Бел
Галоўная   /  Падзеі  /  Архіў

Каментарый да Указа № 361 ад 5 кастрычніка 2017 г.

5 кастрычніка 2017 года
Прэзідэнт Рэспублікі Беларусь Аляксандр Лукашэнка 5 кастрычніка падпісаў Указ № 361 "Аб стварэнні ўстановы".

У адпаведнасці з дакументам у структуры МНС створана дзяржаўная навуковая тэхнічная ўстанова "Цэнтр па ядзернай і радыяцыйнай бяспецы", якая будзе ажыццяўляць пастаянную незалежную навукова-тэхнічную падтрымку нагляднага органа. Наяўнасць такой установы з'яўляецца неад'емнай і абавязковай часткай рэгулюючай інфраструктуры краіны, якая развівае ядзерную энергетыку, і адпавядае рэкамендацыям МАГАТЭ.

Цэнтр будзе каардынаваць дзейнасць навукова-тэхнічных экспертаў пры правядзенні ацэнак бяспекі аб'ектаў выкарыстання атамнай энергіі і крыніц іанізуючага выпраменьвання, а таксама ўдзельнічаць у правядзенні экспертызы бяспекі ядзерных аб'ектаў.

Асноўнымі напрамкамі работы ўстановы з'яўляюцца: правядзенне навукова абгрунтаванага аналізу ядзернай і радыяцыйнай бяспекі; вывучэнне ўплыву розных фактараў, у тым ліку прыродных і тэхнагенных, на надзейнасць будаўнічых канструкцый і кампанентаў аб'ектаў выкарыстання атамнай энергіі; навукова абгрунтаваны аналіз рызык; правядзенне ацэнкі эфектыўнасці радыяцыйнай абароны персаналу, які працуе з ядзернымі матэрыяламі і крыніцамі іанізуючага выпраменьвання.

У ліку іншых напрамкаў дзейнасці - ацэнка бяспекі пры абыходжанні з радыеактыўнымі адходамі і ядзернымі матэрыяламі; аказанне падтрымкі прыняцця рашэнняў па пытаннях аварыйнай гатоўнасці і рэагавання; падрыхтоўка і суправаджэнне міжнародных навуковых праграм; правядзенне навуковых даследаванняў у галіне забеспячэння ядзернай і радыяцыйнай бяспекі.
© 2017, Прэс-служба Прэзідэнта Рэспублікі Беларусь