Афіцыйны прыём ад імя Прэзідэнта Беларусі з нагоды старога Новага года

Кіраўнік дзяржавы Аляксандр Лукашэнка ўпэўнены, што Беларусь пераадолее негатыўныя наступствы сусветнага крызісу. Аб гэтым Аляксандр Лукашэнка заявіў 15 студзеня на традыцыйным афіцыйным прыёме ад імя Прэзідэнта Беларусі з нагоды старога Новага года.

Прэзідэнт падкрэсліў, што стары Новы год вянчае чараду калядных і навагодніх свят. "Не скрыю, маё запаветнае жаданне ў тым, каб гэты год стаў прарыўным і адкрыў новы этап развіцця краіны, каб мы пераадолелі негатыўныя наступствы сусветнага крызісу і значна павысілі ўзровень жыцця людзей, - адзначыў Аляксандр Лукашэнка. - Веру не ў цуд, а ў нашы сілы і здольнасці. Мы гэта зможам, калі ўсе разам будзем працаваць з поўнай аддачай і бачыць перад сабой мэту, пераадольваючы цяжкасці і складанасці, будзем ісці. І ні ў якім разе - не спыняцца".

Кіраўнік дзяржавы нагадаў прытчу з Евангелля: "Апостал Пётр у цвёрдай веры ішоў па бушуючым моры, нібы па сушы. Але як толькі пахіснулася яго вера, ён пачаў тануць. Калі Хрыстос яго ўратаваў, то сказаў яму: "Малаверны! Навошта ты засумняваўся?". Таму, як падкрэсліў Аляксандр Лукашэнка, трэба без сумнення рухацца да мэты, але не напралом.

"Вось так і ў нашым жыцці. Выбралі свой курс, трэба яго прытрымлівацца, не паддаючыся ніякім сумненням і страхам. Тады нашаму караблю не будзе страшны ніякі шторм. Смеласць, настойлівасць бяруць гарады - вось дэвіз, які пакінула нам у спадчыну наша пакаленне пераможцаў", - адзначыў Кіраўнік дзяржавы.

Прэзідэнт падкрэсліў, што Бог надзяліў нас правам жыць на цудоўнай зямлі, а на добрай зямлі і добрая надзея, як сведчыць народная мудрасць. "Дык няхай жа здзейсняцца ўсе добрыя надзеі, каб наша Беларусь заўсёды заставалася квітнеючым, цудоўным краем, які за хараство і святасць беларускі пісьменнік Уладзімір Караткевіч назваў "Зямлёй пад белымі крыламі". Няхай у нашых дамах пануюць узаемаразуменне, дабрабыт і любоў. А на роднай зямлі - абавязкова мір і працвітанне", - пажадаў Аляксандр Лукашэнка.

Кіраўнік дзяржавы ўручыў дзяржаўныя ўзнагароды: ордэн Айчыны III ступені - міністру аховы здароўя Васілю Жарко, ордэн Пашаны - міністру працы і сацабароны Мар'яне Шчоткінай і галоўнаму архітэктару праектаў праектнага рэспубліканскага ўнітарнага прадпрыемства "Белпрампраект" Марату Гроднікаву. Медаля "За працоўныя заслугі" ўдастоены галоўны трэнер хакейнай каманды "Юнацтва-Мінск" Міхаіл Захараў і палітычны аглядальнік галоўнай рэдакцыі АТН Нацыянальнай дзяржаўнай тэлерадыёкампаніі Андрэй Крывашэеў. Акрамя таго, ганаровае званне "Заслужаны артыст Рэспублікі Беларусь" прысвоена артысту-вакалісту (салісту) Маладзёжнага тэатра эстрады Вікторыі Алешка.

Гэтых узнагарод прадстаўнікі розных галін удастоены за высокі прафесіяналізм, актыўную грамадскую дзейнасць, значны асабісты ўклад у рэалізацыю сацыяльна-эканамічнай палітыкі, заслугі ў развіцці будаўнічай сферы, аховы здароўя, культуры і спорту.

Акрамя таго, заахвочаны і спартсмены. Падзяка Прэзідэнта Рэспублікі Беларусь аб'яўлена шэрагу хакеістаў за значны асабісты ўклад у паспяховае выступленне хакейнай каманды Прэзідэнта Беларусі на ХІІ Калядным міжнародным турніры аматараў хакея на прыз Прэзідэнта Беларусі.