Рабочая паездка ў Шклоў

Прэзідэнт Беларусі Аляксандр Лукашэнка запатрабаваў надзейна абараняць інтарэсы Беларусі ў рабоце з замежнымі партнёрамі і нагадаў аб імпартазамяшчэнні. Адпаведныя заявы Кіраўнік дзяржавы зрабіў 24 студзеня, наведваючы РУП "Завод газетнай паперы" ў Шклове.

У прыватнасці, абмяркоўвалася рэалізацыя інвестыцыйнага праекта па стварэнні паперы-асновы для дэкаратыўных абліцовачных матэрыялаў. Першапачаткова прадпрыемства супрацоўнічалі з вядомай у свеце чэшскай кампаніяй - пастаўшчыком абсталявання. Аднак у выніку рэалізацыя праекта зацягнулася, а частка абсталявання аказалася непрыдатнай. Пачаліся судовыя справы з чэшскай кампаніяй, якія не скончыліся да гэтага часу.

Аляксандр Лукашэнка строга запатрабаваў, каб інтарэсы беларускага боку няўхільна былі абаронены, і гэта датычыцца не толькі канкрэтнага выпадку.

Прэзідэнт запатрабаваў далажыць яму аб усіх магчымых рычагах уздзеяння на чэшскі бок: "Я гэтага не баюся. Мы іх павінны паставіць на месца. Так нельга ставіцца да краіны. І папярэдзьце Макея (Міністр замежных спраў Беларусі Уладзімір Макей. - Заўвага). Я яму даручаў, калі прымаў даверчыя граматы чэшскага пасла. Пасол мяне зразумеў. І сказаў: гэта не варта таго, каб мы сапсавалі адносіны".

"Яны разумеюць, што праўда не на іх баку. Таму далажыце мне ўсе рычагі ўздзеяння на гэту краіну. Мы павінны паказаць, што трэба па-чалавечы ставіцца да камерцыйных і іншых праектаў. Гэта ўзаемаадносіны дзяржаў. Мы ніколі з Чэхіяй не мелі праблем. Тым больш, што я прасіў пасла заняцца гэтым і зняць праблему", - заўважыў Кіраўнік дзяржавы.

Гаворачы пра вытворчасць паперы-асновы, ён падкрэсліў важнасць імпартазамяшчэння. "Усе 13 тыс.т ён (завод газетнай паперы ў Шклове. - Заўвага) павінен паставіць любымі спосабамі ў Беларусь. Ніхто не павінен ні грама завезці сюды звонку, калі ён зможа вырабіць гэтыя аб'ёмы", - даручыў Аляксандр Лукашэнка.

Пры гэтым Кіраўнік дзяржавы падкрэсліў, што трэба паслядоўна адстойваць свае інтарэсы: "Глядзіце за сваёй краінай. Хопіць глядзець па баках і быць пушыстымі і белымі. У нас ёсць свае інтарэсы, свая дзяржава і свой народ, і мы павінны іх абараніць, чаго б нам гэта ні каштавала. А то ж мы вырабляем прадукты харчавання, дзяваць няма куды, а па імпарце кожны год прырост па пастаўках прадуктаў харчавання, лес дзяваць няма куды, дрэваапрацоўка свая... Занадта "добрымі" сталі. За кошт дзяржавы і народа".

Аляксандр Лукашэнка звярнуў увагу, што Кітай і ЗША па абазначаных прычынах нават пачалі гандлёвую вайну. "Не могуць дамовіцца. Толькі першы этап прайшлі. Таму імпартазамяшчэнне - пытанне нумар адзін, асабліва тое, што мы вырабляем. Навошта мы завозім, плацім грошы і даём работу іншым людзям, калі нам трэба тут знайсці гэтыя грошы?" - задаў рытарычнае пытанне Кіраўнік дзяржавы.

Прэзідэнту далажылі аб сацыяльна-эканамічным развіцці Магілёўскай вобласці і Шклоўскага раёна, рабоце канцэрна "Беллеспаперапрам", росце ўкладу ляснога комплексу ў эканоміку краіны. Кіраўнік дзяржавы папярэдзіў, каб усё абяцанае і агучаныя планы няўхільна выконваліся. "Вы бачыце, якая сітуацыя. Я нікому не дарую, калі не будуць выкананы дадзеныя мне абяцанні", - сказаў ён.

