Бел
Галоўная   /  Падзеі

Кадравыя назначэнні ў кіраўніцтве КДБ

30 чэрвеня 2018 года
Прэзідэнт Беларусі Аляксандр Лукашэнка 30 чэрвеня правёў кадравыя назначэнні ў кіраўніцтве КДБ.

Кіраўнік дзяржавы назначыў:

Уладзіміра Калача - намеснікам Старшыні Камітэта дзяржаўнай бяспекі Рэспублікі Беларусь;

Дзмітрыя Равуцкага - начальнікам УКДБ па г. Мінску і Мінскай вобласці;

Алега Сталярчука - начальнікам УКДБ па Віцебскай вобласці;

Аляксандра Церахава - начальнікам УКДБ па Магілёўскай вобласці;

Аляксандра Невяроўскага - начальнікам УКДБ па Гродзенскай вобласці;

Сяргея Гладышава - начальнікам УКДБ па Брэсцкай вобласці;

Вячаслава Язерскага - начальнікам ДУА "Інстытут нацыянальнай бяспекі".

Уладзімір Калач да гэтага часу ўзначальваў УКДБ па г. Мінску і Мінскай вобласці, а Дзмітрый Равуцкі, які змяніў яго на гэтай пасадзе, - адно з галоўных упраўленняў цэнтральнага апарату КДБ.

Алег Сталярчук раней узначальваў Інстытут нацыянальнай бяспекі. Яго пераемнік на гэтай пасадзе Вячаслаў Язерскі працаваў на пасадзе начальніка УКДБ па Брэсцкай вобласці, на якую цяпер назначаны Сяргей Гладышаў.

Ракіроўка адбылася ў кіраўніцтве ўпраўленняў КДБ па Магілёўскай і Гродзенскай абласцях. На аналагічныя пасады, але ў новыя рэгіёны назначаны Аляксандр Церахаў і Аляксандр Невяроўскі.

"Я спецыяльна запрасіў вас для таго, каб пагаварыць аб праблемах КДБ. Павінен сказаць, што (я часта аб гэтым гавару) супакойвацца нам ніхто не дасць. У нас не так спакойна і вакол краіны - гэта таксама часткова ваша праблема, ваша задача, - але там у нас ёсць ваенныя, яны павінны забяспечыць ваенную бяспеку дзяржавы. Але і міліцыя, і КДБ - людзі не пабочныя. Улічваючы нават вопыт мінулай вайны, пад ружжо сталі ўсе, калі порахам запахла. Але галоўная ваша задача - гэта бяспека тых працэсаў і таго стану дзяржавы, якія забяспечваюцца ўнутры. Гэта ўнутраная бяспека. І вам вялікі давер. Але і вялікае патрабаванне. Я хачу, каб вы гэта разумелі", - падкрэсліў Прэзідэнт.

Аляксандр Лукашэнка адзначыў, што КДБ многае робіць і ў плане эканамічнай бяспекі, абароны канстытуцыйнага ладу. "Тая інфармацыя, якую я атрымліваю, яна аб'ектыўная. Няма гэтай палітыкі - недзе нешта прыхарашыць, прыгожа напісаць, - сказаў беларускі лідар. - Дзякуй богу, камітэт ад гэтага адышоў, як гэта было ў савецкія часы і пасля распаду саюза , і першыя гады майго прэзідэнцтва. Сёння часу мінула дастаткова для таго, каб камітэт эфектыўна выконваў свае функцыі".

Прэзідэнт таксама заўважыў, што перад КДБ у якасці адной з галоўных задач стаіць не толькі барацьба з карупцыяй, але ёсць і такія напрамкі, як разведка і контрразведка, пытанне забеспячэння работы ўрадавай сувязі. З'явіўся і новы напрамак - барацьба з тэрарызмам. У сувязі з гэтым кіраўнік дзяржавы адзначыў, што гэта праблема не характэрна для Беларусі, аднак супакойвацца ні ў якім разе нельга, маючы на ўвазе тое, што адбываецца вакол. "Той тэрор, які ахапіў усю планету, не факт, што ён не зачэпіць і нас, хоць унутраных прычын для гэтага няма. Але, тым не менш, гэта таксама ваш напрамак", - падкрэсліў Аляксандр Лукашэнка.

