Нарада па праекце дэкрэта "Аб узмацненні барацьбы з безгаспадарчасцю і павышэнні патрабаванняў да кіруючых кадраў усіх узроўняў"

Без выкаранення безгаспадарчасці немагчыма павышэнне эфектыўнасці ўсіх галін эканомікі. Аб гэтым заявіў Прэзідэнт Рэспублікі Беларусь Аляксандр Лукашэнка 12 жніўня на нарадзе па праекце дэкрэта "Аб узмацненні барацьбы з безгаспадарчасцю і павышэнні патрабаванняў да кіруючых кадраў усіх узроўняў".

"Адной з важнейшых задач з'яўляецца павышэнне эфектыўнасці гаспадарання ва ўсіх галінах эканомікі. Без выкаранення безгаспадарчасці, узмацнення запатрабавання і павышэння адказнасці кіруючых кадраў дасягнуць гэтага практычна немагчыма", - падкрэсліў Прэзідэнт.

Аляксандр Лукашэнка нагадаў, што даручаў Адміністрацыі Прэзідэнта падрыхтаваць вычарпальны нарматыўны акт, у якім дакладна абазначыць пазіцыю дзяржавы адносна тых, хто дапускае правалы ў рабоце. На яго думку, нельга мірыцца з сітуацыяй, калі кіраўнік, які праваліў справу, бяздарны і, горш таго, нячысты на руку, спакойна перасаджваецца з аднаго сытнага і цёплага месца ў іншае. "Аб гэтым не аднойчы сказана, - адзначыў Кіраўнік дзяржавы. - Сёння размова ідзе аб тым, каб гэтаму была нададзена форма нарматыўна-прававога акта".

"Зразумела, што непатапляльнасць гэтых гора-кіраўнікоў асноўваецца на такіх негатыўных з'явах, як кумаўство, пратэкцыянізм і кругавая парука па прынцыпе: ты - мне, я - табе. У выніку дзейнасць такіх кіраўнікоў наносіць вялізны ўрон не толькі канкрэтнаму прадпрыемству або арганізацыі, але і краіне ў цэлым. Людзі бачаць усё і пераносяць сваё абурэнне часта на тыя органы ўлады, якія дапускаюць такія падыходы ў кадравай палітыцы", - падкрэсліў Прэзідэнт.

На думку Кіраўніка дзяржавы, гэта адбываецца ў першую чаргу таму, што няма належнага спагнання з кіраўнікоў як за стан спраў, так і за падбор кадраў, а таксама з радавых выканаўцаў і тых, хто пакрывае нядбайных кіраўнікоў.

Прэзідэнт падкрэсліў, што перад распрацоўшчыкамі дэкрэта былі пастаўлены канкрэтныя задачы. "Па-першае, запатрабаванне з кіраўнікоў усіх узроўняў павінна быць жорсткім і персанальным, - падкрэсліў Аляксандр Лукашэнка. - Кіраўнік абавязаны адказваць за агульны стан спраў на давераным яму ўчастку работы або прадпрыемстваў без усялякіх выключэнняў - ад выканання даведзеных заданняў да бяспекі работнікаў, парадку ў цэхах, у двары, на складах. У тым ліку за добраўпарадкаванне сваёй і прылеглай тэрыторыі. За неналежнае выкананне сваіх службовых абавязкаў нядбайны кіраўнік павінен быць сур'ёзна пакараны".

Па-другое, асобы, якія кампраметавалі сябе, не павінны мець магчымасці ў далейшым працаўладкавацца на кіруючыя пасады. "Увядзенне абмежавання на назначэнне такіх асоб, аж да забароны для пэўных катэгорый, - гэта строгая мера, але іншага выйсця няма, калі хочам навесці парадак у краіне і падтрымліваць гэты парадак", - падкрэсліў Прэзідэнт.

Ён таксама адзначыў, што за 2012-2013 гады па дыскрэдытуючых абставінах вызвалены з пасад 16 кіраўнікоў з кадравага рэестра Кіраўніка дзяржавы. А ў гэтым годзе - ужо 13. З рэестраў рэспубліканскіх і мясцовых выканаўчых органаў адпаведна 67 і 26 чалавек. "Прычым мне дакладваюць, што прыкладаў паўторнага назначэння такіх асоб на кіруючыя пасады як у дзяржаўныя, так і ў прыватныя структуры дастаткова", - сказаў Аляксандр Лукашэнка.