Заслухаўшы даклады аб рабоце завода, Кіраўнік дзяржавы азнаёміўся з выпускаемай тут прадукцыяй. Асабліва яго зацікавіла папяровая ўпакоўка: завод вырабляе яе ў вялікай колькасці і для самых розных мэт. "У сувязі з тым, што я не адступлю ад свайго даручэння па замене пластыку на паперу, трэба даць зялёнае святло вытворчасці ў краіне гэтага ўпаковачнага матэрыялу і пакетаў", - падкрэсліў Аляксандр Лукашэнка.

На яго думку, у асобных сферах неабходна наогул забараніць пластыкавую ўпакоўку. Акрамя, вядома, тых, дзе без яе не абысціся. "Дапусцім, ёсць пластыкавыя скрыні для яблыкаў - яны моцныя, даўгавечныя. Ім быць (пакуль, прынамсі)? Быць. І потым - іх жа лёгка перапрацаваць, калі трэба", - прывёў прыклад Прэзідэнт. Усё астатняе ён запатрабаваў замяніць экалагічнымі матэрыяламі.

Ён таксама звярнуў увагу на неабходнасць будаўніцтва смеццеперапрацоўчых заводаў: "У вобласці не павінна быць гор і палігонаў са смеццем - гэта ж вялізныя грошы. Трэба перапрацаваць усё смецце. Гэта жалезнае даручэнне. Трэба запісаць яго з тэрмінамі, каб ва Урадзе ведалі, што нам трэба адысці ад пластыку".

Аляксандр Лукашэнка на заканчэнне наведвання завода паразмаўляў з прадстаўнікамі працоўнага калектыву. Ён расказаў, што калісьці было прынята рашэнне аб развіцці Беларусі, і акцэнт быў зроблены на тыя напрамкі, дзе ёсць сыравіна і магчымасці. Сярод іх дрэваапрацоўка. "Усё, што вы вырабляеце тут, купяць, але трэба варушыцца. Мы застылі, і ў гэтым уся праблема. Многія мяне ведаюць з юнацтва і маладосці. Людзей прымусіць варушыцца я ўмею. Таму разварушвайцеся, дырэктар у вас нядрэнны. Я веру, што вы абяцанае зробіце. Усё, што трэба ад дзяржавы, ужо атрымліваеце", - падкрэсліў беларускі лідар.

Ад працоўнага калектыву Кіраўніку дзяржавы падарылі пано з дрэва "Трафімава крыніца", якая знаходзіцца на малой радзіме Прэзідэнта ў наваколлі аграгарадка Александрыя.

Першапачаткова чакалася, што Аляксандр Лукашэнка пабывае толькі на РУП "Завод газетнай паперы". Аднак, прыбыўшы туды раніцай, ён заявіў, што мае намер наведаць і Шклоўскі масларобны завод, ільнозавод і дрэваапрацоўчае прадпрыемства. Па даручэнні Кіраўніка дзяржавы туды таксама была выклікана і раённы пракурор.

Пасля паўдня Прэзідэнт наведаў масларобны завод, дзе наведаў некалькі цэхаў, азнаёміўся з тэхналагічнымі працэсамі, а затым перайшоў на размешчаную па суседстве прыватную вытворчасць "Данон Шклоў".

Аляксандр Лукашэнка даручыў губернатару Магілёўскай вобласці падрабязна вывучыць работу двух гэтых прадпрыемстваў: магчыма, для больш паспяховай работы трэба аб'яднаць іх вытворчыя рэсурсы. "Трэба ўсе фактары звесці і паглядзець, што будзе лепш. Толькі трэба дамовіцца, каб не цялёпкаліся, як некалі гэта было", - падкрэсліў ён.

Наведваючы ААТ "Шклоўскі льнозавод", Прэзідэнт нагадаў кіраўніцтву прадпрыемства аб былых даручэннях і агучыць новыя. Асаблівую ўвагу Аляксандр Лукашэнка папрасіў звярнуць на сыравіну. На яго думку, калі завод не спраўляецца з доўгім ільновалакном, яго трэба аддаць іншым прадпрыемствам краіны, напрыклад, Аршанскаму льнокамбінату: там ёсць усе рэсурсы для вытворчасці якаснага прадукту. Акрамя таго, на льнозаводзе выйшла са строю частка ліній. Іх неабходна аператыўна аднавіць, запатрабаваў Кіраўнік дзяржавы.