Ён асабліва папярэдзіў аб недапушчальнасці таго, каб у КДБ з'явіліся тэндэнцыі, супраць якіх гэта структура і змагаецца. "Я маю на ўвазе карупцыю, хабарніцтва, несумленныя, проста амаральныя паводзіны нашых кіраўнікоў знізу даверху. Не дай бог такія з'явы ў КДБ. Гэта проста будзе жудасна як для камітэта, ну і перш за ўсё для мяне. Народ мяне адразу папракне ў тым, што я занадта вам давяраў, а вы, глядзіце, якія самі", - звярнуў увагу беларускі лідар.


"Усё павінна быць сумленна і прынцыпова. Нікому ніякіх выключэнняў быць не павінна. Камітэт заўсёды ў любым нашым грамадстве, і ў савецкія часы, а цяпер тым больш, быў пэўным чысцілішчам нашага грамадства. І я хачу, каб камітэт быў такім чысцілішчам, каб там былі сумленныя, прынцыповыя, разумныя прафесіяналы, якія будуць разумець, што на нашых з вамі плячах ляжыць самае галоўнае і святое - бяспека нашай дзяржавы, суверэнітэт і незалежнасць", - заявіў Прэзідэнт.

"Калі вы праваліцеся па сваіх напрамках, вельмі цяжка будзе закрыць гэту брэш іншымі органамі і падраздзяленнямі. Іх проста няма. Мы не дубліруем у цэлым КДБ. Таму глядзіце, каб быў вельмі строгі парадак", - дадаў Кіраўнік дзяржавы.

Прэзідэнт адзначыў, што многія з назначаных у кіраўніцтва КДБ ідуць працаваць у тэрытарыяльныя органы. "Запомніце, ніякай кругавой парукі! Гэта вельмі акуратная работа - у вас, у пракурора, у міліцыі. Я нездарма ствараў гэту сістэму, па якой вы па вертыкалі падначалены Старшыні КДБ. Але вы жывяце на тэрыторыі ў той ці іншай вобласці, і яны вырашаюць пэўныя пытанні, і там галоўны мой прадстаўнік - губернатар. І вы павінны знайсці агульную мову з кіраўніцтвам вобласці, але ні ў якім разе не цокаючы абцасам... "чаго жадаеце". І не думаючы аб тым, што сёння я яму нешта там дапамагу (у двукоссі), а заўтра ён мне штосьці добрае зробіць. За камітэтам пільны нагляд у гэтых адносінах. Таму што шкоды ад кампанейшчыны і кругавой парукі будзе больш, чым змыканне, дапусцім, губернатара з іншымі кіраўнікамі органаў і падраздзяленняў", - даў наказ Кіраўнік дзяржавы.

Аляксандр Лукашэнка дадаў, што вельмі давярае КДБ. "Я яшчэ з дэпутацкіх часоў помню добрых маладых хлопцаў, з якімі я працаваў наперакор кіраўніцтву КДБ, якія тайна прыносілі мне дакументы, характарызуючы тых ці іншых карупцыянераў у вышэйшых эшалонах улады, - расказаў Прэзідэнт. - Гэта былі шчырыя маладыя хлопцы, якія разумелі, што так быць не павінна. И з той пары ў мяне, нават з савецкіх часоў, склаліся самыя добрыя ўспаміны і меркаванне пра КДБ. Таму я і давяраю КДБ. Але каму давяраеш, таго трэба і сур'ёзна правяраць".

Старшыня КДБ Валерый Вакульчык расказаў, што ўсе кадравыя рашэнні вывераны, да іх рыхтаваліся больш чым паўгода. "Кадры падрыхтаваныя. Гэта маладыя перспектыўныя кіраўнікі, і ёсць абгрунтаваная ўпэўненасць, што гэта будзе садзейнічаць павышэнню эфектыўнасці работы камітэта, - сказаў ён. - Гэта людзі прынцыповыя. Яны здольны прымаць рашэнні, і мы пераканаліся ўжо, што гэтыя рашэнні вывераныя і прымаюцца з дзяржаўнага пункту гледжання".
Тэгі: Кадры
© 2018, Прэс-служба Прэзідэнта Рэспублікі Беларусь