Афіцыйныя перагаворы Аляксандра Лукашэнкі і Георгія Маргвелашвілі
- 27
Беларусь і Грузія пацвярджаюць зацікаўленасць ва ўмацаванні двухбаковага ўзаемадзеяння на ўсіх узроўнях. Такі вынік праведзеных 1 сакавіка афіцыйных перагавораў Прэзідэнта Беларусі Аляксандра Лукашэнкі і Прэзідэнта Грузіі Георгія Маргвелашвілі.
Перагаворы кіраўнікоў дзяржаў прайшлі спачатку ў фармаце
сам-насам, а потым у пашыраным складзе з удзелам членаў дэлегацый. Сустрэча
прэзідэнтаў сам-насам доўжылася каля трох гадзін, таму бакі змаглі абмеркаваць
шырокі комплекс пытанняў двухбаковага супрацоўніцтва, удзяліўшы асаблівую ўвагу
развіццю гандлёва-эканамічнага ўзаемадзеяння.
"Мы заўсёды рады бачыць нашых грузінскіх братоў у Беларусі. У
нас больш, чым агульная гісторыя. На тэрыторыі Беларусі за яе вызваленне
змагаліся тысячы грузінскіх грамадзян. Шмат, на жаль, загінула нашых братоў
грузін, вызваляючы і абараняючы Беларусь. Гэта тая частка гісторыі, якая ніколі
не забываецца і не можа быць забыта. Таму вы для нас вельмі блізкія людзі, і мы
заўсёды з найвялікшай павагай ставіліся і ставімся не толькі да вашай гісторыі,
але і да людзей, якія пражывалі на гэтым гераічным кавалачку зямлі, імя якому
сёння - свабодная і незалежная Грузія, - сказаў Аляксандр Лукашэнка. - Мы
адчуваем, што ў нас добрыя адносіны, і мы на гэтай аснове гатовы да любога
супрацоўніцтва".
Нягледзячы на
складанасць сітуацыі ў сусветнай эканоміцы, аб'ёмы гандлю паміж краінамі выраслі
ў 2016 годзе на 63 працэнты - амаль да $100 млн, дасягнуўшы рэкорднага за
апошнія пяць гадоў паказчыка. "Няхай гэта яшчэ не той тавараабарот, які павінен
быць і які мы намецілі, але паўдарогі мы прайшлі. Мы некалі дамовіліся, што $200
млн - гэта першая ступень, якую мы павінны дасягнуць у гандлі. Трэба аддаць
належнае, што такіх тэмпаў росту ў нас няма ні з адной краінай. Больш таго, гэта
вельмі сур'ёзны прырост нават на фоне Еўразійскага эканамічнага саюза, дзе ў
нас, на жаль, падзенне. Вядома, аб'ёмы не супастаўныя, але сама тэндэнцыя
абнадзейвае", - заявіў беларускі лідар.
Пры развіцці эфектыўнага ўзаемадзеяння Кіраўнік дзяржавы
прапанаваў удзяліць асаблівую ўвагу новым ініцыятывам. "Грузія, напрыклад, у
бліжэйшы час плануе ўзвесці лядовую арэну і біятлонны стадыён на гарналыжным
курорце Бакурыяні. Беларускія праектныя і будаўнічыя арганізацыі гатовы
прапанаваць вам сваю дапамогу. Думаю, што грузінскі бок зацікавіць наш вопыт па
загрузцы спартыўных аб'ектаў, выкарыстанні іх інфраструктуры для правядзення
спартыўных і масавых мерапрыемстваў. Шмат агульных інтарэсаў можна знайсці ў
сферы гарадской гаспадаркі, развіцця грамадскага транспарту і камунальных
паслуг, - адзначыў Прэзідэнт. - У Беларусі апошнім часам створаны новыя
высокатэхналагічныя вытворчасці. З такой прадукцыяй мы прысутнічаем ужо і на
грузінскім рынку. У мінулым годзе ў Грузію былі пастаўлены паязды фірмы
"Штадлер". Спадзяёмся, што і іншая наша тэхніка з'явіцца на вашых вуліцах і
дарогах. Прытым я хачу сказаць, што тэхніка можа быць сумесна выраблена на
тэрыторыі Грузіі. Для пачатку мы можам паставіць яе адсюль. Але ў любым выпадку
яна будзе ў разы таннейшая за сусветныя аналагі".
Аляксандр Лукашэнка таксама лічыць мэтазгодным разгледзець
магчымы ўдзел беларускіх прадпрыемстваў у сістэме дзяржаўных закупак Грузіі.
Асабліва ў тэндарах на пашыў форменнага адзення і пастаўку прадуктаў харчавання
для сілавых структур. Бакі таксама абмеркавалі магчымасці стварэння ў Беларусі
сумесных прадпрыемстваў па перапрацоўцы грузінскай сельскагаспадарчай прадукцыі.
"Як бачыце, праектаў, якія ўяўляюць узаемны інтарэс, шмат. Задача ў тым, каб
разумна і адказна падысці да іх прапрацоўкі і рэалізацыі", - падкрэсліў Кіраўнік
дзяржавы.
Разам з прагматычнымі
пытаннямі эканомікі Беларусь удзяляе сур'ёзную ўвагу гуманітарнаму складніку.
"Цудоўную магчымасць азнаёміцца з гісторыяй і традыцыямі нашых народаў дае
ўзаемны абмен Днямі нацыянальных культур. Патрэбнасць у іх правядзенні існуе і ў
беларускім, і ў грузінскім грамадстве, - упэўнены Прэзідэнт. - У час ранейшых
сустрэч я не раз падкрэсліваў, што Беларусь для Грузіі - краіна не чужая. Мы як
былі брацкімі народамі, так і застаёмся".
У сваю чаргу Георгій Маргвелашвілі заявіў, што праведзены ў
2015 годзе візіт Аляксандра Лукашэнкі ў Грузію надаў зусім новы імпульс і
энергію двухбаковым адносінам. "Мы прадстаўляем прыклад таго, як могуць дзве
краіны, якія выбралі розныя эканамічныя блокі для свайго развіцця, зыходзячы з
паважання і прызнання інтарэсаў адна адной на карысць сваіх народаў развіваць
адносіны і не ствараць шурпатасцей і канфліктаў, - сказаў ён. - Мы з вамі
закранулі міжнародныя пытанні, і я асабліва хачу падкрэсліць нашу зацікаўленасць
у абмене вопытам па напрамку супрацоўніцтва з Кітаем. Мы акцэнтуем гэта пытанне
ў нашай знешняй эканамічнай палітыцы. Інтарэс Кітая ў рэгіёне вельмі значны, і
мы зацікаўлены супрацоўнічаць з вамі і ў гэтым пытанні".
Па выніках перагавораў лідараў дзвюх краін былі
падпісаны пагадненні паміж ўрадамі аб паветраных зносінах, аб садзейнічанні
ажыццяўленню і ўзаемнай абароне інвестыцый. Прэзідэнты Беларусі і Грузіі таксама
прынялі сумесную заяву, у якой пацвердзілі зацікаўленасць сваіх краін ва
ўмацаванні двухбаковага ўзаемадзеяння на ўсіх узроўнях і ва ўсіх сферах, што
ўяўляюць узаемны інтарэс.
Затым
Аляксандр Лукашэнка і Георгій Маргвелашвілі прынялі ўдзел у цырымоніі пасадкі
дрэва на Алеі ганаровых гасцей Палаца Незалежнасці.