Даклад аб рэалізацыі норм Указа № 253 "Аб мерах па фінансавым аздараўленні сельскагаспадарчых арганізацый"

Вынікам работы па аздараўленні адстаючых сельскагаспадарчых арганізацый павінен стаць іх выхад на рэнтабельную вытворчасць. Гэтага запатрабаваў Прэзідэнт Беларусі Аляксандр Лукашэнка, заслухоўваючы даклад аб рэалізацыі норм Указа № 253 "Аб мерах па фінансавым аздараўленні сельскагаспадарчых арганізацый" і прапануемых у яго змяненнях.

"У першую чаргу мяне, вядома ж, цікавіць фінансавы стан сельгасарганізацый. Галоўнае - прыбытак і рэнтабельнасць. Як мяне інфармавалі па ходзе уборачнай, цэны сёння нядрэнныя на тавары і прадукты, якія мы вырабляем, што дае магчымасць нам трымаць рэнтабельнасць продажаў ад 15% да 80%", - сказаў Аляксандр Лукашэнка.

Прэзідэнт пацікавіўся, як на месцах выконваецца Указ № 253. "Які вынік ад гэтага Указа, а галоўнае - ці знізілася колькасць неплацежаздольных гаспадарак, ці павысілася эфектыўнасць сельгасвытворчасці?" - спытаў Кіраўнік дзяржавы.

Урад прапануе ўнесці ў гэты Указ шэраг змяненняў для больш эфектыўнай рэалізацыі дакумента. "Што было не ўлічана і без якіх норм гэты Указ не можа працаваць у адпаведнасці з вашымі пажаданнямі і выхадам сельгасарганізацый на прыбытковую работу? Хацелася б ведаць, што дадуць змяненні ў гэты Указ для сельскай гаспадаркі, ці дастаткова ўносімых змяненняў для стабільнай работы сельгасарганізацый?" - пацікавіўся Аляксандр Лукашэнка.

Ён нагадаў аб адказнасці за распрацоўку такіх дакументаў як членаў урада, так і спецыялістаў. "Частыя змяненні ніколі не былі на карысць тым, хто займаецца асабліва матэрыяльнай вытворчасцю, - рэальнаму сектару эканомікі", - звярнуў увагу Прэзідэнт.

Як далажыў намеснік Прэм'ер-міністра Міхаіл Русы, Указ № 253 "Аб мерах па фінансавым аздараўленні сельскагаспадарчых арганізацый" быў прыняты ў ліпені 2016 года і накіраваны на аднаўленне плацежаздольнасці тых прадпрыемстваў, якія апынуліся ў крытычным стане. На той момант налічвалася 425 такіх арганізацый, з іх пад працэдуру дасудовага аздараўлення трапілі 323 прадпрыемствы, пад працэдуру антыкрызіснага кіравання - 102.

"Вынікі работы за першае паўгоддзе паказваюць, што Указ правільны, прыняты своечасова. За паўгода 32 арганізацыі аднавілі плацежаздольнасць і пачалі працаваць па нармальным цыкле, палепшыла каэфіцыент плацежаздольнасці 131 арганізацыя, на былым узроўні засталіся 80, у 68 арганізацый на сённяшні дзень каэфіцыент плацежаздольнасці пагоршаны", - праінфармаваў Міхаіл Русы.

Прэзідэнту далажылі, што ў праекце новага дакумента прапісаны дадатковыя меры, рэалізацыя якіх дасць магчымасць больш эфектыўна працаваць са стратнымі сельскагаспадарчымі арганізацыямі. У прыватнасці, прадугледжваецца зніжэнне арэнднай платы за прадпрыемства як маёмасны комплекс з 5% да 2% ад балансавага кошту маёмасці. Дэталізуецца працэдура правядзення канвертацыі патрабаванняў крэдытораў у акцыі дадатковага выпуску з аплатай гэтых акцый шляхам заліку патрабаванняў да сельскагаспадарчай арганізацыі.

Аляксандр Лукашэнка даручыў дапрацаваць асобныя моманты і прадугледзець асаблівы статус для прадпрыемстваў, якія знаходзяцца ў працэдуры банкруцтва або трапляюць пад яе. Прапануецца распаўсюдзіць на такія прадпрыемствы інструменты антыкрызіснага кіравання: дадатковы выпуск акцый паміж акцыянерамі і трэцімі асобамі, канвертацыю патрабаванняў крэдытораў у акцыі, унясенне ўкладаў удзельнікамі і трэцімі асобамі ў статутны фонд арганізацыі, замяшчэнне актываў прадпрыемства.

Асаблівую ўвагу Кіраўнік дзяржавы звярнуў на ўдзел мясцовых органаў улады ў рабоце па аздараўленні сельгасарганізацый, паколькі яны нясуць адказнасць за кожнае прадпрыемства і яго калектыў. Менавіта ўлада на месцах, на думку Прэзідэнта, у першую чаргу павінна вырашаць, якім чынам арганізацыі будуць праходзіць працэдуру аздараўлення. Такім чынам будзе гарантавана захаванне вытворчасці і калектываў.

Асобна на нарадзе Аляксандр Лукашэнка спыніўся на пытаннях завяршэння ўборачнай кампаніі, адзначыўшы, што, па запэўніваннях службовых асоб урада і Мінсельгасхарча, яна павінна была завяршыцца да 7 лістапада. "Што на сённяшні дзень? Хацеў бы пачуць адказ на гэта пытанне. Барані бог, калі я замест інфармацыі атрымаю дэзынфармацыю. Я маю на ўвазе тую інфармацыю, якую мне нядаўна прадставіў Камітэт дзяржкантролю, па якой або міністры не валодаюць абстаноўкай у сельскай гаспадарцы, або наўмысна разам з губернатарамі фальсіфікуюць ход і вынікі ўборачнай кампаніі", - папярэдзіў Прэзідэнт.

Кіраўнік дзяржавы пацікавіўся, як рыхтуецца глеба пад ураджай наступнага года, што з назапашваннем мінеральных угнаенняў і як забяспечана зімоўка жывёлы. "Жыццё не заканчваецца 2017 годам, таму ўраджай будучага закладваецца ўжо сёння. Хацелася б ведаць, як вы бачыце перспектывы 2018 года", - сказаў ён.

На нарадзе Аляксандр Лукашэнка абмеркаваў з кожным губернатарам вынікі ўборачнай у рэгіёнах, быў разгледжаны шэраг прыватных і праблемных пытанняў. Асобна Прэзідэнт адзначыў работу спецыялістаў аграпрамысловага комплексу краіны. "Год быў няпросты, мы звярталіся да спецыялістаў, вяскоўцаў. Яны адгукнуліся і на маю просьбу, уборку збожжавых правялі ў сціслыя тэрміны, даволі эфектыўна. Зразумела, надыходзіць час, калі людзям трэба падзякаваць", - звярнуў увагу ён.

Плануецца, што ў пачатку наступнага года будзе арганізавана асобнае мерапрыемства з удзелам Кіраўніка дзяржавы, дзе будуць падведзены вынікі мінулага года і абазначаны перспектывы на будучы. На ім таксама адзначаць лепшых работнікаў сельскагаспадарчай сферы. Канцэпцыя гэтага мерапрыемства пакуль распрацоўваецца.