Пакуль Кіраўнік дзяржавы размаўляў з чыноўнікамі і дырэктарамі вытворчасцей, высветлілася, што прыватнае дрэваапрацоўчае прадпрыемства наведваць не мае асаблівага сэнсу: яно не працуе. Прадпрыемства вельмі закрэдытавана, і ва ўласнікаў няма сродкаў вырашыць існуючыя праблемы. Мясцовая ўлада таксама не ведае, што рабіць з гэтай вытворчасцю.Прэзідэнт даручыў разабрацца з гэтым пытаннем і падрабязна далажыць яму аб сітуацыі, якая склалася.

У час размовы з прадстаўнікамі працоўнага калектыву завода газетнай паперы Аляксандр Лукашэнка адказаў на пытанні работнікаў. Адно з іх датычылася работы па забеспячэнні энергетычнай бяспекі краіны. "Мы працуем. Вельмі цяжка, вельмі няпроста. Вы ведаеце, чаму. Тут і палітычны, і эканамічны складнік. Але больш палітыкі. Гэта маё пытанне. Мы разбяромся. Але мы ні перад кім на каленях стаяць не будзем", - падкрэсліў беларускі лідар.

Аляксандр Лукашэнка расказаў аб прычынах цяжкасцей у сферы паставак энергарэсурсаў - газу і нафты. "Нязгода і канфлікт з Расіяй адбыліся з-за таго, што ад нас запатрабавалі за нафту плаціць цану большую, чым сусветная", - сказаў Прэзідэнт.

Ён адзначыў, што Беларусь ужо на працягу прыкладна пяці гадоў рухаецца да сусветнай цаны на нафту, і растлумачыў, з чым звязаны фактычны канфлікт з Расіяй: "са старым Урадам Расіі, які Прэзідэнт Пуцін адправіў у адстаўку".

Аляксандр Лукашэнка нагадаў аб расійскім падатковым манеўры ў нафтавай сферы, у выніку чаго Беларусь страчвае на вывазных мытных пошлінах. "Калісьці мы атрымлівалі нафту, гадоў пяць-шэсць таму, з палавінай мытнай пошліны. Але яны зрабілі манеўр. Узялі гэту палавіну, якую мы атрымлівалі, рэалізуючы нафтапрадукты - свой тавар. Адабраць яе няёмка, і яны зрабілі манеўр - увялі ў сябе падатак на здабычу карысных выкапняў і тым самым узнялі цану на нафту. Паступова па 15-20% падвялі нас да сусветнай цаны. Мы сёння маем 18-20% усяго толькі ад гэтай мытнай пошліны", - сказаў ён.

"Мы паставілі пытанне: браты, дарагія, старэйшы брат, гэтак жа не робяць. Нельга ж нас за дурняў трымаць. Там гэта ўзялі, у падатак унеслі. Прытым да цэнта, да долара. Ні больш, ні менш, менавіта столькі. І калі мы сталі разбірацца, мне далажылі людзі, якія рыхтавалі гэтыя нарматыўна-прававыя акты, законы, указы, пастановы Урада, што гэта зроблена спецыяльна. Каб націснуць на Беларусь, - заявіў Кіраўнік дзяржавы. - Навошта націснуць, здагадайцеся з трох разоў. Розныя былі тэорыі, заключэнні і іншае. Вы іх чулі. І ўсе яны, напэўна, маюць месца".

Аляксандр Лукашэнка выказаў сваю пазіцыю і наконт цаны на газ, які пастаўляецца ў Беларусь. Краіна не просіць нізкай цаны, а настойвае на аднолькавай цане з Расіяй, каб прадпрыемствы маглі канкурыраваць у роўных умовах. "Калі мы ім прадавалі нашу трубу белтрансгазаўскую, была дакладная дамоўленасць - нам паабяцалі, заплаціўшы грошы (невялікія, трэба сказаць, яны ўжо іх адпрацавалі практычна - $5 млрд), выраўняць з Расіяй па цане. Прайшоў час - забылі. Нядаўна я размаўляў з Прэзідэнтам Расіі. Я яму прама сказаў: а я гэта помню. Таму вы ўстанаўлівайце сваю цану на газ, але мы будзем таксама дзейнічаць зыходзячы з уласных інтарэсаў, чаго б нам гэта ні каштавала", - расказаў Прэзідэнт.

