіёны краіны, каб асабіста азнаёміцца і пракантраляваць узровень гаспадарання на зямлі і тое, наколькі эфектыўна на месцах вырашаюцца праблемы, што ўзнікаюць. У цэнтры ўвагі і пытанні сацыяльна-эканамічнага развіцця абласцей, выкананне намечаных планаў.

У час рабочай паездкі ў Магілёўскую вобласць 25-26 сакавіка Аляксандр Лукашэнка падрабязна азнаёміўся са станам спраў у рэгіёне, наведаў прадпрыемствы аграпрамысловага комплексу. Агульныя лічбы не ўражваюць: па тэмпах развіцця эканомікі ў 2018 годзе Магілёўская вобласць на апошнім месцы ў Беларусі (101,6%), а па выніках студзеня-лютага 2019 года - на перадапошнім (100,7%). Апошнія месцы ў рэгіёна і ў разрэзе ключавых напрамкаў работы - прамвытворчасць, сельская гаспадарка, экспарт. А ў пачатку бягучага года ў сельгасвытворчасці і экспарце ў прынцыпе зафіксаваны спад аб'ёмаў у параўнанні з аналагічнымі паказчыкамі мінулага года.

Варта нагадаць, што кіраўніку рэгіёна Уладзіміру Даманеўскаму тыдзень таму разам са старшынёй Віцебскага аблвыканкама была аб'яўлена вымова за незабеспячэнне выканання даручэння Прэзідэнта Беларусі аб своечасовай выплаце заработнай платы.

Калі ўсё гэта стала фонам мінулай рабочай паездкі Кіраўніка дзяржавы, то на месцах з-за безгаспадарчасці сітуацыя аказалася не менш засмучальнай. Вядома, ёсць станоўчыя моманты. У тым жа сельгаспрадпрыемстве "Газавік-Сіпакова" ў аграгарадку Дабрэйка, якое наведаў Прэзідэнт, вядуць размову аб пашырэнні вытворчасці мяса-малочнай прадукцыі, шукаюць новыя напрамкі работы, а ў мінулым годзе сярэдняя заработная плата ў гаспадарцы склала амаль Br900. Аднак Аляксандр Лукашэнка ў цэлым падкрэсліў, што не задаволены развіццём сельскай гаспадаркі ў Магілёўскай вобласці і паабяцаў прыняць жорсткія меры. "У вас правал па ўсіх напрамках. І прытым не на паўтара-працэнт", - канстатаваў ён.

Прэзідэнт нагадаў, што раней адказным службовым асобам даручалася выправіць стан спраў у сельскай гаспадарцы Магілёўскай вобласці, аднак бачных вынікаў няма: "Ім было сказана, у тым ліку і Даманеўскаму: не будзе выпраўлена сітуацыя на працягу года - будзем прымаць меры".

Прэзідэнт адзначыў, што на фоне іншых прадпрыемстваў у вобласці "Газавік-Сіпакова" працуе добра, але трэба развіваць новыя напрамкі. "Патрэбна адметнасць у кожнай гаспадарцы, як даўней працаваць нельга - гэта бяда, - падкрэсліў Кіраўнік дзяржавы. - Трэба не толькі генерыраваць новыя ідэі, але і ствараць новыя напрамкі развіцця".

Вырабляць, звярнуў ён увагу, трэба запатрабаваную на рынку прадукцыю: калі, напрыклад, попытам карыстаюцца брусніцы ці грыбы, трэба заняцца іх вырошчваннем. "Вам трэба падумаць аб сур'ёзных перспектывах. Так, гэта паўночныя рэгіёны, тут, напэўна, лазу вінаградную не пасееш, імпартазамяшчэннем займацца не будзеш. Але ўсё роўна па імпарце мы шмат чаго завозім", - адзначыў Аляксандр Лукашэнка.

"Яго ўзровень развіцця такі, што ён павінен не проста ўзараць, пасеяць, камбікармы вырабіць, аддаць каровам, перапрацаваць быкоў на мяса, а ад кароў атрымаць малако. Гэта элементаршчына. Пры такой ужо базе трэба думаць, як апрацоўваць пойму Дняпра, якіх баранаў, авечак на гэтай пойме гадаваць, - сказаў Прэзідэнт. - У гэтым сутнасць развіцця сельскай гаспадаркі і ў гэтым сутнасць сказанага ў Баранавічах. Усё, традыцыйна працаваць забылі - гэта павінна працаваць аўтаматам. Трэба ствараць новае".



У "Газавік-Сіпакова" ён таксама азнаёміўся з гатоўнасцю тэхнікі да палявых работ, умовамі яе захоўвання і абслугоўвання, паразмаўляў з механізатарамі і наведаў некалькі рамонтных цэхаў.

На наступны дзень, 26 сакавіка, Кіраўнік дзяржавы наведаў малочнатаварны комплекс "Сліжы" ААТ "Амкадор-Шклоў", які належыць да аграхолдынга "Купалаўскае".

Аляксандр Лукашэнка адзначыў, што ў СМІ, асабліва ў расійскіх, яго паездкі па сельгаспрадпрыемствах тлумачаць тым, што работа па развіцці галіны не дала чаканых вынікаў і трэба прымаць новыя рашэнні."Трэба разумець, што без гэтых стратных гаспадарак мы лёгка можам жыць і працаваць, таму што частка мадэрнізаванай сельскай гаспадаркі дае нам поўнае спажыванне малака ўнутры краіны і на экспарт. Таму мы без тых 20-25% слабых гаспадарак, якія ў нас яшчэ ёсць, наогул можам абысціся ў плане вытворчасці прадукцыі. Але там жа жывуць нашы людзі, там жа ёсць глеба, зямля, якую трэба апрацоўваць. Таму мы не кідаем гэтыя гаспадаркі, вёскі і людзей, а паднімаем іх", - заявіў Прэзідэнт.

