Нарада аб развіцці сістэмы ўрадавай сувязі

Прэзідэнт Беларусі Аляксандр Лукашэнка 21 лістапада сабраў нараду аб развіцці сістэмы ўрадавай сувязі.

"Я хацеў бы ў развіццё нашай размовы, калі мы наведвалі адпаведныя аб'екты абароненай сувязі, пагаварыць сёння аб далейшых нашых кроках, у тым ліку аб недахопах. Я тады вам сказаў, што мы сур'ёзна возьмем на кантроль работу КДБ, іншых структур, якія займаюцца распрацоўкай абароненай сувязі, у тым ліку ўрадавай", - адзначыў на нарадзе Кіраўнік дзяржавы.

Аляксандр Лукашэнка падкрэсліў, што ў гэтым напрамку ўжо нямала зроблена: "У Прэзідэнта на стале распрацоўкі стацыянарнай айчыннай сувязі, усе вышэйшыя службовыя асобы, члены ўрада маюць нядрэнную стацыянарную сувязь, але самае галоўнае, што мы ў гэтым выпадку абсалютна незалежныя. Мы стварылі свае сістэмы сувязі, свае цэнтры шыфравання інфармацыі, недаступныя для разведак іншых дзяржаў".

"Зроблена нямала, але далёка не ўсё. Мы сёння робім і тэсціруем некаторыя сістэмы не стацыянарнай, а мабільнай сувязі. У кожнага сёння мабільны тэлефон - узяў, пазваніў - увесь свет ведае, аб чым ты гаворыш. Трэба стварыць такую сувязь, але абароненую. Як у народзе кажуць, сакрэтную сувязь. Мы тэсціруем такую сувязь. Ёсць, вядома, шэраг недахопаў. Аб гэтым таксама мы сёння шчыра павінны пагаварыць", - адзначыў беларускі лідар.

Прэзідэнт расказаў, што нядаўна даручаў Аператыўна-аналітычнаму цэнтру праверыць, як працуе КДБ у сферы закрытай сувязі, наколькі яна знаходзіцца пад кантролем, надзейная і недаступная для разведак іншых дзяржаў і чужых асоб. "Я хацеў бы, каб мне аб гэтым сёння далажылі, і намеціць далейшыя крокі па развіцці і мабільнай, і стацыянарнай закрытай сувязі", - дадаў Аляксандр Лукашэнка.

Паводле яго слоў, развіццё гэтага напрамку не проста атрыманне выніку ў выглядзе канкрэтнага прадукту - добрай сувязі. "Гэта рухае наперад нашу школу шыфравання і стварэння такіх сістэм. Калі мы гэтым займаемся, значыць, у нас ёсць класныя спецыялісты, і гэта школа будзе развівацца, - лічыць Прэзідэнт. - У нас ёсць добрыя спецыялісты, напрацоўкі, і страціць іх нельга. Тым больш што многія сістэмы, якія мы стварылі, у тым ліку закрытай сувязі, карыстаюцца павагай замежных дзяржаў. Нават мяне кіраўнікі дзяржаў просяць: мы хочам такую, як у Беларусі, надзейную сувязь".

Аляксандр Лукашэнка ў сувязі з гэтым заявіў, што беларускі бок для некаторых кіраўнікоў дзяржаў ужо стварыў такую ж урадавую сувязь. "Гэта карыстаецца попытам, і гэта немалыя грошы, таму ёсць сэнс у гэтым напрамку працаваць і развіваць нашы сістэмы", - сказаў ён.