Што датычыцца нафты, то, паводле слоў Аляксандра Лукашэнкі, Уладзімір Пуцін сам узняў гэта пытанне на перагаворах у Піцеры: "кажа: як гэта так, чаму беларусы павінны купляць у нашых кампаній нафту даражэй за сусветную цану". Прэзідэнт растлумачыў, што да практычна сусветнай цаны на нафту ў Беларусі патрабавалі яшчэ заплаціць прэмію расійскім кампаніям. "І на тоне гэта 15-16$. А памножце на 24 млн т. Гэта вялікія грошы", - канстатаваў Кіраўнік дзяржавы.

"Не я ўзняў пытанне. Ён узняў. Прайшоў час, пазіцыя змянілася. Я гавару: як так? А там ужо кіраўнікі кампаній і ва Урадзе разумныя дзялкі, якія на нафтавай гэтай трубе сядзяць, накруцілі яго: мы (расійскія кампаніі. - Заўвага) там шмат страчваем. Я гавару: добра, не будзем па тэлефоне абмяркоўваць, скончыш мерапрыемствы - пасланне там і іншае, сустрэнемся і за сталом паглядзім, на што мы можам выйсці і да чаго можам дайсці", - сказаў Прэзідэнт.

"Што датычыцца газу, нас кінулі - не вывелі нас на роўныя цэны. Што датычыцца нафты: плаціце больш, чым яны прадаюць палякам і немцам. Дзе такое відана?" - абурыўся Кіраўнік дзяржавы.

"Чаго біцца (за цану на нафту. - Заўвага)? Гэта іх тавар, яны прынялі такое рашэнне. У тым ліку і па палітычных матывах, у тым ліку з-за недагавораздольнасці Бацькі Лукашэнкі. Так яны пішуць і "плявузгаюць" цяпер ва ўсіх сродках масавай інфармацыі. Я абсалютна дагавораздольны. Але што гэта за саюз, калі мы пачыналі ў тавараабароце з імі ў плюсе, а сёння мінус $9 млрд. І кожны год нам пагаршаюць становішча", - заявіў беларускі лідар.

"Яны проста пралічыліся. Яны думалі, што (утрыруючы скажу) дадуць мне ключы ад склада, і я пабягу ў Расію, таксама буду багатым, пушыстым, белым, прыгожым... Не трэба. Я буду працаваць у сваёй краіне, чаго мне гэта ні каштавала б", - адзначыў Аляксандр Лукашэнка.

Прэзідэнт таксама расказаў аб разліках на альтэрнатыўныя пастаўкі нафты ў Беларусь, акрамя закупак у Расіі. "Вы ж бачыце, што кожны год перад новым годам нам даводзіцца стаяць на каленях і вымольваць гэтыя нафтапрадукты", - сказаў беларускі лідар.

Аляксандр Лукашэнка падкрэсліў, што ў размове з Прэзідэнтам Расіі Уладзімірам Пуціным зусім не блефаваў і абмаляваў карціну, як Беларусь будзе дзейнічаць, калі расійскі бок не зменіць сваю пазіцыю.

Адзін з маршрутаў альтэрнатыўнай пастаўкі - праз парты на Балтыцы, і такім чынам ужо закуплена і пастаўляецца партыя нарвежскай нафты. Яшчэ адзін балтыйскі маршрут - з Гданьска па адной з нітак нафтаправода "Дружба", які для гэтага неабходна будзе запусціць у рэверсным рэжыме. "Я Пуціну адкрыта сказаў: на першым этапе, калі мы з палякамі дамовімся, будзем рэверсам пастаўляць па адной з трох труб", - сказаў Прэзідэнт.

Трэці напрамак, прадоўжыў Аляксандр Лукашэнка, таксама ўжо апрабаваны. У прыватнасці, размова ідзе аб пастаўках праз Украіну з Чорнага мора.

"І чацвёрты - гэта Расія. Мы не адмаўляемся ад гэтай нафты. Але такім чынам адбудзецца дыверсіфікацыя паставак. Гэта значыць, мы не з адной краіны, ад манаполіі, будзем атрымліваць нафту", - заявіў Кіраўнік дзяржавы.

"Мы пачалі тэсціраваць гэтыя маршруты, хочам паглядзець, што атрымаецца. Якія ў нас будуць страты ў параўнанні з цяперашняй цаной расійскай нафты. Гэта не блеф, гэта не тое, што, як яны там кажуць, Лукашэнка стаўкі паднімае перад перагаворамі. Ніякіх ставак. Мы проста глядзім, што мы будзем мець, колькі мы будзем пры гэтым страчваць", - падкрэсліў беларускі лідар.

