Бел
Галоўная   /  Падзеі

Даклад Міністра сельскай гаспадаркі і харчавання Івана Крупко і Намесніка Прэм'ер-міністра Аляксандра Субоціна

12 лістапада 2020 года

Прэзідэнт Беларусі Аляксандр Лукашэнка прыняў 12 лістапада з дакладам Міністра сельскай гаспадаркі і харчавання Івана Крупко і Намесніка Прэм'ер-міністра Аляксандра Субоціна.

У першую чаргу Кіраўнік дзяржавы закрануў пытанні завяршэння ўборачнай кампаніі. Ён падкрэсліў, што яе трэба закончыць на працягу некалькіх дзён, а затым своечасова пераараць палі і максімальна падняць зябліва, каб не "куляцца вясной".

"Як мы і дамаўляліся, да 15 лістапада ўсе работы па ўборцы ўраджаю трэба закончыць. Калі застануцца нейкія хвасты па кукурузным зерні або цукровых бураках, то пажадана 15-га завяршыць уборку гэтых культур, - сказаў Аляксандр Лукашэнка. - Мы вельмі нядрэнна спрацавалі ў бягучым годзе і своечасова ўбралі асноўныя культуры".

Прэзідэнт пацікавіўся вынікамі работы аграрнага сектара за бягучы год, фінансавымі паказчыкамі сельскагаспадарчых прадпрыемстваў. "Я разумею, што вельмі няпроста. Вёсцы заўсёды было няпроста, і за мяжой аказваецца сур'ёзная падтрымка сельгаспрадпрыемствам, фермерам. Мы таксама, наколькі можам, падтрымліваем сельскую гаспадарку. Але як у нас ідуць справы з фінансамі? Тыя крэдыты, якія брала вёска, трэба вяртаць. Тым больш што такая магчымасць сёння ёсць - разлічыцца з банкамі, бюджэтам па даўгах", - заявіў Кіраўнік дзяржавы.

Аляксандр Лукашэнка таксама закрануў тэму захаванасці ўраджаю і пастаўкі прадукцыі ў магазіны. Прэзідэнт нагадаў, што папрасіў прафсаюзы ўзяць на кантроль цэнаўтварэнне ў краіне. "Зразумела, будуць кантраляваць асноўныя пазіцыі. Перш за ўсё, гэта прадукты харчавання. Мы дамаўляліся аб тым, што краіна павінна нарыхтаваць стабілізацыйныя фонды, гэта значыць запасы, каб прадуктаў хапіла да мая - чэрвеня. Гэта трэба цалкам нарыхтаваць. Што далей - трэба ўзяць на строгі кантроль работу губернатараў, мясцовых органаў улады па пытаннях забеспячэння прадуктамі харчавання ў зімовы і вясновы перыяд нашага насельніцтва, каб не было вагання цэн, - даручыў Прэзідэнт віцэ-прэм'еру. - А так атрымліваецца, вы мне восенню дакладваеце, што прадуктаў харчавання ў сховішчах з лішкам, а цэны пачынаюць скакаць. На якія віды - на бульбу, капусту або грэчку. Як гэта так, чаго не хапае?"

Асобна Кіраўнік дзяржавы спыніўся на стане спраў у сельскай гаспадарцы ў Віцебскай вобласці. Ён нагадаў, што ў рэгіёне было створана некалькі інтэграцыйных структур па перапрацоўцы сельскагаспадарчай сыравіны. "Як яны спрацавалі і які вынік? Ні ў якім разе нельга ўпусціць гэта пытанне, бо пройдзе 3-5 гадоў - зноў прыйдуць, рукі развядуць і скажуць, што не атрымалася. Кожны год трэба кантраляваць, як гэта рэалізуецца, якую аддачу дае гэта сістэма работы, - падкрэсліў Аляксандр Лукашэнка. - Мне здаецца, гэта нядрэнная сістэма. Потым яе давядзецца перакладваць на іншыя вобласці - на асобныя раёны, рэгіёны. Недзе знойдуцца такія прадпрыемствы, якія мы павінны будзем аб'яднаць, і яны будуць займацца перапрацоўкай таго, што аддадуць калгасы, саўгасы і фермеры".

Таксама Прэзідэнт нагадаў аб правядзенні ў бліжэйшыя месяцы Усебеларускага народнага сходу. На ім у тым ліку будзе абмяркоўвацца і будучыня аграпрамысловай галіны. "У нас у краіне павінна быць праграма на 2021-2025 гады, як мы будзем планаваць у галіне сельскай гаспадаркі нашы справы?" - пацікавіўся Кіраўнік дзяржавы.

Як далажыў Міністр сельскай гаспадаркі і харчавання Іван Крупко, па выніках работы за 10 месяцаў гэтага года тэмп росту вытворчасці сельскагаспадарчай прадукцыі ва ўсіх катэгорыях гаспадарак склаў 104,6%, а на сельгаспрадпрыемствах - 106,7%.

"Гэта значыць, у калгасах і саўгасах дадатковы аб'ём, прыбаўка сельгаспрадукцыі вышэй, чым у фермераў?" - удакладніў Кіраўнік дзяржавы. На гэта Міністр растлумачыў, што, сапраўды, сельгаспрадпрыемствы прадэманстравалі большы рост - 106,7% да ўзроўню мінулага года ў параўнанні з 96% у асабістых падсобных гаспадарках. "Усе рэгіёны спрацавалі з ростам да ўзроўню мінулага года", - дадаў Іван Крупко.

Тэгі: Сустрэчы
© 2020, Прэс-служба Прэзідэнта Рэспублікі Беларусь