Даклад аб канчатковых варыянтах праектаў Падатковага кодэкса і закона аб бюджэце Рэспублікі Беларусь на 2019 год

Прэзідэнт Беларусі Аляксандр Лукашэнка патрабуе, каб пры бюджэтным планаванні на 2019 і наступныя гады закладваліся толькі неабходныя расходы, без марнатраўства. Аб гэтым ён заявіў 17 снежня, заслухоўваючы даклад аб канчатковых варыянтах праектаў Падатковага кодэкса і закона аб бюджэце Рэспублікі Беларусь на 2019 год.

"Прычына нашай сённяшняй невялікай нарады ў тым, што пасля разгляду планаў нашай работы і праекта бюджэту на будучы год я даручыў, каб вы са сваімі спецыялістамі яшчэ раз звярнуліся да праекта бюджэту. І папрасіў, каб ніякіх люфтаў у праекце бюджэту не было. Ніякага марнатраўства дзяржаўных сродкаў у будучым годзе дапусціць мы не можам. І не толькі ў будучым. Мы павінны лічыць кожную капейку", - падкрэсліў беларускі лідар.

"Я з практыкі ведаю, што ёсць жаданне ва Урада, міністраў, яшчэ кагосьці, хто залежыць ад бюджэту, мець нейкія рэзервы на ўсялякі выпадак для нечага. Гэта катэгарычна недапушчальна. І вы павінны былі, калі гэта было, выправіць за мінулыя два тыдні", - адзначыў Прэзідэнт.

Ён даручыў Старшыні Камітэта дзяржаўнага кантролю, каб пры выкананні бюджэту 2019 года на гэта пытанне была звернута асаблівая ўвага. "Ніякіх закупак аўтамабіляў, акрамя цэнтралізаваных. І ў нас свая аўтамабільная вытворчасць. Я прашу гэта мець на ўвазе. Ніякіх расходаў на розныя непатрэбныя паездкі, раз'езды і камандзіроўкі. Трэба з гэтым заканчваць, - запатрабаваў Кіраўнік дзяржавы. - Хопіць ездзіць па канферэнцыях. У нас практычна ў кожнай дзяржаве, дзе праходзяць гэтыя канферэнцыі, ёсць пасольствы. Арыентуйце іх, і няхай яны гэтым займаюцца".

Аляксандр Лукашэнка падкрэсліў, што наведваць разнастайныя мерапрыемствы трэба толькі ў тым выпадку, калі гэта прынясе фінансавую выгаду дзяржаве або будзе садзейнічаць пазітыўнаму фарміраванню іміджу краіны.

"Каб быў вынік. Вы разумееце, пра што размова. Гэта датычыцца ўсіх. Таму я і даручыў паглядзець яшчэ раз план бюджэту на 2019 год, каб не было ніякіх празмернасцей", - дадаў Прэзідэнт.

Кіраўнік дзяржавы таксама адзначыў, што гэта пытанне неабходна аператыўна разгледзець, каб затым парламент у рамках сваёй кампетэнцыі мог прыняць рашэнне па адпаведным законапраекце. "Ведаю, што дэпутаты вывучылі праект бюджэту і чакаюць магчымых карэкціровак ад Прэзідэнта. Будуць яны ці не, па выніках нарады мы вызначымся. Але сёння бюджэт трэба прыняць, каб мы маглі адправіць гэты план на месцы. Каб маглі азнаёміцца тыя, хто будзе займацца бюджэтным планаваннем на месцах", - падкрэсліў беларускі лідар.

Прэзідэнт адзначыў, што прысутнічае мноства розных пунктаў гледжання і меркаванняў пасля таго, як на ўзроўні Урада не ўдалося дамовіцца па пытанні праводзімага ў Расіі падатковага манеўру. Аляксандр Лукашэнка падкрэсліў, што ў выніку гэтых змяненняў, якія могуць адбыцца, для Беларусі чарговы раз у ЕАЭС і Саюзнай дзяржаве пагаршаюцца ўмовы функцыянавання эканомікі.