Ён дадаў, што калі цяпер не вырашыць гэта пытанне, то праз два гады давядзецца наогул шалёнымі тэмпамі гэта рэалізоўваць. "Таму што тады ўжо размовы не будзе нават аб гэтых 18% мытнай пошліны, якую яны яшчэ ў нас не забралі, і аб тым, што цана расійскай нафты будзе таннейшая. Таму хочам мы гэтага або не, мы будзем ісці гэтым шляхам. Нам нельга залежаць ад адной краіны, аднаго прадпрыемства. Гэта манапалізм, і ў гэтым наша праблема", - упэўнены Кіраўнік дзяржавы.

Паводле яго слоў, Беларусь дамаўляецца з усімі ўдзельнікамі сусветнага рынку: амерыканцамі, Саудаўскай Аравіяй, Эміратамі. "Бліскучыя ў мяне з імі адносіны. Гавораць, колькі трэба, столькі нафты паставім. Вядома, гэта сусветная цана. Але якасць нафты там лепшая", - дадаў Прэзідэнт.

"Ніякага блефу, ніякага націску. Усё сумленна. Яны захацелі, каб мы плацілі - мы будзем плаціць. Але і мы, ведучы перагаворы па ўсіх напрамках (маё ўказанне Ураду) будзем гаварыць: усё, што каштуе, за гэта трэба плаціць, - заявіў Кіраўнік дзяржавы. - Увесь свет жыве па сусветнай цане. Не такая высокая цана нафты сёння, таму трэба да гэтага прывыкаць. Ад гэтага нікуды не дзенемся. Тое, што мы станем больш незалежныя, калі запусцім нашу атамную станцыю, і на чвэрць менш будзем купляць прыроднага газу, гэта таксама фактар нашай бяспекі".

Аляксандр Лукашэнка адзначыў, што самыя цяжкія часы краіна перажыла ўжо ў мінулыя гады. "Не хачу сказаць, што ўсё будзе лёгка. Не загінем. Не такія былі часы. Выжывем і цяпер. Мы нацыя гордая, незалежная, мы кожнага трэцяга паклалі на алтар, абараняючы некалі нашу агульную Айчыну, мы некалі бурылі свідравіны, здабывалі нафту і газ у Расійскай Федэрацыі. З усёй краіны вахтавым метадам ляталі туды людзі. Але сёння яны ўжо не нашы. А там цэлыя гарады будавалі беларусы, і я ў гэтых гарадах бываў".

"Вы павінны ведаць: мы не гуляем у нейкія гульні. Мы не хочам залішне напружваць нашага галоўнага саюзніка. Гэта сапраўды наш галоўны саюзнік. Можа, абразумяцца і вернуцца да нармальных адносін. Мы хочам працаваць з імі, але на аднолькавых умовах. Людзі, прадпрыемствы павінны быць у аднолькавых умовах, і краіны павінны быць у аднолькавых умовах", - сказаў Прэзідэнт.

Ён адзначыў, што гэта не значыць узяць усё, што ёсць у Расіі і Беларусі, скласці і напалам падзяліць. "Не трэба нам, мы падавімся ад гэтага кавалка. Мы павінны проста існаваць у аднолькавых умовах. І канкурыраваць. І я ўпэўнены, што мы справімся", - падкрэсліў Аляксандр Лукашэнка.

Кіраўнік дзяржавы лічыць, што перажываць няма чаго, у Беларусі цудоўныя адносіны са многімі дзяржавамі. Напрыклад, вядуцца пастаўкі вялікай колькасці прадукцыі на кітайскі рынак.

"Мы ўжо сёння асабліва не перажываем, што яны (расійскі бок. - Заўвага) закрываюць нам рынак па прадуктах харчавання. Прытым нахабна, беспардонна, без прычыны. Каб нахіліць, унізіць. Мы гэтым не адказваем. Але ж мы можам і адказаць. Некалі было, калі яны пачалі нас тарпедаваць. Мы пачалі іх аўтамабілі правяраць пад Смаленскам. І чарга выстраілася на чыгунцы і аўтатранспарту да Крамля. Тады ўбачылі, што гэтак рабіць нельга", - заявіў Кіраўнік дзяржавы.

"Усякае мы перажывалі. Але гэта нам не трэба. Я гэта гавару сумленна і адкрыта. Нам патрэбны нармальныя сяброўскія, братэрскія адносіны. Калі гэтага старэйшы брат хоча", - падкрэсліў Аляксандр Лукашэнка.

