Бел
Галоўная   /  Падзеі  /  Архіў

Нарада аб праектах прававых актаў

21 снежня 2017 года
Нарада аб праектах прававых актаў
глядзіце таксама: відэа
21 снежня 2017 года
Нарада аб праектах прававых актаў

Праекты прававых актаў, накіраваных на развіццё рэальнага сектара эканомікі, навуковай дзейнасці і забеспячэнне занятасці насельніцтва, абмеркаваны 21 снежня на нарадзе ў Прэзідэнта Беларусі Аляксандра Лукашэнкі.

Кіраўнік дзяржавы адзначыў, што дакументы разнапланавыя. Таму ад службовых асоб, адказных за іх распрацоўку, ён хоча пачуць вычарпальныя адказы на наступныя пытанні.

"Па-першае, мы ўзялі курс на развіццё лічбавай эканомікі. Нядаўна разгледзелі гэтыя пытанні на нарадзе. Цяпер хачу пачуць ад прысутных аб канкрэтных аспектах гэтага маштабнага праекта. Як яны паўплываюць на традыцыйную эканоміку і што гэта дасць для краіны? Такое абмеркаванне будзе апошнім і ў бягучым годзе, і наогул перад тым, як мною будзе падпісаны гэты дэкрэт", - сказаў Аляксандр Лукашэнка.

Па-другое, падкрэсліў Прэзідэнт, асабліва грунтоўна трэба абмеркаваць прапановы Урада па забеспячэнні занятасці насельніцтва. "Я абяцаў, што да канца гэтага года мы распрацуем і прымем дэкрэт Прэзідэнта, які будзе развіваць вядомы Дэкрэт № 3. Мы з вамі тады дамовіліся, каб нас не крытыкавалі і не называлі рэтраградамі, мы павінны дапрацаваць гэты праект з улікам тых недахопаў і, магчыма, памылак, якія былі дапушчаны пры распрацоўцы Дэкрэта № 3, зрабіць яго прыземленым", - звярнуў увагу Кіраўнік дзяржавы.

Аляксандр Лукашэнка адзначыў, што гэты дакумент павінен быць збалансаваным. "З аднаго боку - даць людзям магчымасць працаўладкавацца, з іншага - прымусіць працаваць тых, хто сёння можа, але не хоча, - растлумачыў Прэзідэнт. - Другое канцэптуальнае патрабаванне: не мы адсюль, з цэнтра, павінны адшукваць гэтых непрацуючых людзей і прымяняць да іх меры. Яны жывуць у канкрэтных гарадах, канкрэтных вёсках, і там ёсць органы ўлады, якія разбяруцца, можа чалавек працаваць, не можа, трапіў ён у цяжкую сітуацыю ці не трапіў".

Кіраўнік дзяржавы перакананы: калі чалавек трапіў у цяжкую сітуацыю, яго трэба падтрымаць, а калі ён сапраўды дармаед, значыць, яго трэба прымусіць працаваць. "І гэтым будуць займацца мясцовыя органы ўлады. Мы ім павінны стварыць прававы калідор, як юрысты кажуць, прававое поле", - заявіў ён.

Прэзідэнт пацікавіўся ў распрацоўшчыкаў дакумента і членаў Урада, ці рэалізаваны ў новай рэдакцыі дэкрэта гэтыя канцэптуальныя патрабаванні.

"Па-трэцяе, у красавіку гэтага года на нарадзе аб перспектывах беларускай навукі мною было дадзена даручэнне выпрацаваць новыя прынцыпы і падыходы да налічэння заработнай платы вучоным. Што зроблена ў гэтым напрамку? Якія прапануюцца механізмы і крыніцы аплаты працы вучоных? Наколькі эфектыўнымі будуць прапануемыя меры?" - спытаў Аляксандр Лукашэнка.


"Іншымі словамі, ці стануць на практыцы вучоныя атрымліваць дастойную заработную плату за вынікі сваёй работы? Гэта галоўнае канцэптуальнае патрабаванне: ёсць вынік - плацім, працуеш на вынік - авансуем, па выніку трэба заплаціць большыя грошы вучоным", - сказаў Кіраўнік дзяржавы.

Прэзідэнт нагадаў, што на праведзеным нядаўна II З'ездзе вучоных Беларусі ён паабяцаў падпісаць дакумент аб павышэнні зарплат у навуковай сферы. "Яго распрацоўку і так зацягнулі", - канстатаваў ён.

Асобна былі разгледжаны прапановах Акадэміі навук аб стварэнні і ўмовах работы Нацыянальнага навукова-тэхналагічнага парка "БелБіяград". "У мяне такое ўражанне, што чым больш адукаваны і вучоны чалавек, тым больш ён пачынае выдумляць. "Нацыянальны навукова-тэхналагічны парк" - без "нацыянальнага" не абыдземся, так? Трэба абавязкова выдумаць нейкі асаблівы статус. Я паглядзеў на праект адпаведнага ўказа: там яшчэ ўводзіцца нейкая асаблівая зона. Што гэта за асаблівая зона і ці ёсць у нас такія зоны ў заканадаўстве наогул і на практыцы?" - спытаў Аляксандр Лукашэнка. Кіраўнік дзяржавы пацікавіўся, наколькі запатрабаваны жыццём гэты праект і што ён дасць для развіцця навукі і эканомікі.

