Даклад Урада аб перспектывах развіцця айчыннага трактарабудавання

Развіццё айчыннага трактарабудавання закранае інтарэсы ўсёй дзяржавы. Аб гэтым Прэзідэнт Беларусі Аляксандр Лукашэнка заявіў 25 ліпеня, заслухоўваючы даклад Урада аб перспектывах развіцця айчыннага трактарабудавання.

"Нам варта абмеркаваць шэраг пытанняў, якія датычацца развіцця айчыннага трактарабудавання і, у прыватнасці, стварэння новых мадэлей трактароў. Мне няма неабходнасці гаварыць аб значнасці гэтай галіны для Беларусі. Яна закранае інтарэсы не толькі рэгіёнаў нашай краіны, але і ў цэлым усёй дзяржавы. Для сумежных прамысловых прадпрыемстваў гэта вельмі важна, лакаматыў іх развіцця, - сказаў Аляксандр Лукашэнка. - Ад стану спраў у сельгасмашынабудаванні шмат у чым залежыць работа ўсяго сельскагаспадарчага комплексу, эканомікі сельскай гаспадаркі. Гэта, зразумела, уплывае і на сацыяльную сферу".

Урад унёс на разгляд Прэзідэнта прапановы па выпуску на базе "Амкадора" новых відаў трактароў у рамках ствараемага холдынга па вытворчасці сельскагаспадарчых машын. "Гэтыя пытанні ўзнімаліся не адзін раз. Мая пазіцыя вам вядома. Меркаванні зацікаўленых бакоў, на жаль, разыходзяцца. Урад настойвае на рэалізацыі названага праекта. Адсутнасць адзіных падыходаў у развіцці трактарабудавання выклікае сур'ёзныя апасенні, - заўважыў Кіраўнік дзяржавы. - Таму ўзнікае пытанне: калі нехта на нечым настойвае, няхай растлумачыць і дакажа, што гэта той шлях, па якім мы павінны ісці".

Аляксандр Лукашэнка падкрэсліў, што сёння неабходна абмеркаваць усе існуючыя прапановы і прыняць рашэнні, якія дадуць магчымасць выйсці беларускім прадпрыемствам на больш высокі ўзровень, стварыць новыя і канкурэнтаздольныя віды сельскагаспадарчых машын.

У сувязі з гэтым Прэзідэнт пацікавіўся, якой бачыць Урад стратэгію развіцця трактарабудавання, якая сёння эканамічная сітуацыя на "Амкадоры" і МТЗ, у чым сутнасць прапановы аб стварэнні холдынга па вытворчасці сельскагаспадарчых машын, ці ўзаемаўвязана яна з дзеючымі ў краіне вытворчасцямі. "Галоўнае пытанне: трэба нам ці не трэба ўвязвацца ў стварэнне новых тыпаў трактароў. Калі так, то на якой базе іх развіваць? На базе існуючай школы або ствараць новую? Хоць і на "Амкадоры" ёсць асобныя элементы такога вопыту", - канстатаваў ён.

Пры гэтым, звярнуў увагу Кіраўнік дзяржавы, нездаровая канкурэнцыя на знешнім і ўнутраным рынках, ператок кадраў з аднаго прадпрыемства на другое краіне не патрэбны. "Гэта адназначны адказ", - заявіў ён.

"Тое, што нарэшце Урад пачынае прапаноўваць праекты па кітайскіх крэдытах, звязаныя з матэрыяльнай вытворчасцю, ужо добра. Таму што матэрыяльная вытворчасць дае аддачу, прыбытак і акупнасць крэдытаў. У адваротным выпадку мы ўсе гэтыя крэдыты можам пакласці на бюджэт і потым надарвацца: яны акажуцца непад'ёмнымі для нашага бюджэту, - дадаў Прэзідэнт. - Таму шмат пытанняў. Хацелася б разумець, што за гэтым стаіць".

Па выніках нарады прынята рашэнне стварыць у Беларусі вытворчасць трактароў з шарнірна-сучлененай рамай. Было адзначана, што такая тэхніка карыстаецца попытам на знешніх рынках і Беларусь зможа скласці канкурэнцыю замежным вытворцам. А значыць, праект мае вялікія перспектывы.

Пад якім брэндам і на якім прадпрыемстве будуць збірацца гэтыя трактары, яшчэ канчаткова не вырашана. Не выключаецца, што "Амкадор" і МТЗ пойдуць на цесную кааперацыю, што дасць магчымасць аб'яднаць намаганні лепшых спецыялістаў у краіне і адысці ад залішніх расходаў, якіх было б не пазбегнуць пры стварэнні вытворчасці з нуля.

Аляксандр Лукашэнка даручыў да 1 верасня падрыхтаваць прапановы па фармаце работы над гэтым праектам.

Што датычыцца развіцця трактарабудавання ў Беларусі ў цэлым, была падкрэслена неабходнасць пашыраць наменклатуру вырабляемай у краіне тэхнікі, каб павысіць экспартны патэнцыял краіны і забяспечыць унутраны рынак.