Бел
Галоўная   /  Падзеі

Нарада па актуальных пытаннях развіцця харчовай прамысловасці

11 жніўня 2020 года

Прэзідэнт Беларусі Аляксандр Лукашэнка 11 жніўня правёў нараду па актуальных пытаннях развіцця харчовай прамысловасці.

Сярод удзельнікаў мерапрыемства - прадстаўнікі Урада, Адміністрацыі Прэзідэнта, кіраўнікі прадпрыемстваў харчовай і перапрацоўчай прамысловасці, канцэрна "Белдзяржхарчпрам", Белкаапсаюза, Міністэрства антыманапольнага рэгулявання і гандлю.

Як адзначыў Кіраўнік дзяржавы, сённяшняе мерапрыемства праходзіць упершыню пасля назначэння шэрага кіраўнікоў у абазначаных галінах прамысловасці, якое адбылося ў снежні 2019 года. Тады ім былі дадзены канкрэтныя даручэнні. "У вас быў час вывучыць знутры даручаныя галіны эканомікі і разабрацца з поспехамі і праблемамі. Хацеў бы пачуць ваша меркаванне аб перспектывах развіцця. Якія праблемы бачыце ў харчовай і перапрацоўчай прамысловасці? Як вы іх вырашаеце і ці патрэбна дапамога на ўзроўні ўрада і Прэзідэнта?" - сказаў Аляксандр Лукашэнка.

Сярод важных пытанняў нарады Кіраўнік дзяржавы таксама акрэсліў развіццё экспарту. "З-за пандэміі каранавіруснай інфекцыі больш як паўгода нашы прадпрыемствы працуюць у няпростых умовах. Але, нягледзячы на гэта, мы змаглі захаваць працоўныя месцы і экспартны патэнцыял. Сістэма перапрацоўкі абсалютна не звязана ў адмоўным плане з каранавірусам. Сыравіны ў вас было дастаткова. Вяскоўцы працуюць як ніколі добра, ёсць мяса, малако, цукар і іншае. І спажыванне. Усе краіны закрыліся і сваю эканоміку спынілі - мы працуем. Наперад - прадавайце. Рынкі адкрыты, проста трэба варушыцца", - падкрэсліў Кіраўнік дзяржавы. Як дакладваюць Прэзідэнту адказныя службовыя асобы, праблем са збытам прадукцыі няма. "Трэба ўзмацняцца, - яшчэ раз звярнуў увагу беларускі лідар. - Вельмі важны напрамак гэтага ўзмацнення - павелічэнне экспарту. Як вы спраўляецеся з вырашэннем гэтай задачы? Асобнае пытанне па пастаўках у Кітай".

Аляксандр Лукашэнка звярнуў увагу на тое, што ў бягучым годзе аграрыі вырасцілі добры ўраджай збожжа, агародніны і садавіны. "Усё перапрацаваць да міліграма. Страт не павінна быць ніякіх", - падкрэсліў Прэзідэнт. Ён таксама звярнуў увагу на тое, што нядрэнны ўраджай ёсць і ў насельніцтва. "Гэта добрая падмога. Калі мы хочам, каб насельніцтва на сваіх прысядзібных участках вырошчвала сельскагаспадарчую прадукцыю, яе трэба выкупіць у людзей, - паставіў задачу кіраўнік дзяржавы. - Лішкі сельгаспрадукцыі трэба выкупіць у насельніцтва". Асобна Кіраўнік дзяржавы звярнуўся да прысутных з пытаннем аб перапрацоўцы рапсу, цэнах на яго і наяўнасці рынкаў збыту.

Размова ішла таксама пра дзейнасць шэрага прадпрыемстваў. Прэзідэнт нагадаў, што ў свой час была аказана дзяржаўная падтрымка цукраперапрацоўчым прадпрыемствам, арганізацыям кандытарскай галіны. Былі зроблены кадравыя змяненні, створаны холдынг "Мінск Крышталь". "Як выконваюцца тыя задачы, якія тады былі пастаўлены? Як асвойваюцца новыя рынкі збыту?" - пацікавіўся Аляксандр Лукашэнка.

Асобнай тэмай стала сітуацыя з забяспечанасцю кадрамі ў акрэсленых галінах.

Тэгі: Нарады
© 2020, Прэс-служба Прэзідэнта Рэспублікі Беларусь