Кіраўнік дзяржавы падкрэсліў: "Размова ідзе не толькі аб тым, што звольнены кіраўнік не можа працаваць на дзяржаўных пасадах, але і ў прыватную структуру ўладкавацца кіраўніком таксама не можа. Таму што часта мы назіраем выпадкі, калі ён працуе на дзяржаўнай службе і ўжо ў яго гатовы некалькі камерцыйных структур, куды ён можа пайсці і жыць спакойна. Гэта значыць, працуючы на дзяржаўнай службе, ён не на дзяржаву працуе, а на сябе, ствараючы, так ці інакш, гэтыя прыватныя структуры. Таму тут пралаз таксама закрываецца".

Як адзначыў Аляксандр Лукашэнка, такую заганную практыку ніхто ў краіне цярпець не будзе. Кіраўнік дзяржавы папярэдзіў: "Патурання і перасаджвання з месца на месца тых, хто праваліў справу, быць не павінна. Гэта датычыцца ўсіх кіраўнікоў - і цывільных, і людзей у пагонах - без выключэння".

"Па-трэцяе, я даручаў мясцовыя органы ўлады надзяліць самымі высокімі паўнамоцтвамі ў пытаннях узгаднення назначэння службовых асоб на іх тэрыторыі, - прадоўжыў Прэзідэнт. - Калі кіраўнік у раёне або вобласці назначаецца на якую-небудзь пасаду, мясцовыя органы ўлады павінны ў абавязковым парадку мець да гэтага дачыненне. У той жа час трэба павысіць адказнасць мясцовых органаў улады за падбор кадраў. Майце на ўвазе, калі будуць выяўлены выпадкі злоўжыванняў на месцах такімі паўнамоцтвамі, крыўдуйце на сябе".

Па-чацвёртае, як адзначыў Аляксандр Лукашэнка, неабходна ўстанавіць адзіныя падыходы як для дзяржаўных, так і для прыватных арганізацый у пытаннях выкаранення безгаспадарчасці і ўмацавання вытворчай дысцыпліны. Тут не трэба рабіць ніякіх адрозненняў. Усе гэтыя прадпрыемствы працуюць у нашай краіне, на іх працуюць нашы людзі, таму і патрабаванні павінны быць для ўсіх аднолькавымі, лічыць Прэзідэнт.

Аляксандр Лукашэнка пацікавіўся, ці дастатковыя прапанаваныя ў праекце дэкрэта меры, каб не давялося праз нейкі час вяртацца да гэтай тэмы і ўносіць дапаўненні і змяненні ў нарматыўна-прававыя акты.

"Мяне хвалюе толькі адно, што гэты дакумент перш за ўсё закране тых, хто сядзіць тут за сталом, а таму не атрымалася б так, што кожны будзе тварыць праект гэтага дэкрэта і бачыць сябе. Я хацеў бы вас ад гэтага перасцерагчы. Мы закладваем аснову будучай работы з кіруючымі кадрамі ў нашай краіне, і кожны павінен глядзець не на сябе, а на тое, як гэта будзе ў перспектыве", - падкрэсліў Прэзідэнт.

Кіраўнік дзяржавы таксама закрануў тэму павышэння патрабавальнасці кіраўнікоў да сваіх падначаленых.

"Мы, зразумела, павышаем патрабавальнасць да кіраўнікоў, спецыялістаў, але трэба мець на ўвазе, што і кіраўнік павінен мець аналагічныя правы ў адносінах да сваіх падначаленых, - упэўнены Кіраўнік дзяржавы. - Таму што нават у савецкія часы часта бывала, што з кіраўніка тры шкуры спусцяць, а ён, у сваю чаргу, не можа запатрабаваць як належыць (асабліва апошнія гады існавання Савецкага Саюза) са сваіх падначаленых. І адсюль адбываліся разбурэнне працоўнага калектыву, арганізацыі, а таксама парушэнні працоўнай дысцыпліны".