Прэзідэнт таксама адзначыў, што частка вынесеных на абмеркаванне праектаў дакументаў датычацца развіцця асобных прадпрыемстваў прамысловасці. "Як прапануемыя меры паўплываюць на стабільнасць работы нашых флагманаў у металургіі, машынабудаванні, дрэваапрацоўцы і домабудаванні? Я маю на ўвазе гэтыя праекты дакументаў, дзе вы зноў просіце падтрымкі для прадпрыемстваў з бюджэту", - удакладніў Аляксандр Лукашэнка. Кіраўнік дзяржавы падкрэсліў, што на гэту тэму нядаўна праводзілася ўжо нарада, і ён агучваў сваю пазіцыю па гэтым пытанні.

На нарадзе яшчэ раз былі разгледжаны прапановы па развіцці лічбавай эканомікі і тыя магчымасці, якія гэта нясе не толькі для ІТ-сектара, але і для іншых галін.

Падрабязна абмеркаваны меры па забеспячэнні занятасці насельніцтва. На гэта накіраваны абноўлены Дэкрэт № 3, які будзе выкладзены ў новай рэдакцыі і пачне працаваць у поўным аб'ёме з 1 студзеня 2019 года. Работа ў рамках новай рэдакцыі дакумента будзе прадугледжваць максімальна індывідуальны падыход. Асноўнымі адказнымі выканаўцамі пры рэалізацыі дакумента будуць мясцовыя органы ўлады і камісіі, якія будуць стварацца ў адміністрацыях раёнаў і гарадоў. Урад вызначыць адпаведныя крытэрыі і пералік паслуг, кошт якіх тыя, хто трапляе пад нормы абноўленага Дэкрэта, будуць абавязаны кампенсаваць у поўным аб'ёме. Калі ў той ці іншай мясцовасці не будзе рабочых месц, то задача па іх стварэнні або забеспячэнні перападрыхтоўкі незанятых грамадзян будзе ляжаць на органах улады.

Аляксандр Лукашэнка таксама ў цэлым падтрымаў праекты ўказаў, якія накіраваны на стымуляванне навуковай дзейнасці, у тым ліку павышэнне аплаты працы вучоных, а таксама стварэнне навукова-тэхналагічнага парка "БелБіяград". Прэзідэнт дэталёва цікавіўся, наколькі гэты праект запатрабаваны жыццём і што ён дасць для развіцця навукі і эканомікі. Выслухаўшы дакладчыкаў, Кіраўнік дзяржавы падтрымаў ідэю і агульныя падыходы па стварэнні парка. Разам з тым ён даручыў у бліжэйшы час падрыхтаваць для яго падрабязную інфармацыю аб тым, як будзе арганізавана дзейнасць "БелБіяграда".


Што датычыцца праектаў прававых актаў па пытаннях развіцця асобных прадпрыемстваў прамысловасці, Аляксандр Лукашэнка перасцярог прамсектар ад неабгрунтаваных надзей на новую порцыю дзяржпадтрымкі. У вынесеных на абмеркаванне дакументах прапаноўвалася прадаставіць шэрагу прапрадпрыемстваў пэўныя паслабленні ў частцы тэрмінаў вяртання раней узятых бюджэтных пазык, крэдытаў, пэўных растэрміновак. "Я хацеў бы паглядзець у вочы, шчыра кажучы, членам Урада, якія ўносяць прапановы зноў з бюджэту кагосьці і штосьці падтрымліваць. На гэту тэму мы з вамі ўжо гаварылі. І Адміністрацыя Прэзідэнта пасля строгага патрабавання ўнесла прапановы, у тым ліку і кадравыя. Яны будуць падтрыманы", - сказаў Прэзідэнт.

Кіраўнік дзяржавы на нарадзе падкрэсліў, што проста так хадзіць і браць грошы з бюджэту нікому не будзе дазволена. Яго цікавіла пытанне эфектыўнасці работы прадпрыемстваў - рэнтабельнасць, прыбытак, дынаміка, праекты і наяўнасць кантрактаў.

Па выніках абмеркавання прыняты канкрэтныя рашэнні. Шэраг прадпрыемстваў змогуць разлічваць на падтрымку для папаўнення абаротных сродкаў, не толькі пад перспектыўныя кантракты і на больш строгіх умовах, чым прапаноўвалася з самага пачатку. Пры гэтым неабходна будзе прадставіць дакладны графік пагашэння даўгавых абавязацельстваў.

Прэзідэнт таксама даручыў Камітэту дзяржкантролю і Адміністрацыі Прэзідэнта вывучыць сітуацыю ў будаўнічай галіне, паколькі да яе работы ёсць шмат нараканняў. Для гэтага будзе створана спецыяльная група. Было адзначана, што далёка не ўсе арганізацыі загружаны на поўную моц. Неабходна прааналізаваць і эфектыўнасць работы кіраўнікоў і топ-менеджараў прадпрыемстваў будаўнічай галіны.
Тэгі: Нарады
© 2018, Прэс-служба Прэзідэнта Рэспублікі Беларусь