Бел
Галоўная   /  Падзеі

Нарада па актуальных пытаннях развіцця беларускай эканомікі

22 жніўня 2017 года

Найбольш актуальныя пытанні развіцця беларускай эканомікі вынесены на абмеркаванне на нарадзе Прэзідэнта Беларусі Аляксандра Лукашэнкі з кіраўніцтвам эканамічнага блока краіны. Сярод удзельнікаў нарады Прэм'ер-міністр і віцэ-прэм'еры, Кіраўнік Адміністрацыі Прэзідэнта, Старшыня Савета Рэспублікі, кіраўніцтва КДК і Нацыянальнага банка.

Кіраўнік дзяржавы нагадаў, што раней ім было прынята рашэнне аб правядзенні штоквартальных нарад - з палітычным, эканамічным і сілавым блокамі краіны. Такія мерапрыемствы будуць мець амаль аператыўны характар, разглядацца на іх будуць пытанні тактычнага плана. Сёння вырашана абмеркаваць актуальныя тэмы, што ўваходзяць у кампетэнцыю эканамічнага штаба краіны. "Пры гэтым я хачу папярэдзіць і Прэм'ер-міністра, і ўсіх прысутных, што гэта не мае нічога агульнага са справаздачай Урада перад Прэзідэнтам. Такая справаздача запланавана, яна будзе ў свой час, калі я палічу патрэбным або час настане", - звярнуў увагу Аляксандр Лукашэнка.

Было адзначана, што развіццё эканомікі прадвызначае стан сацыяльна-палітычнай абстаноўкі і матэрыяльны дабрабыт людзей. Таму ў адказных службовых асоб урада Прэзідэнт запатрабаваў адказу на канкрэтныя пытанні.

Аб развіцці эканомікі ў цэлым

"Як спрацавалі галіны эканомікі ў першым паўгоддзі, і якія рэальныя магчымасці выканання гадавых прагнозаў? Невялікі, каля працэнта рост, нібыта, ёсць, але наколькі стабільны гэты рост? І якая будзе ў гэтым плане дынаміка?" - запытаў Прэзідэнт.

Аб цэнаўтварэнні

"Як выконваюцца мае даручэнні па кантролі за цэнамі ў краіне, за цэнаўтварэннем? З аднаго боку, інфляцыя знаходзіцца ў рамках, значна ніжэйшых за прагнозныя, і гэта добра, аднак, з іншага боку, людзі скардзяцца, што цэны адкрыта скачуць па асобных пазіцыях. Напрыклад, па лякарствах, па асобных хлебабулачных вырабах. Няхай нямнога, але ваганні такія відавочныя", - канстатаваў Аляксандр Лукашэнка.

Аб сітуацыі на рынку працы

"Яшчэ ў мінулым годзе мы дамаўляліся, што на кожнае скарочанае працоўнае месца павінна быць створана новае высокапрадукцыйнае. Але ў нас па-ранейшаму прадпрыемствы прадаўжаюць больш звальняць, чым прымаць на работу. Прынамсі, паводле той інфармацыі, якую я маю. У чым справа?" - пацікавіўся Кіраўнік дзяржавы.

Яшчэ больш няясная сітуацыя з прадпрыемствамі, якія закрываюцца. "Куды ідуць людзі? На паперы новыя працоўныя месцы нібыта і ствараюцца, а на справе суцэльнае ашуканства. Калі гэта не так, хацелася б пачуць адказ на гэта пытанне. Як мяне інфармуюць, колькасць занятых у эканоміцы скарачаецца", - падкрэсліў Прэзідэнт.

Аб заработнай плаце

"Як мы выходзім на запланаваны ўзровень па галінах і рэгіёнах? Ці не павялічваецца расслаенне грамадства па даходах? Як Урад адрэагаваў на маё даручэнне звярнуць асаблівую ўвагу на катэгорыі работнікаў, якія атрымліваюць зарплату па ніжняй мяжы?" - запытаў Аляксандр Лукашэнка.

Асобна Кіраўнік дзяржавы папрасіў далажыць, які ўзровень зарплаты ў сельскай гаспадарцы, адукацыі, ахове здароўя і культуры.

Аб харчовай бяспецы

Гэту тэму Прэзідэнт назваў важнейшай на сённяшні дзень. "Я ўважліва адсочваю тое, аб чым пішуць у розных сродках масавай інфармацыі. Памылка журналістаў у тым, што яны ўсюды пішуць пра нейкі гераізм на ўборцы ўраджаю, у тым ліку Прэзідэнта. Ніякага гераізму на ўборцы няма. Гэта спрошчаны падыход да таго, што раблю я і ўсе тысячы людзей, якія сёння заняты ў тым ліку ўборкай. Размова ідзе выключна аб харчовай бяспецы нашай краіны", - заявіў ён.  

"Калі людзі будуць накормлены, калі кожны будзе мець, кажучы па-народнаму, кавалак хлеба на стале кожны дзень, тады і ў краіне будзе мір і парадак. А калі гэтага кавалка хлеба не будзе і да яго чагосьці, вось тады хіхіканні хутка спыняцца. Таму і ўборачная кампанія, і асенняя сяўба, і нарыхтоўка кармоў - гэта асобная тэма, - растлумачыў Аляксандр Лукашэнка. - Што мы маем сёння ў сувязі з гэтым?"

