Бел
Галоўная   /  Падзеі  /  Архіў

Даклад Старшыні Камітэта дзяржаўнага кантролю Леаніда Анфімава

22 верасня 2017 года

Прэзідэнт Беларусі Аляксандр Лукашэнка запатрабаваў адысці ад практыкі неабгрунтаваных праверак бізнесменаў. Такую задачу Кіраўнік дзяржавы паставіў, прымаючы 22 верасня з дакладам Старшыню Камітэта дзяржаўнага кантролю Леаніда Анфімава па праекце ўказа "Аб мерах па ўдасканаленні кантрольнай (нагляднай) дзейнасці".

Гэты праект указа разглядаўся на пашыранай нарадзе ў Прэзідэнта ў жніўні разам з іншымі дакументамі аб спрашчэнні ўмоў вядзення бізнесу. Тады Кіраўнік дзяржавы даручыў дапрацаваць усе нарматыўныя прававыя акты, пасля чаго падрабязна далажыць яму аб кожным з іх.

Прымаючы з дакладам Леаніда Анфімава, Аляксандр Лукашэнка адзначыў, што пытанні кантрольнай дзейнасці больш за ўсё хвалююць бізнесменаў. "Гэта зразумела: у нас хочуць адказваць мінімальна, а свабоды больш. Таму нам ні ў якім выпадку нельга весціся на гэтыя хітрыкі, мы сапраўды павінны зняць усё лішняе, што перашкаджае рабоце людзей, прадпрыемстваў, але кантроль павінен заставацца - патрэбны кантроль для дзяржавы, які сапраўды "разнявольваў" бы людзей і не перашкаджаў ім працаваць", - звярнуў увагу Прэзідэнт.

Было падкрэслена, што характар кантрольнай дзейнасці павінен перайсці з карнага на прафілактычны. "Мы зробім асноўны акцэнт на прафілактыцы правапарушэнняў, адыдзем ад планавых праверак, перанясём акцэнт на выбарачныя праверкі. Я заўсёды гэта патрабаваў: правярайце каго хочаце, але ў вас павінны быць падставы, канкрэтныя прычыны таго, што вы прыйшлі на прадпрыемства, да бізнесмена, фізічнай або юрыдычнай асобы. І калі такія падставы ёсць - калі ласка, ідзіце", - сказаў Аляксандр Лукашэнка.

Калі прадстаўнікі кантрольных органаў правяраюць беспрычынна або падставы не пацвярджаюцца, яны павінны за гэта несці адказнасць. "А то так можна прыдумаць розныя падставы, прыйсці - факты не пацвердзіліся, і ніхто за гэта не адкажа. Па-мойму, у гэтым нарматыўным прававым акце акцэнтаў на гэтым няма. Звярніце на гэта ўвагу. Ніякіх пралазаў быць не павінна", - падкрэсліў Прэзідэнт.


На яго думку, таксама неабходна скараціць колькасць падстаў для назначэння пазапланавых праверак. "Не трэба там кучы гэтых падстаў, - звярнуў увагу Кіраўнік дзяржавы. - Павінны быць дакладна акрэсленыя падставы і акалічнасці гэтых праверак".

Аляксандр Лукашэнка адзначыў той факт, што па дзеючым заканадаўстве прадпрыемствы правяраюць па матэрыялах, якія знаходзяцца ў вядзенні праваахоўных органаў, хоць крымінальная справа яшчэ не ўзбуджана. Такога, падкрэсліў Прэзідэнт, быць не павінна. "Узбудзілі крымінальную справу - яна ўжо на кантролі, вось тады і правярайце. Тады можна пракантраляваць работу і праваахоўных органаў, і кантралёраў", - сказаў ён.

Кіраўнік дзяржавы лічыць, што супрацоўнікі кантрольных і наглядных органаў павінны несці адказнасць за грубыя парушэнні пры правядзенні праверак. "Трэба, каб у гэтым нарматыўным прававым акце такая адказнасць была прапісана. Няхай гэта будзе першы крок у такім напрамку, але ўсё ж такі яны павінны адчуваць сваю адказнасць. Вядома, не перанапружваючы кантралёраў. А то мы цяпер такімі мерамі ў іх адаб'ём не тое што ахвоту, а ўсялякае жаданне працаваць. Але адказнасць павінна быць ва ўсіх, у тым ліку і ў кантралёраў", - упэўнены Аляксандр Лукашэнка.

Прэзідэнт таксама канстатаваў, што сёння кантрольныя органы могуць часова прыпыняць дзейнасць прадпрыемстваў. "Гэта не справа кантралёраў. Вы павінны пакласці на стол перад кіраўніком прадпрыемства, бізнесменам канкрэтныя прэтэнзіі, і ён няхай вырашае: працаваць яму ці лепш прыпыніць работу прадпрыемства, - адзначыў Кіраўнік дзяржавы. - Гэта кіраўнік, ён вырашыў прыпыніць - прыпыніў, устараніў недахопы. Не хоча прыпыняць - няхай не прыпыняе, але па выніках ён за гэта адкажа".


Асобна была абмеркавана сістэма ведамаснага кантролю. Аляксандр Лукашэнка пацікавіўся, якія меры будуць прыняты ў гэтым напрамку. Адзначана неабходнасць аптымізацыі пераліку кантралюючых органаў і сфер іх дзейнасці. "Я хачу, каб вы мне па гэтых пытаннях коратка далажылі, каб мне можна было прымаць рашэнне: падпісваць гэты ўказ ці не. Але яшчэ раз падкрэсліваю: вы кантралёр, дзяржаўны чалавек і павінны выключыць усё лішняе (жыццё паказала, што перашкаджае) і нават наперад паглядзець, што жыццё яшчэ не ўзняло на паверхню. Але ні ў якім выпадку вы не павінны "лібералізавацца" да такой ступені, што мы страцім кіруемасць у дзяржаве. Баланс, баланс і яшчэ раз баланс", - рэзюмаваў беларускі лідар.

Меры па ўдасканаленні кантрольнай дзейнасці сталі галоўнай тэмай сустрэчы Аляксандра Лукашэнкі са Старшынёй КДК. Аднак Леанід Анфімаў змог прыўнесці ў свой даклад нотку душэўнасці, расказаўшы аб сваім наведванні ў Дзень ведаў Слабодскаўскай сярэдняй школы Браслаўскага раёна.

Адна з першакласніц, калі Леанід Анфімаў уручаў ёй кнігу "Беларусь - наша Радзіма", пацікавілася, ці не ён Аляксандр Лукашэнка. Пачуўшы адмоўны адказ, яна папрасіла перадаць ад першакласнікаў школы прывітанне Прэзідэнту. "З якім сэрцам і пачуццём яна гэта папрасіла! Я, вядома, не магу не выканаць гэту просьбу і, стрымліваючы абяцанне перад дзяўчынкай, перадаю вам прывітанне не толькі ад першакласнікаў, але і ўсіх навучэнцаў гэтай школы са словамі вялікай удзячнасці", - сказаў ён.

"Можа, гэта дзяўчынка вырасце і стане добрым, душэўным кантралёрам у краіне?" - жартам выказаў меркаванне Аляксандр Лукашэнка.

"Чаму б і не? Але, вы ведаеце, я такога ад яе не чакаў проста. Гэта было настолькі шчыра, і ніхто яе, зразумела, не рыхтаваў да гэтага. Ад усяго сэрца сказала", - падкрэсліў Леанід Анфімаў.
Тэгі: Сустрэчы
© 2017, Прэс-служба Прэзідэнта Рэспублікі Беларусь