"Мяне насцярожвае, што беларусы захваляваліся. Я хачу прама сказаць: хвалявацца абсалютна няма прычын. Гэта наша праблема - кіраўніцтва краіны, - якую мы павінны вырашыць. Нават пры горшым варыянце нічога не абваліцца. А што датычыцца 2019 года, то наогул размоў няма. Таму трэба спакойна жыць і працаваць, - заявіў беларускі лідар. - Калі мы не дамовімся, то гэты падатковы манеўр на нас навалам будзе ісці паступова з 2019 па 2024 год. У 2019 годзе, калі раптам, то мы можам страціць каля $400-500 млн. Так, гэта вялікія грошы, але не катастрофа для краіны".

"І наогул ніякай катастрофы не будзе. Проста мы будзем вымушаны перафармаціраваць у нейкай ступені нашу ўнутраную, знешнюю палітыку. І асабліва ўсё, што звязана з фінансамі", - падкрэсліў Аляксандр Лукашэнка.

Кіраўнік дзяржавы яшчэ раз адзначыў, што ніякай насцярожанасці ў людзей быць не можа. "Мы будзем развівацца чаго б гэта ні каштавала ў тым напрамку, у якім мы вызначым тут - у суверэннай незалежнай Беларусі. Таму і бюджэт, а гэта вялікія грошы - мільярды долараў і рублёў - мы павінны вельмі дакладна размеркаваць, каб гэтыя сродкі трапілі туды, куды трэба. Таму, хто ў гэтым мае патрэбу", - сказаў беларускі лідар.

Аляксандр Лукашэнка заклікаў жыхароў Беларусі спакойна працаваць, балець за сваю сям'ю, дзяцей, асабліва напярэдадні навагодніх свят. Ён звярнуў увагу на важнасць праяўлення клопату і дапамогі пажылым людзям і дзецям, каб ніхто не застаўся без увагі. "Мы павінны арганізаваць, як у былыя часы, каб ні адзін пенсіянер, дзіця, не засталіся без увагі. Каб не было як у Салігорску. Не ведаю, праўда ці не - у чаргу пенсіянераў за нейкімі падарункамі выстраілі. Ну што гэта такое?! Гэта ненармальна! Няўжо нельга арганізаваць як належыць", - адзначыў Кіраўнік дзяржавы.

Аляксандр Лукашэнка звярнуў увагу, што наперадзе навагоднія ёлкі, сустрэчы, наведванне дзіцячых дамоў, людзей з інваліднасцю - усіх тых, хто мае патрэбу ў дапамозе. "Мы павінны прыйсці да людзей. Мы павінны помніць, што ўсе мы будзем пенсіянерамі і старымі. Маладымі мы ўжо не будзем. Таму, пакуль у нас ёсць сілы, трэба па-сапраўднаму паставіцца да нашых людзей, звярнуць да гэтага нашых бізнесменаў (яны заўсёды падтрымлівалі такія святы і заўсёды ішлі да людзей)", - сказаў Прэзідэнт.

Асабліва Кіраўнік дзяржавы лічыць важным удзяліць увагу тым, хто мае патрэбу ў дапамозе. "А ўсім астатнім трэба рыхтавацца да свят, і правесці гэтыя святы як належыць. Там і выхадных дастаткова будзе, каб людзі маглі адпачыць, удзяліць больш увагі сваім дзецям. Гэта галоўнае", - падкрэсліў беларускі лідар.

"Трэба проста займацца сваёй краінай, берагчы яе, шанаваць, не дапускаць ні ў якім разе пагаршэння крымінагеннай сітуацыі. Каб людзі маглі ў гэтыя святочныя і перадсвяточныя дні спакойна адпачываць", - рэзюмаваў Аляксандр Лукашэнка.