Аб вырошчванні і перапрацоўцы лёну

Кіраўнік дзяржавы пацікавіўся, як выконваюцца яго даручэнні адносна льняной галіны, пачынаючы ад вырошчвання расліны і завяршаючы яе перапрацоўкай, па вызначэнні льнасeяльных гаспадарак, выкананні тэхналогій, забеспячэнні якасным насеннем айчыннай селекцыі.

"Хацелася б паглядзець з іншага канца на гэту праблему: рынак сёння ёсць для льнопрадукцыі, для нашай тканіны, для нашых вырабаў як унутраны, так і знешні? Калі мяне правільна праінфармавалі, чаму сёння на складах ільнокамбінатаў залежы тканіны? Не дай бог, гэта так!" - папярэдзіў Прэзідэнт.

Аб будаўніцтве малочнатаварных комплексаў

Аляксандр Лукашэнка нагадаў, што рашэнне аб будаўніцтве малочнатаварных комплексаў і мадэрнізацыі ферм было прынята яшчэ некалькі гадоў таму. Аднак работа ў гэтым напрамку адкладалася па аб'ектыўных прычынах. "Сёння настаў час заняцца гэтымі праблемамі. Гэта найвялікшае наша дасягненне, што мы ў свой час своечасова схапіліся за гэтыя малочнатаварныя комплексы, - звярнуў увагу ён. - Калі б гэтага не было, сёння і сельская гаспадарка адсутнічала б у краіне".

Кіраўнік дзяржавы даручыў да канца 2018 года завяршыць узвядзенне і мадэрнізацыю малочнатаварных комплексаў і забяспечыць іх якаснымі кармамі. У сувязі з гэтым ён таксама пацікавіўся, як у Беларусі будзе наладжана работа па будаўніцтве сіласна-сянажных траншэй.

Прэзідэнт перакананы, што малочнатаварныя комплексы і сховішчы павінны будавацца па недарагіх, тыпавых праектах: "Я не бачу тут асаблівых праблем".

Аб суперкамбайнах

"Я даручыў канструктарам да ўборачнай 2018 года абнавіць мадэль камбайна "Палессе". Нам трэба спыніцца на нейкіх мадэлях, якія будуць запатрабаваны на рынку. Камбайн, які мы апрабавалі нядаўна ў Магілёўскай і Віцебскай абласцях, нядрэнны. Камбайн добры: убірае чыста, нічым не ўступае імпартным аналагам. Добра, што цяперашнія канструктары "Гомсельмаша" на гэтым не спыняюцца. Яны заяўляюць, што ёсць напрамкі, па якіх яшчэ можна палепшыць гэты камбайн", - звярнуў увагу Аляксандр Лукашэнка.

Пры гэтым Кіраўнік дзяржавы адзначыў, што рухавікі для гэтай тэхнікі павінны вырабляцца ў Беларусі: адпаведныя вытворчасці ў краіне ёсць.

"Яшчэ адзін напрамак у "Гомсельмашы" - стварыць суперкамбайн, які будзе пераўзыходзіць імпартныя аналагі. Я не буду раскрываць усе сакрэты, але такія задумы і ўжо канкрэтныя напрацоўкі ў канструктараў ёсць", - расказаў Прэзідэнт. Ён даручыў запланаваць на зіму наведванне ім прадпрыемства, каб азнаёміцца з мадэрнізацыяй тэхнікі і вытворчасцю новых мадэлей.

Аб развіцці будаўнічай сферы

"Як ідуць справы ў будаўнічай сферы - жыллё і іншыя аб'екты? Што робіцца для зніжэння іх сабекошту? Мяне гэта сфера вельмі хвалюе, - заявіў Аляксандр Лукашэнка. - Калі нехта хоча ва ўрадзе згарнуць будаўніцтва жылля, я ім раю неадкладна перайсці ў аднапакаёвыя, двухпакаёвыя кватэры разам са сваімі сем'ямі або пайсці зняць кватэру па найме і жыць з гаспадарамі".

Аб фінансавай стабільнасці, экспарце тавараў і паслуг

Асобна Кіраўнік дзяржавы пацікавіўся, як забяспечваецца фінансавая стабільнасць у краіне і якія меры прымаюцца для ўмацавання нацыянальнай валюты. Таксама было ўзнята пытанне экспарту тавараў і паслуг. "Калі ў цэлым дзякуючы цэнаваму фактару адбыўся рост экспартнай выручкі і сітуацыя палепшылася (і гэта нядрэнна), то сур'ёзных зрухаў у дыверсіфікацыі, асваенні новых рынкаў збыту тавараў і паслуг пакуль няма", - канстатаваў Прэзідэнт.

Аляксандру Лукашэнку далажылі аб канкрэтных выніках работы ў кожнай з абазначаных сфер. Пры гэтым Кіраўнік дзяржавы запатрабаваў не прыкрывацца самасправаздачамі і лічбамі, а прадстаўляць яму рэальную і аб'ектыўную сітуацыю, узнімаць самыя актуальныя пытанні, якія маюць патрэбу ў аператыўным вырашэнні. Асобна Прэзідэнт цікавіўся тэндэнцыямі і прагнозамі эканамічнага развіцця краіны.


Тэгі: Нарады
© 2017, Прэс-служба Прэзідэнта Рэспублікі Беларусь