"У нас ёсць свая краіна. Мы суверэнныя і незалежныя. Мы сваімі розумам і рукамі, што змаглі, зарабілі, будуем сваю краіну. І мы не можам быць часткай якой-небудзь краіны. Я не магу вам здрадзіць і растварыць Беларусь, няхай нават у нашай брацкай Расіі", - падкрэсліў Аляксандр Лукашэнка.

"У перагаворах з Прэзідэнтам (Расіі. - Заўвага) я дакладна і адназначна паўтара-два гады таму сказаў: гэтага ў Беларусі не можа зрабіць ніхто. Нават калі я на гэта пайду, то беларусы мяне з'ядуць на працягу аднаго года пасля прыняцця такога рашэння", - адзначыў беларускі лідар.

"Што датычыцца мяне асабіста, я ўжо напрацаваўся. Мне ўжо больш улады ці менш не трэба. І ў імя таго, каб прадоўжыць сваё існаванне, атрымаць ключы ад нейкага "склада" ў Расіі, для мяне непрымальна. Я не хачу быць апошнім прэзідэнтам Беларусі. Ганарова быць першым, але апошнім быць не хачу. Я хачу, каб нашы дзеці жылі на гэтым кавалку зямлі ў міры, згодзе. У абдымку з рускім чалавекам, расіянамі. Яны нам не чужыя. Расіяне - гэта нашы людзі. Ад іх, праўда, мала што залежыць цяпер", - заўважыў Кіраўнік дзяржавы.

"А што датычыцца ўлады, я вам адкрыта сказаў: прэзідэнцкія выбары - вы вырашыце, хто будзе кіраваць краінай. І калі вы мяне не выбераце, я на вас не пакрыўджуся. Гэта будзе ваш выбар. Вы павінны вызначыцца, час сур'ёзны, хто будзе кіраўніком дзяржавы, у якой будуць жыць вашы дзеці. Не пра нас сёння ідзе размова. Сёння размова пра дзяцей, пра мірную і спакойную краіну", - рэзюмаваў беларускі лідар.

Адказваючы на пытанні работнікаў прадпрыемства, Аляксандр Лукашэнка заклікаў грамадзян развіваць прыватныя падворкі ў вёсцы. "Я спецыяльна сёння вырашыў праехаць ад свайго дома сюды. Што мяне больш за ўсё здзіўляе і прыводзіць у роспач? Вось едзеш па вёсачцы: там некалі былі дамы, а сёння (так, гэта не кінутыя ўчасткі) там засявае былы калгас, цяпер акцыянернае таварыства. А чаму людзі не хочуць узяць гэты кавалак зямлі? Чаму не ўзяць, пабудаваць маленькі домік? Няхай цяпер просценькі, але вы аслупуйце за сабой паўгектара зямлі і забяспечце жыццё не толькі сваім дзецям, але і ўнукам. У хуткім часе гэта зямля будзе каштаваць даражэй за золата. Чаму людзі такія неразваротлівыя?" - са здзіўленнем запытаў Аляксандр Лукашэнка.

На яго думку, людзям трэба прапанаваць шырокую лінейку недарагіх дамоў, якія якраз і вырабляе філіял завода газетнай паперы "Домабудаванне". "Месяц - і дом стаіць на фундаменце. Гэта трэба рабіць", - перакананы Прэзідэнт.

Карыстаючыся выпадкам, на прадпрыемстве закранулі хвалюючую іх праблему: яны прадаюць свае каркасна-шчытавыя дамы ў Еўрасаюз, а ў Беларусі двухпавярховыя збудаванні ўзводзіць не могуць - не дазваляе заканадаўства. "Пытанне ў старых нормах пажарнай і электрабяспекі", - растлумачыў намеснік дырэктара завода па капітальным будаўніцтве Аляксей Малчанаў. "Я так і думаў, што пытанне з галіны глупства", - адзначыў Кіраўнік дзяржавы і даручыў вырашыць гэту праблему на працягу першага квартала.

"Я ведаю яго дамы, быў у іх, каб паглядзець, што гэта. Цудоўныя дамы! Што за праблема? - абурыўся Прэзідэнт. - Больш вы рабілі б такіх дамоў, і людзі нашы будавалі б. Цэны ў вас, як мне гавораць не зусім багатыя людзі, нармальныя. Але не старайцеся іх высока падымаць".