Таму, лічыць Аляксандр Лукашэнка, трэба паглядзець у гэтай частцы на наша заканадаўства. "Да ўсіх павінны быць роўныя патрабаванні - ад рабочага, селяніна да кіраўніка любога рангу і любога ўзроўню", - запатрабаваў Прэзідэнт.

Кіраўнік Адміністрацыі Прэзідэнта Андрэй Кабякоў дэталёва спыніўся на асноўных палажэннях дакумента. На яго думку, рэалізацыя норм дэкрэта дасць магчымасць зрабіць больш строгімі патрабаванні да кандыдатаў на кіруючыя пасады, павысіць персанальную адказнасць кожнага кіраўніка за дзейнасць узначаленай ім арганізацыі незалежна ад формы ўласнасці і ўмацаваць вытворчую дысцыпліну.

Першы намеснік старшыні Камітэта дзяржаўнага кантролю Леанід Анфімаў прывёў канкрэтныя прыклады безгаспадарчасці, якія назіраюцца не толькі ў дзяржаўных, але і прыватных структур.

Аляксандр Лукашэнка лічыць дэкрэт вельмі важным і актуальным.

"Мяне не сам факт безгаспадарчасці і бардаку абурае часам, а абурае бяздзейнасць. Тое, што можна зрабіць літаральна за некалькі сутак, мы не робім гадамі", - адзначыў Кіраўнік дзяржавы. У якасці прыкладу ён прывёў сітуацыю з Мінскім морам. "Калі ўсталявалася анамальная гарачыня, куды мы ўсе памкнуліся? Да вады. І што там робіцца - гэта кашмар! І трэба было двойчы Прэзідэнту кулаком стукнуць, вобразна кажучы, і згадаць аб сваім даручэнні, каб за суткі прывялі ўзбярэжжа Мінскага мора ў больш-менш нармальны стан. Дык а чаму раней гэтага не зрабілі?! - адзначыў Прэзідэнт. - Прысутныя тут, вы што, гэтага не бачыце? Вы што, чакаеце, пакуль Прэзідэнт недзе пратупае па сцежцы і дасць указанне або запатрабуе навесці парадак? Вось гэта наша сапраўднае стаўленне да выканання свайго дзяржаўнага абавязку".

"А пасля гэтага ўсе крычаць: зарплата малая! Дык за што плаціць грошы?" - заўважыў Кіраўнік дзяржавы.

"Я ўжо не кажу пра міністраў, старшынь аблвыканкамаў, райвыканкамаў. У вас што, не хапае паўнамоцтваў для таго, каб запатрабаваць з падначаленых? Ды хапае ўсяго! - лічыць Прэзідэнт. - У нас жа людзі здагадлівыя: калі ім даў указанне, яны бягом пойдуць выконваць, начальнік сказаў - трэба рабіць. Калі не зроблена - значыць, начальнік проста не сказаў і гэтага не бачыць. А калі бачыць, то ён з гэтым змірыўся або проста не лічыць патрэбным вырашаць гэтыя праблемы. Гэта значыць, вораг. Вось і ўсё пытанне".

"Кіраўнікоў трэба ўзварушыць па поўнай, даўшы ім жорсткія і ўсёабдымныя правы для выканання сваіх функцыянальных абавязкаў і запатрабавання з падначаленых", - падкрэсліў Прэзідэнт.

Аляксандр Лукашэнка даручыў дапрацаваць дакумент на працягу трэцяга квартала, каб з чацвёртага квартала ён ужо ўступіў у дзеянне.

Прэзідэнт падкрэсліў, што дэкрэт павінен быць збалансаваным, кампактным, дзейсным і мець усёабдымны характар.

"Гэты дакумент не павінен быць пудзілам у руках Прэзідэнта або нейкага дзяржаўнага органа. У гэтым дакуменце кожны кіраўнік, ад старшыні райвыканкама да прэм'ер-міністра, перш за ўсё павінен бачыць інструмент навядзення парадку", - адзначыў Кіраўнік дзяржавы.

"А цяпер не чакайце, што ён з'явіцца і мы навядзём парадак. У прынцыпе ў нас хапае волі і рашучасці і нарматыўных актаў для таго, каб гэты парадак сёння мець. Таму дзейнічайце", - падкрэсліў Прэзідэнт.