"Нам трэба 100% зямлі, якая знаходзіцца ў севазвароце, падняць, стварыць нармальную вытворчасць, і галоўнае людзі - мы ж не можам пакінуць іх без увагі. Вось у чым сэнс сённяшніх размоў. Плюс навінка, новае нешта павінна быць: новыя віды прадукцыі, імпартазамяшчэнне і гэтак далей", - дадаў Кіраўнік дзяржавы.

Аляксандра Лукашэнку праінфармавалі аб развіцці ў краіне малочнай галіны і ходзе будаўніцтва малочнатаварных комплексаў. Кіраўнік дзяржавы асобна закрануў дзейнасць прадпрыемстваў у Шклоўскім раёне. "Чаму мы зноў займаемся Шклоўскім раёнам? Таму што я ведаю тут кожную гаспадарку. Таму мы спакойна на працягу, напэўна, 10-12 гадоў прыводзім у парадак раён, але не толькі яго", - адзначыў Прэзідэнт.

Ён нагадаў, што ў 2017 годзе некалькі гаспадарак былі аб'яднаны ў буйны аграхолдынг "Купалаўскае". "Просяцца і іншыя ў гэты холдынг, але спяшацца не трэба. Трэба спачатку яго выбудаваць і паглядзець, што атрымаецца", - сказаў Аляксандр Лукашэнка. Кіраўнік дзяржавы пацікавіўся вытворча-эканамічнымі паказчыкамі работы холдынга і ААТ "Амкадор-Шклоў", якое ўваходзіць у яго структуру.

Асаблівая ўвага была ўдзелена рэканструкцыі жывёлагадоўчых аб'ектаў у гаспадарках аграхолдынга і развіццю свінагадоўчай галіны. "Праз два месяцы павінна быць поўная яснасць са свінагадоўляй. Мы павінны ў "Купалаўскім" выйсці на канечную прадукцыю і гандаль гэтай прадукцыяй, - падкрэсліў Прэзідэнт. - Вось якая задума была па "Купалаўскім".









Пасля дакладаў Кіраўнік дзяржавы вырашыў асабіста азнаёміцца з умовамі ўтрымання буйной рагатай жывёлы і станам вытворчых памяшканняў, і тут зноў выявіліся істотныя недапрацоўкі. Аляксандр Лукашэнка абурыўся ўмовамі, у якіх утрымліваюцца жывёлы, а таксама адсутнасцю парадку ў вытворчых памяшканнях. "Калі чалавек не разумее, што гэта Асвенцім, а вы яго ставіце кіраўніком холдынга, я вас наогул не разумею", - сказаў ён.

"Колькі комплекс працуе? Два гады? А мне здаецца, што гадоў дзесяць, - адзначыў Аляксандр Лукашэнка. - Тут ніколі ніхто не прыбірае па-чалавечы".

У такім жа стане Прэзідэнт застаў і мехдвор гаспадаркі: закінутая тэхніка ў ангарах, металалом, раскіданыя запчасткі і абсталяванне, якое патрабуе рамонту. "Вакол могілкі - што на вуліцы, што пад дахам", - звярнуў увагу Кіраўнік дзяржавы. І гэта нягледзячы на тое, што напярэдадні тэрыторыю правяраў кіраўнік аграхолдынга і там "наводзілі парадак".

На мехдвары ў неналежных умовах захоўваецца непрацуючая тэхніка, якую не могуць адрамантаваць ужо некалькі гадоў, ён захламлены металаломам і старымі запчасткамі. У ангарах - куча зламанага абсталявання. Як аказалася, некаторую тэхніку купілі нядаўна, аднак не выкарыстоўвалі, з цягам часу яна стала непрыдатнай.

У выніку Аляксандр Лукашэнка даручыў зняць з пасад усіх вінаватых і ўзбудзіць крымінальныя справы: "Каб на стале ляжаў спіс усіх, што мяне тут суправаджаў. Акрамя губернатара і іншых тут яшчэ былі канкрэтныя людзі, якія павінны былі за гэта адказваць, - заявіў Кіраўнік дзяржавы. - Леанід Васільевіч (Леанід Анфімаў, Старшыня Камітэта дзяржкантролю. - Заўвага), узбудзіць крымінальную справу з усёй строгасцю закона. Вінаваты - наручнікі і адразу ў следчы ізалятар".

Цяперашняга старшыню Шклоўскага райвыканкама Васіля Віцюнова вырашана назначыць кіраўніком аграхолдынга "Купалаўскае", а памочніка Прэзідэнта па Магілёўскай вобласці Генадзя Лаўранкова - выконваючым абавязкі старшыні райвыканкама. Выконваць абавязкі губернатара Магілёўскай вобласці пакуль будзе яго цяперашні першы намеснік Мікалай Кароцін.

Па іншых службовых асобах Аляксандр Лукашэнка даручыў Адміністрацыі Прэзідэнта ўнесці прапановы ў бліжэйшы час.


Тэгі: Паездкі
© 2019, Прэс-служба Прэзідэнта Рэспублікі Беларусь